_زيكو أنت فوت الدرس أمبارح والليلة كمان فاقد تركيزك مالك مزهجني قايل نفسك شافع عشان أجري وراك وأسالك طوالي ماعندي مشغولية غيرك بس فهمني الحاصل ليك شنو (سبت)
كان في صوت اتنين في الشارع الداخل على المدرسة لقيتهم بالصدفة رغم انهم بتكلمو بالرطان بس حسيت صوتهم ماغريب على.. عاينت لقيت سبت بتكلم بحدة مع زيكو وماسكو من يدو بقوة.
_مافي شي أستاذ خليني أمشي (زيكو)
_شوف ما تختبر صبري وتقول لي مافي شي بتتصرف بغرابة ليه سمعت من استفن وجاك انك رجعت مهمل في الواجب.. والمدير إستدعاك الأسبوع الفات انت ناوي تضيع تع. َ
بنا ولا شنو.. كان ساكت ومنزل عينو للأرض وأنا الواضح إتفشيت فيهو ضغط الشغل بدون سبب عصبت كتير بقيت أعاين ليهو لاحظت دموع في عيونو وطبعا لسه ماسك يدو بعنف من الغضب فكيتو وقلت ليهو بهدوء:
_ أنا أسف.. عارفك ما متعود على وغير كدا أخلاقي ضيقة ومتفهم قدر شنو مفتقد كونغ.. سكت شوية بعدين واصلت : اي زول في الحياة عندو أسلوبو وأنا بالرغم من اسلوبي عنيف بس داير مصلحتك تعرف أنو وصاني عليك بشدة قبل ما يسافر..؟!
زيكو قش دموعو وبقي يشهق بصوت أول ما سبت جاب سيرة كونغ وماقاوم نفسو وبكى أنا كنت متحيرة الموضوع البتكلمو عنو شنو.. وليه زيكو حالتو كدا بس فضلت ما إتدخل لحدي لما يحلو الخلاف بيناتهم.
مابكي كتير قش دموعو سريع بعد دقيقتين واتحرك بعد ما اعتذر من سبت وقال ليهو تاني ما بكررها وجرى على بيتو وما انتبه لي.. سبت حس بتضايق من أسلوبو وقال بهمس : كونغ قالواك أثبت انك أميز واحد فينا وبتعرف تدير الأمور قبل عشان يمشي بس لاحظ لي :
_ أستاذة منال صدفة سعيدة والله.. كيفيك قال كدا وهو متجه يسلم على إبتسمت وسلمت عليهو بلهفه وقلت :
_بخير الحمد لله أنت أخبارك شنو؟
حس اني كنت واقفه قبل زمن فقال لي :
_زي ما شوفتي تعب المدرسة والشغل مرات بحس اني عاجز عرفتو قصد زيكو فابتسمت وقلت ليهو:
_ ماتقول كدا صاح الطلاب بكونو متعبين شوية في الأعمار الزي دي بس بتغيرو.
ابتسم وقال لي:
_انتي جديدك شنو.. صراحه من زمان كنت متمني اتواصل معاك وأعرف خبرك؟
_ماعارفه أقولك شنو.. للأسف حياتي فيها جزء من الرتابة.. ماشه في روتيني المعتاد جامعة.. ودارسة صراحة مافي جديد.
_اممم انك تركزي على مذاكرتك فدي حاجه كويسه بتمنى ليك التوفيق.(سبت)
_آمين يارب وبالمناسبة أنا مريت علي المدرسة زيارة شكلكم إنتقلتو مبروك الموقع الجديد وصل
لجيمس سلامي الحار وهنيهو. (منال)
بدت في ملامحو التعجب واتذكر اني ماعارفه الحصل ليهم قال لي :
_انا خليت الشغل من زمن؟! (سبت)
_كيف؟! وليه؟(منال)
ابتسم وبي صوت متغير :
_حصلت مشكلة وانطردت.. ولا أقولها بطريقة راقية إستقلت وخليت الشغل معاهم. (سبت)
_جيمس مستحيل يتصرف كدا(منال)
عاين لي باستغراب وقال:
_من زمن طويل إتخلى عن الإدارة لران وهسي ران المستلم كل شي.. وهو المدير.(سبت)
قلت ليهو بدهشة :
_اصلا دي تصرفات ران كنت متأكدة انو جيمس مابفكر كدا متين حصل الكلام دا..؟(منال)
إبتسم وقال لي :
_ماتكوني واثقة شديد بعد شهر من سفرة كونغ الأمور إتغيرت.. نبرتو كانت حزينة واصل: صراحه نحن المعلمين شكينا فيهو من أول يوم تصرفاتو بقت فظه وأغلب وجودو في مكتب جيمس .. مرات الصدف بتجمعني بيهو بفتش في كم حاجة من أغراض جيمس ولما أشوفو بقول أنو فاقد كم غرض وعايز يفتش عنهم..
فاجئنا بديفيد استقال وأدى خبر كاذب للمعلمين عنو وقال انو إتقصد يسرق مبلغ خرافي من المالية وجيمس ما استحمل وطردو.. ودهشنا لما ورانا الخبر التاني وهو انو حيستلم شغل كونغ من اللحظة دي.. شعور عدم الراحة إتسرب لينا .. بس سكتنا ونحن عارفين أنو البحل مكان كونغ ليهو الأولوية بكل شي.. حتى لو إعترضنا ما ح تواجهنا غير المشاكل ..
شهر كان كافي يقلب الموازين ويخت اي واحد مننا أمام الأمر الواقع.. إتفاجنا بيوم جيمس جمع المعلمين كان باين عليهو متغير ومزاجو كعب وران معاهم في المكتب قبل ساعتين جينا وقال لينا إتفضلو وقعدنا.. مادخل في الموضوع طوالي ماكانت عوايدو فتأكدنا انو الاجتماع دا ما حيمشي على خير قال لينا في نهايتو انو كتب كل شي بأسم ران( الموقع الجديد.. المدرسة.. واتنازل ليهو عن الإدارة نهائيا) بعدين وواصل وقال: ح ننتقل للمدرسة الجديدة والخيار بيدو إذا حيواصل تعينكم أو.. وسكت ما تمها عاين لران تكلم بوقاحة:
_أو أفصلكم لو عايز.. بس أنا ما من النوع البقطع عيشة الزول متفق معاي ياجيمس قالا ساخر وهو بعاين ليهو ما رد وواصل :
_الا انت للأسف بقيت عجوز وما صالح لتدريس خلي الإدارة.. سجلك في التعليم ضلم من اللحظة دي ياعمي.. حيمس داير يتكلم بغضب سكتو وقال ليهو:
_مفتكر تعترض على لفظ عمي في الشغل دقيقة اتذكر مكانك بالأول انت ولا حاجه هسي.. الليلة ممكن أخليك تتأمل وتسرح في كرسيك وتتذكر الايام الخوالي..همس ليهو:
( أنت وقعت على دمار المدرسة بنفسك أول ما سلمتني الميزانية) حضرت المعلمين الجليلين أنا ماناوي إستمر في مشروع المدرسة كتير فأحسن ليكم تفتشو عن شغل بديل من هسي بما انو الأمور تحت سيطرتي فأنا حوريكم مشروعي الجديد حفتح نادي مشاهد ليلي بأرباح المدرسة و كونغ خدمني وما حنسى ليهو الحاجة دي بعدين حكي عن الموقف:
_بالنسبة لجيران فما اتوفقنا فيهم بس مع الايام الأمور بتنحل إقترح أنو ننتقل في أسرع فرصه(كونغ)
_وجة نظر كونغ ما مشجعة والموقع بعيد وأثناء
ما بحاول أفند رأي كونغ لمحت صور للمناطق حول المدرسة بكم شارع كانت نوادي مشاهدة وأغاني وضجة فهمت قصدو شنو بالجيرة الما مشجعه وهنا جا على بالي فكرة المشروع.. ودرست ربحو ولو ما العجوز جيمس رأسو ناشف كنت سويت الموضوع معاهو بالتراضي.(ران)
_دا الحصل يامنال وماناوي اتذكر الحدث أكتر ران عمل لي مغصة في قلبي وتركت الشغل فورا بعد الاجتماع لو وصفت ليك مقدار العجز الشفتو في وش جيمس ما بتفسر. (سبت)
_أنا أسفة ذكرتك بالحدث دا وبالنسبة لقرارك كان صائب فما تزعل ربنا بعوضك. (منال)
ابتسم وقال لي:
_صراحة عوضني والحمد لله إشتغلت في مدرسة تانية حتى المرتب زايد والبيئة محفزة وأهم شي الاحترام موجود و ما عايز شي تاني (سبت)
_ماشاءالله شوفت ربنا ما بنسى عبادو (منال) بعدين واصلت وسألتو عن أخبار المعلمين قال لي منهم قعدو ومنهم مشو واستفين إتزوج وسافر برا البلد في الاخير ختمت ونستي معاهو بزيكو وسألت عن أخبارو قال لي:
_بعرض نفسو للمتاعب بس بخير الحمد لله.. بحاول أحافظ على وصية كونغ قدر مابقدر وأعينو.. عرفت بالرغم من أنو خلى التدريس بس عامل دروس خصوصية لزيكو في بيتو وموصي عليهو أصحابو من المعلمين الفي المدرسة..قال لي أحيان كتيرة بحس نفسي مقصر معاهو (سبت).
قلت ليهو :
_صدقني كونغ حيكون فخور بيك.. وزيكو يمكن بتصرف كدا عشان اشتاق ليهو بس كمان هو لسه صغير حاول اتفهمو.(منال)
_نفسي أعرف كونغ كان بديرو بياتو اسلوب.. حاسي بالغيرة منو إبتسمت جو نفسي احساس أني سعيدة وهو بشكر كونغ وفي الواقع كان سبت متغايظ شوي ماعرفت أقول شنو بس حاولت ما اكون فرحانه وقلت ليهو:
_أي زول عندو شي بميزو. (منال)
