يا سلام الليلة أول يوم لي في الحياة العملية.. أي حبدأ الشغل بعد كم ساعة أنا مبسوطة لدرجه وما قادره أعبر عن فرحتي يلا لازم أجهز وأصل بدري عشان أثبت ليهم إني زولة جادة.. فطوم شوفي لي اللبسة دي جايه.. ولا أجرب وحدة غيرها.
_أي حاجه جاي معاك ياخ أمشي ساي المكان قريب وبعدين ما أتوقع يشغلوك من أول يوم.
_حتى ولو لازم أكون أنيقة اليوم دا مهم شدييييد❤️أنا أول مرة أشتغل في وظيفة رسمية.
_البسمعك بقول إتخرجتي من الجامعه وعايزة تشتغلي بمجالك غيتو إن شاء الله تقدري على نطيط الشفع وقلة أدبهم.(فطوم)
_شغل المجال دا حاجه تاني كدي أتخرج بالأول
طيب اها ياخ زهجتني أصلك ما بتفتي الزول بحاجه مقنعه اللبسه دي جايه ولا لا..
_دقيقة طيب أظبطها ليك شوية.. أيواا كدا مافي زيك إتحصني قبل ما تطلعي.
_ حاضر.. حاضر يلا أنا إتاخرت.
ماشه الشغل ي منو.. أي ياماما... كويس الله يوفقك.. أميين ياست الحبايب دعواتك بس ورحت حضنتها بعدين جريت بسرعه على الباب.. قبل ما أصلو جات خالتي ودعت لي.. ياسلام مافي شي بفرحني زي دعوة الكبار.. أمييين ياخالتو بعدين لقيت أخواني المشاغبين قالو :السلام عليكم يأستاذة.. إن شاء تقدري على التدريس والفصل والله إنتي وحده مجازفه..
_بقدر وبتشوفو.
_بعدين ما تشكي وتقولي ما حزرناك.
_إرتاحو يا سادة ما حقدم أي شكوه.. وبعدين لما أشكي ما بجيكم تشبهو الكتاكيت الصغار.. قالين نفسكم كبرتو.
_أرح يامحمد والله أولاد الجنوب ديل حيورها الويل أوع تشيلك الهاشمية وتصدقي إنك بقيت أستاذة وتضربي بعدين برقدوك سلطة..
_هاهاها بايخ يلا طيرو من وشي أخرتوني.
يلا أنا ح بدأ أوضح ليكم الحكاية من أول.
أنا أسمى منال أحمد ساكن مع خالتي في الصحافة شرق لانو يبتها قريب من جامعتي بقرا في كلية الهندسة المدنية سنه تالتة .. وبما أني قاعده معاها فكرت إشتغل وما أتقل عليها بمصاريف البيت رغم أنها ما محسساني بحاجه.. لكن دايرة أعمل مشروع يساعدني عشان إتشتري كل الناقصني للجامعه وأفر للمواصلات.. وأكون شايلة حاجه في يدي تحسسني أني بقدر أجيب أي شئ خطر على بالي.
باختصار دا أول طريق أسلكو عشان إعتمد على نفسي.
أنا ما بحب صراحه أركز على وصفي لانو أنا بت عاديه جداً.. أو ما بهتم كتير بالمظاهر لأنها ما بتغريني.. بس بقرب أجن لما إتعرف على أخلاق الزول وإكتشف إنها طيبه من غير مقدمه ح حبو وأعجب بيهو والله يسترني ويعيني لحد لما يتقدم لي.
لكن التفكير دا كلو في أرض الأحلام الزمرديه.. مافي زول زي دا قابلتو في الواقع.. ذوقي صعب على فكره.. وما أي أخلاق ممكن تركب فى رأسي.. الأخلاق البجد تستحق يقولو ليها أخلاق مازي ناس الزمن دا الزول يمد عينو شبرين تقول عايز يقطع وشك بكل غباؤه تسمع البنات يعلقو عليهو بأنو شاب محترم وخلوق.. أقسم بالله لو الأخلاق بقت كدا معناها الناس القللين أدب ديل نطفش ليهم من الدنيا ونحرد ليهم عديل .
المهم عندي أخواتي وحده مرحه وقلبوشه إسمها سمر وحدة أكتر من رائعه ودي فطومه. بعدين تؤام في سابع (هادي و أدهم ) ديل القبيل كانو بتفاصحو.. أبوي شخصية حليمه وعطوفه لدرجه وماما حاسمة بس حنونة.. فطوم و سمر بقرو في الجامعه الأولى بتقرأ احياء وسمورة كيمياء واي وحدة في داخلية جامعتها.
نجي للمهم أنا طلعت ماشه في الشارع بحذر عشان ما أوسخ جزمتي رغم أنو خالتي وصتني أركب ركشة بس أنا حابه إتمشي وأوفر مع بعض طبعاً أحلى حاجه إنو الدوام مسائي... بفكر في حاجات كتيرة يارب التعامل معاهم ساهل؟ فهمم شنو عن المسلمين..ياترى عندهم عنصرية؟ الاساتذه شكلهم ناس راقييين بس الطلاب طيب أنا ليه بفكر وموجعه رأسي لما أصل ح إتعرف عليهم.. أكيد براءة الطفولة عندها أثر.. بعدين هم (أساس) يعني كتاكيت صغار طمنت نفسي ورحت خاته أحسن إبتسامه على وشي أول ما حصلت ركبت السلم و إتجهت على مكتب المدير :
_قود إفيني تيتشر ؟ .
_أو ه قود إيفني ماي فريند هاوار يو؟ .
_أم فاين هاوار يو؟
_فاين بليز سد داون.
_ثانكس.
مستر جيمس دا مدير المدرسه شخصية راقيه ومرحه.. وبالجد محترمه.. إتونسنا مع بعض وكنا متعادلين أنا ما شاطره في الانجليزي.. وهو ما أشطر مني في العربي بس قدرنا نوصل لبعض الفهم ونمشي بالكلمات العارفينها قال لي أنو ليهو كم شهر بس في السودان وإتكلم لي عن رحلاتو في كم دول أكتر شئ عجبني في كلامو عن قضايا المراءة في التعليم وحكي لي عن النهضة القائمين بيها في الجنوب عشان يحفزوهم للعلم لانو للأسف للآن الكتير منهم فقد الرغبة بسب عنصرية الحكام والسياسة قبل الانفصال ولو الحكاية دي جزرها طويل من زمن الإنجليز العملو الفتنه وفرقو بين الأبيض والأسود.. السيد والعبيد.. والغنى والفقير.. الحقيقة هو ما دخل في السياسه ولا إتفصل حتى ماذكر عن العنصرية 🕷️ اللسه شغاله.. . حتي في الدين ماعادلو بينهم يمكن دا السبب الخالي 80٪منهم مسيحيين بالتبشريات الكان بتجيهم رغم أنو العاصمة الزمن داك كانت بمساجدها...
