لما سمعتو قالت ليهم خلونا نغير الشارع وجون ضحك فيها بقى يتونس ومع أصحابو .. ومرة يرجع لتلفونو لحدي لما حصل البيت.
#منال
إتعمدت أقعد في المكتب بعد نهاية الدوام مدة أطول عشان ألقى كونغ وأسالو عن الولد.. وممكن فرصة أحل سوء التفاهم بينا دخل كم أستاذ وقال لي ما ماشه قلت ليهم حقعد شوية وبطلعو ويودعوني ويمشو.. وأنا بتحجج بالكراسات الجمعتها من فصل تانية عشان أصححها الوقت جرى بسرعة.. فجأة جأني أحساس أني بقيت براي في المدرسة شوفت الساعة10 إتخلعت فقمت وقلت يامنال ما تجازفي الولد في ستينو.. خلاص أمشي بيتك طالعه ألقاهو ليك في وشي.
_أ اأنت بتعمل هنا شنو؟(منال)
_نفس السؤال وجهي لنفسك؟ (كونغ)
وقام إتخطني رغم صدمتو من وجودي وبقي يفتش على كم حاجة.
_قصدي أنا كنت منتظراك(منال) .
_هلا (كونغ)
_أنت قايل نفسك منو.. فهمت شنو(منال)
_إشتقت ليك(كونغ)
خوفت منو شديد كويس أني جنب الباب إذا عمل أي حركة مباغته حضربو وأجري بس كدي يجي
_جايك صدقني(كونغ)
_بس إتجرا قلتا بصوت عالي وانا متجه على الباب. أنت واحد مجرم وقليل أدب ماعندك أخلاق وديت الطالب وين وكان ماشي على وأنا بكورك بس قرب وبكرة بتشوف أنا حشكيك لجيمس المشكلة أنو لما تحصل لي ورطة بفضل أصرخ وأتكلم وأنا واقفه مكاني بدل ما أجري أو أهجم حسيت قلبي حيقيف أول ما قرب مني بس إتخطاني وطلع برا المكتب واسمع ليك بقول:
_أسف كان إزعاج عابر ما قلتي لي أخبارك شنو إن شاء الله ألم المفاصل راح بتأخدي أدويتك بانتظام.
😱(محادثة بالتلفون)
اكيييد شكلي كان زي المجنونة.. سجمي..
أنا لسه واقفه جنمب الباب.. ماعارفه أعمل شنو.. أجري اي دا حل كويس بس هو واقف في الطريق.. غير الولد أنا كنت دايرة أسالو عن خاتم حبوبه.. فتشتو قبيل ما لقيتو ؟!
خلص مكالمتو بقى يعاين لي زي المصيبة الوقعت على راسو.
عاين مسافه طويلة من غير ما يتكلم وأنا بتجاهل نظراتو
_زح لي عايزة أطلع.(منال)
_إتفضلي(كونغ)
وزح بدون ما يقول حاجه تانيه سكوتو بزيدني إنحراج أخير يتكلم حتى لو حيشاكل.. كان بارد شديد وأنا بنزل السلم درجه.. درجه منتظراهو يقول حاجه لحدي لما حصلت أخرو قبلت أشوفو لقيت واقف بنفس الطريقه وبفكر.
_بالمناسبة يأستاذ منال لقيت شي بخصك يوم السبت.. بس هسي ما معاي بجيبو ليك مرة تانية.(كونغ)
أنا أول ما سمعت كلامو حسيت نفسي دايرة أطير من الفرح وقلت ليهو بلهفة قبل ما يدخل المكتب :
-خاتم(منال)
_👈إحتمال(كونغ)
_(إحتمال)؟! .. بس ما مشكله لقي الخاتم بالجد الحمد لله.(منال)
.. بعدين وقفتو لحظة إترددت قبل ما أقولا..
_امم شكراً ودقيقة ماتدخل؟ الولد لي ضربتو قدامهم.. إحتمال ماهو السرق أنت كان مفروض تسمعو للنهاية(منال)
وقبل ما إتكلم أكتر لقيتو رمي لي مفاتيح وقال هو بدخل المكتب:
_ أقفلي فصل خامس وسابع الجنبك... طلع من المكتب بعد ما طفى النور لقاني لسه واقفه مستغربه قال لي .. على الأقل خليني أستفيد من وجودك.. وركب السطوح وهو بقول أنو داير يتأكد من قفلو فقمت إتحركت سريع وبقيت أقفل معاهو..
إتلاقينا بالحوش وأديتو المفاتيح بعدين طلعنا الشارع وبقي يقفل بوابة المدرسة ودخل المفاتيح في جيبو ومشى.
_دقيقة ماشي وين ما عايز توريني عملت ليهو شنو (منال) كان قدامي قال لي. :
_فضول.. ولا إهتمام(كونغ)
_مافهمت(منال)
_بتعرفي إنجليزي.. أشرت ليهو براسي لا قال لي معناها تفاهمنا حيبقي صعب سكت شوية وقلت ليهو بس بقدر أفهمك في الأول إذا ما درست في المدرسة كان يمكن فضول بس لما حملت الامانه بقى إهتمام بتعرف عربي؟ مارد وأنا بقيت أضحك ولما لقيتو إنحرج (هذة بتلك) سكتا وقلت ليهو:
_ طيب بشرح ليك (عندك حاجه ومفروض تحافظ عليها لأنها بقت واجبك دي بتسميها أمانه.) زي روحك مثلا والناس الحولك المسؤول عنهم وخاتمي🤓كمان أمانه أول ماقلت كدا قعد يضحك وأنا ضحكت شكلو عرف أني فكرت في عبارتو قبيل(برجعو ليك في أقرب فرصه) بعدين سكت وقال لي:
_معاك حق بكرة برجعو ظابط(كونغ)
_أنا ما قلت حاجه أخد راحتك. (منال)
_لا قلتي كتير.. يلا خليني أختصرك أولا حتغاضي عن رصيدي الخسرتو.. عملت نفسي خارج الشبكة.. وتاني؟ الولد ما ضربتو عشان السرقه والتلفون عارفو ما شالو هسي هو في فترة فصل من الدراسه ليومين بسب سلوكو مع المعلمين. (كونغ)
_طيب عملت شنو لحل المشكله؟ (منال)
مامانع أوريك :
_الشاب الإتهمو سرق التلفون كان ملخبط فيهو.. والحقيقة الاتضحت أنو الولد سرق من البيت قروش وجو ولدين شافوهو فنطو بالاتفاق وسرقو كم حاجه غير التلفون الحركة بقت واضحه والناس إنتبهت وقبل ما يفكر يجري مسكو الشاب فاضطر يعوقو وديل مشو بالشارع التاني ولاحظ إنهم إتنين ما قدر عليهم وبقي ينده للناس في الواحد.. فجرا بشارع المدرسة والظاهر إنو كان حيتلب فيها لو ما حس بحركتي.. المهم قدرنا نعرف الأولاد بالنهار لما سقتو عشان يتعرف على شكلهم.. وحلينا المشكله بتدخل الشرطة والشباب واي زول أخد البستحقو..
_ كويس شديد. (
منال)
_ساكنه وين؟(كونغ)
ماعارفه لي ماحسيت بغرابه من سؤالو بالعكس جاوبت بتلقائية حي الصحافة قريب من هنا.
قام وقف ركشه وصف ليهو جنمب الشارع أنا بعاين ساكته قال لي أركبي.. ما تفكري كتير دا مجرد ترحيب لتدريسك معانا في المدرسة بعدين إبتسم مواصل رغم أني ما مبسوط صراحه بس مد يدو وقال :
_كونغ.. كونغ قالواك يدي إتحركت من محلها وصافحتو بين مبتسمه و.. ماعارفه
_منال أحمد.
_شدي حيلك في الانجليزي يأستاذة منال.. في المدرسة دي يافهمتي الرطان.. أو إتعلميهو عشان أبسط شي تعرفي الزول لو بقطع فيك ولا.. لا.
مابحب النصائح بس حبيتها منو.. لقيت نفسي مبتسمه وقلت ليهو :
_حتساعدني في الرطان ... قال لي بفكر..؟ بعدين مشى.
_دقيقة يامنال ياستفين.. ياكونغ.. واحد منهم(سمر)
ماعارفه لي حسيت بخجل لما قالت إسم كونغ ممكن عشان إتزكرت عباطي معاهو في المكتب. بعدين رجعت لمنال الجدية والعاقلة:
_ستين ضربة في رأسك عسى ولعل تعقلك وكونغ دا أقول ليك شنو كوره كبيرة تشيلك وتغرقك؟ (منال)
_اووو من النبذ المصطنع دا معناها في حاجة أكيييد (سمر)
غاظتني الكلبة و ندمت عشان حكيت ليها
_أقسم بالله العظيم مافي حاجه. (منال)
هنا رجعت بخفي حنين وقالت لي هسي مالك قسمتي كان تخليني إستمتع بدور المحققة شوية وفطوم بقت تضحك وقالت بمزح:
_ حتى لو في حاجه عائلتنا دي متشددة ما بتديك ليهو.
_عنصرية يافطوم كم مرة أعلمك تعبري بالفاظك صاح (سمر)
وبقو يتناقرو وأنا بعاين ليهم وبضحك فجأة جا خيالو في بالي لماحكي لي القصة بالانجليزي عشان يساعدني على فهمو.. طريقة كلامو لما اسألو عن الشباب مرة وعن زيكو. . اني ما فهمتو وإجتهادو إنو يشرح لي وبقول لي أنو الانجليزي ما بتشرح كلمة.. كلمة.. بالمقابل أنا بعيد ليهو القصة بالعربي وبتعمد إستخدم ألفاظ عميقة عشان يسألني عنها... و... و...
_منال يابت وين سرحانه(فطوم)
سكتو لحظات لما إنتبهو أني سرحانه في خيالي وجو على الاتنين و خلعوني في نفس الزمن.
فقلت بصوت عالي:
_كونغ؟! قصدي إتخيلتو بشرح لبعض العربي والانجليزي وكدا وأنتو خلع.. وقبل ما أتم كلامي ختو يدهم في كتفي وقالو لي جذاب
حركت أشرت برأسي بخجل بس بدري أقولها
_إتذكري أنو مسيحي؟ (فطوم)
إبتسمت وقلت ليهم ماتخافو يأخواتي أنا أعقل من أني أقع فيها ضحكو وقالو لي تصبحي على خير
_وأنتو من أهلو. (منال)
