لمي قابلتي منو نفسن بيك (أمي)
_ماما ياخ طلعت بالغلط.. 😢(منال)
_غريب أنت أصلاً ما في زول بعجبك بالمناسبه ود عمك قال داير يخطبك الأسبوع الجاي. (أمي)
_حسي تصدقي أني من النوع الساذج البعجب بالزول من أول نظرة بعدين ود عمي لو ما داير أوريهو جني الأسود أخير يقتنع بالقولتو ليهو المرة الفاتت. (منال)
_أولاد أعمامك ديل كلهم ما راكبين لي في رأسي.. وأبوك زاتو عندو رأي بس أخوانو صعبين..(أمي)
_ماما النعاس طار من عيوني الليلة البنومني شنو.(منال)
_يابت يامستهبله لو نعسانه بتنومي خلي نظرياتك المحفظاها لعقلك.. قال يفتحو النور تنططي عيونك زي المخلوعه لو في أخر نومه.. ويتكلمو معاك ما تقدري تنومي الا بعد ساعة (امي) .
_بقت عادة وين أخواتي.؟ (منال)
_مشو يباركو لخالتك قالو عريس رندا جا من السعودية وخلاص العقد قرب بكرة أمشي ليهم الله يجعل ليك مخرج ويرزقك ود الحلال.(ماما)
_عفواً ماما ما تشوفي الشغل وتصدقي أني إتخرجت وتقارنني برندا أنا لسه طالبه جامعية(منال)
_بعدين ياخوف تجيني في نص تعليمك وتقولي لي دايره أعرس.(أمي)
_ماما؟! (منال)
#في بيت جون
كان راقد في السرير وبطبظ بالتلفون يرسل لي داك ومرة يلعب كم قيم بعدين يرد على أصحابو ولما يزهج يمشي يشوف الفيس بعدين يزهج بسرعة منو ويطلع.. والحقيقة هو متسبل ساي دي ما الحاجه المزهجاهو بس بحاول يتناساها قبل شوية دخل عليهو كونغ وقرب يضربو من غضبو جاهو خبر إنو جون ما مشي المدرسة الليله رغم أنو خلاهو يطلع قبلو وإتاكد من وصولو بعدين مشى لمشوار. لانو يوم الاتنين ما من أيامو الشغال فيها بالمدرسة.
_أسمع هنا ي جون دا كلام أخير.. عدم إلتزام وفوضى مانافع معاي أنت مدرسه دا جيتو للعلم ماداير علم ياخ ما تقرأ عديل لاهنا.. لا بالجنوب.(كونغ)
_كلاص أنا بخليها القراية دي. (جون)
_طوالي خليها بس تقعد تشتغل وتلم حق تذكرة لجوبا اليوم التخليها بوقف صرف عليك ذا تذ إنف.(كونغ)
وطلع وضرب الباب بقوة وارهو.
_شت.. دوقيت.. أوه ماي قود دونكي أوه.. أي هيت يو؟! (جون).
أحكي ليكم قصة الأخوين الغريبه كونغ دا الأخ الأكبر في عمر ال ٢٣سنه كدا أو أكبر بشوية .. أما جون دا مراهق متهور ولئيم في ١٥سنة الفرق بينو وبين كونغ ما كبير شديد.. بس أبوهو مؤكل أمرو لاخوهو ودي الحاجه المغضباهو ما بتخليهو يتخذ قرار من غير إستشارتو.
الغريب في الحكاية أنو زمان بقولو انهم كانو أخوان مافي زيهم بحترمو وبحبو بعض لدرجه.. كونغ كان بالنسبة لجون أي حاجة وكونغ ما صدق جابو ليهو أخ بعد فترة طويل من الانتظار فكان حريص أنو يقضي مع أخو الصغير كل لحظة... قصة خفية بين الاتنين بتقدور تعرفوها حسي حصلت معاهم في السنين الأخيرة خلتم ما يطيقو يعاينو لوش بعض. الناس بتألف في الأسباب ناس بقولو أول ما ماتت أمهم إتغيرو.. وناس بقولو أنو كونغ شارك في حادثه حصلت لاخوه وهو ما واعي (سكران) وخلت جون يفقد الأمل منو ويكرهو. و...
كلها أقاويل مامعروف صحتها من كذبها رغم أنو بعضها صحيح زي حادث موت أمهم وإختطاف جون..
