______________________________hello______________________
لطفي يضرب في يونس بالمخدة على الوجه و يهدر: نوض يالحمار فاتك الحاال..
يونس ناض يجري مخلوع : وشبي راستك مع الصباح ؟؟
لطفي: واش شكارة تاع رقاد ..تضحك عليا ونتا اليوم النهار لول تاعك فالخدمة صابح راقد !!!
يونس ناض مخلوع يحوس على تليفونو : وين راه **** التليفون ..
لطفي: هاوليك يتشارجا شبيك مخلوع
يونس فتحو شاف الساعة لقاها الربعة تاع الصباح.. نخلع ...شاف في لطفي لي شابع ضحك..رجع يغلي : نحرق الراسة تاعك يالزوفري تنوض فيا على الربعة تاع الصباح ؟؟؟ تفوووو حيواان ...
لطفي هرب لشمبرتو هو وعامر وغلق الباب ويونس يخبط قريب كسر الباب : افتح ياااو افتح..
لطفي شاد في كرشو مالضحك... عامر راقد بالنوم وحاط المخدة فوقو..جات زهيرة يماهم مخلوعة : الله يحفظ ويستر وشبيكم صباح ربي تتناطحو ؟؟
يونس: البغل ينوض فيا على الربعة تاع الصباح!!!
زهيرة: بووه عليك واش من ربعة راهي السبعة ونص ...ونتا مفطنتش .. يونس مخلوع لطفي فتحلو الباب ويضحك
يونس: ديريڨليت الساعة ..معليش العشية نتفاهمو..
لطفي: روح اجري قبل مايغلقو عليك الليسي ...
يونس يلبس بلخف ويشوف في روحو فالمرايا ويحط فالبارفان...ولطفي يلبس موراه..
لطفي : خخخخ واش هذي الحطة ..حاب طيح ڨاع بنات ليسي فيك ؟؟ خلينا وحدة ياسيدي!!
يونس: بلع سكتنا والله...رايح نقري ماشي نتمعشق..
لطفي : المهم شوفلنا كاش زلة واعطيها نيمرويا قولها خويا عاقل وناس ملاح متنساش.. وحط يدو على شعرو خسرولو وهرب..
يونس: نع*** ... خرج لطفي وزاد موراه يونس ويماه تدعيلو
زهيرة: روح ربي يوفقك..
يونس: نشالله... راح يمشي لليسي ماشي بعيد بزااف ... كي دخل لفت النظر خاطر بروف جديد وزيد مزال صغير وضارب حطة وكلاس .. بداو فالنشيد قسما كملوه..مبعد راح يونس للقسم تاعو من زهرو عطاوه تارمينال خاطر ليسي جديد..
يونس: نتوما تقني رياضي ؟؟ قالولو ايه...
يونس: اطلعو .. طلعو يتغامزو عليه هذا هو بروف تاع الماات ؟!!
دخل يونس للقسم ودخلو لي يقراو عند و قعدو في بلايصهم.. داير يديه في جيبو يشوف فيهم حتى قعدو..
يونس: سلام عليكم ..معاكم الاستاذ يونس **** استاذ الرياضيات مدابيا تكونو متعاونين معايا باش تفهمو الدروس تاعكم متنساوش راكم تارمينال وعندكم باك السنة ..والرياضيات مادة اساسية يلزمكم التركيز باش تستوعبو الدروس... ...
بدا يونس يقدم فالحصة تاعو الاولى .. هو يكتب ويشرحلهم فالدرس ويفهم فيهم ...يلزم يفرض روحو ويقدم مليح باش على الاقل يترسم في اقرب وقت ويحكم البوست تاعو.. الطلاب مركزين معاه وعجبهم اسلوبو وحسوه صاحبهم بحكم صغر سنو ...يعني ارتاحولو اكثر ..يونس يفهمهم ويتعامل معاهم بابتسامة وعندو طريقة مميزة للشرح يبسط الامور تخلي الطالب يستوعب مليح الدرس.. ... شوية هاك هو يكتب والطلاب يكتبو موراه ..حتى جاتو طفلة قربعت فالباب..
ميساء: سمحلي استاذ معليش ندخل ؟؟ يونس قلب وجهو وشاف في ساعتو وهدر معاها بنبرة خشينة
يونس : حتى لدرك؟؟! قريب تخلاص الحصة!!
ميساء جات تهدر سكتها... يونس: ممنوع الدخول ..لحقتي متأخرة بزااف ...تعطيني اسمك ..
ميساء تحسرت: ميساء **** يونس ماركا اسمها غايبة ..
يونس: روحي درك منبعد جيبي بيي باش تدخلي ..
ميساء: سمحلي استاذ...ورجعت ..
يونس : نكملو الدرس..
حنان: استاذ ..معليش !!؟
يونس: تفضلي..
حنان: هادي ميساء جات جديدة جارتنا جدد...وبلاك تعطلت مع تسجيلات الدخول ..ماشي جات روتاار..
يونس بقا مستغرب حس بالذنب بلي ظلمها...تحسر كي سكتت وخرجت ومقاتلو والو..كان راح يبعث حنان تعيطلها منبعد فظل يروح هو خير .. ي
ونس:كملو..اكتبو درك نرجع... خرج يونس مالقسم..هبط يحوس عليها ..بقا يشوف منا ومنا ...حتى سمع صوت فالجاردان داخل ليسي... قرب حبس وبقا يشوف... ميساء مع وحدة ...صحبتها قاعدة وهي دايرة كيتمان وتسمع وتغني مع الغنية وتشطح معاها ..
_______________________________
حنان هبطت عند ميساء لقاتها فالادارة باش تجيب لبيي
حنان : ميسو مكلاه جيبي البيي البروف نحاك من الغياب..
ميسا: علاه نحاني؟؟
حنان: خاطر انا قتلو جيتي جديدة وبلاك كنتي مع التسجيلات !!
ميساء: حاوزني وبهدلني منبعد ينحيني من الغياب شغل مصرا والو !! نورمالمو كان يطلب مني السماح
حنان: هو كي قتلو خرج يحوس عليك وبلاك ملقاكش.
ميسا: منستحقش مزيتو انا نجيب البيي
حنان: دبري راسك انا نطلع درك يجي البروف تاع العربية سامط رهج..ونخاف يحاوزني..هيا بااي بااي
ميساء: درك نجي
حنان طلعت وميسا بقات تستنا يمدلها البيي..مدلها السارفايو البيي ..طلعت للكلاصة ودمدم ..تلاقات بيونس ...شافتو عوجت فمها وكملت تطلع..يونس شافها تبسم وقلبو ضرب بقوة مفهمش علاه...جازت قدامو عادي وهو في حالة..حبس وعيطلها ..
يونس: ااا ...مدموزال ..ميسا هكا!؟؟
حبست وشافت فيه : نعم استاذ ؟؟ !!
يونس بقا يشوف فيها هبطت جيهتو مستغربة..ميساء: كاشما احتجت استاذ ؟؟
يونس حشمان وهي مستغربة كانت تستنى فيه يطلب منها السماح على واش صار الصباح.. تبسمت ..
يونس: تبحرت..
ميسا مدهوشة: ااااه؟؟ يونس استغفر : تلفتلي الكلاصة رقم 35 وين جاية ؟؟ علوم تجريبية تارمينال
ميسا غلبها الضحك : هههههه
يونس قلب وجهو مي مقدر يقوللها والو ماهوش عارف حتى علاه
ميسا : اطلع للفوق ميسيو ايتاج لخر كاال اللخرة فالكولواار
يونس تبسم : يعطيك الصحة
ميسا : بلا مزية استاذ...
وبلاك يهربولك خاطر راح تلحق عندهم روتاار 😉 طلعت ميسا للتروازيام ايتاج ويونس للكاتريام ايتاج ولخر ...مشا كامل الكولوار ملقاش القسم 35
ميسا كانت موراه تبع فيه وتضحك عليه ميسا:هههههههخ والله نعاقبك على لي حاوزتني ونجريك...
يونس دار البلوك كامل ملقاهاش ..حتى سقسى قالولو هذا البلوك b راهي فالبلوك a نساو مكتوبلهكش بلاك ثم يقراو العلوم تجريبية.. عض على شفتو وعرف بلي ميسا تمسخرت بيه وخلفتهالو: صحا يا ميسا اشفايها
ميسو دخلت عند بروف العربية واعطاتو البيي..قعدت قدام حنان وتضحك..
حنان: شبيك ميسو؟؟
ميسو : هههههه ايما كرشي مانيش قادرة
حنان: اسكتي درك يحاوزنا .. ميسو سكتت وتمسح في عينيها مالدموع من كثرة الضحك..: كان شوفي هذا الزواخ البروف تاع المات...طلعتو حتى للفوق ونزلتو ..مسكين الليسي حرثو باش لقا القسم لي يقري فيه..
حنان: هههههه حرا م عليك مسكين ..
ميسو: يستاااهل
_________________________________________
لحقت العشية كمل يونس خدمتو ..هبط للدار عيان هذا اول نهار ليه تاع خدمة ...بلعقل باش يوالف... حط دوزانو دخل دوش وفطر
يونس: يما مجاش لطفي ؟؟
زهيرة: جا وراح يلعب ماتش..
يونس: ااااييه نسيت الماتش انا... وناض يجري يلبس ...
زهيرة: بووه عليك انا قلت تولي برووف تنسا البالون ..ونتا مزلت..!!
يونس خرج ويلبس فالسولي: اوااه البالون سبوور شبيك يما مليح للصحة..
زهيرة: ايه بلعقل برك حايد على روحك كاشما يقيسوك متقدرش تروح تقري..نتا بسيف باش صحتلك هنا قريبة
يونس: متخافيش ...هيا من بعد..
خرج يونس يجري بلعقل باش يهبط للستاد...تلاقا بعامر جاي من لافاك..
عامر: وااش الزعيم كاين ماتش اليوم ؟؟..
يونس: واش راك تشوف...اسمع متنحيش تليفوني من شارجورك شارجوري نحرق حتى نشري واحد..
عامر : ايه ..درك نجي نلعب ..
يونس: خف روحك برك. ... لحق يونس للستاد ..: وااش تلعبو بلا بيا ؟؟
فاروق: اهلا الصحبة قلنا مجيش تلعب خخخخخ ...لطفي حط يدو على كتفو ويضحك : واش دبرتلنا زلة كيما وصيتك ؟!
يونس: اودي روح تق** نتا والله...
فاروق: خخخخ اذا لقا هو ليه راهو هايل
يونس: خمو على رواحكم انا لقيت وكملت 😉
لطفي: يالزطشي في نهار دبرتها....اوااه انا الصباح رجلي على رجلك..
يونس: وين جي ؟! تبهدل بيا ...نحشم بيك شبيك هههههه
لطفي: قولي خفت نديلك الجمهور ..شوف الزين وين تبان نتا ويحك في لحيتو ويضحك..
يونس: اسكت اسكت تقول طاجين محروڨ..امشي نلعبو درك يجي عامر
بقاو يلعبو زاد لحق عامر ودارو فيها ماتش كيما العادة ...مع ولاد الحومة ....
______________________
سلااااااام لبنااات كيرااكم..؟؟
راني جبتلكم حكاية جديدة ماهيش من تأليفي..شفتها عجبتني و مام هي فيها بزااف صوالح تقدرو تستفادو منها
نشالله نكون عند حسن ظنكم..طشاااو _______________________❤____________________________
هلاااااو لبنات كي راكم؟؟؟
جبتلكم حكاية مهيش من تاليفي..شفتها عجبتني ومام فيها بزاف صوالح تقدرو تستفادو منها
ءنشاء الله تعجبكم تشاااو نتلاقاو فبارتي جديد
أنت تقرأ
القلب❤(باللهجة الجزائرية)
Romanceإذا ما بدت من أخيك لك زلة فكن أنت محتالاً لزلته عذراً، أحب الفتى ينفي الفواحش سمعه كأن به عن كل فاحشة وقراً، سليم دواعي الصدر لا باسط أذى ولا مانع خيراً، ولا قائل هجراً..
