القلب❤(باللهجة الجزائرية)

P.A.R.T 27

يونس دخل حكا مع ميسا على كامل واش صار ...ميسا غاضتها نورهان وعامر حتى بكات عليهم.

ميسا: والله لا بزااف عليهم...غاضوني ..يا ربي تفرحهم وتهنيهم...ويقدرو ينساو .

يونس: نشالله...والله قلبي راهو عند عامر حاس بيه وفاهمو .

ميسا: ربي نشالله يكون معاهم.

..

بعد يامات. .

عامر ديما يعيط لنورهان فلتليفون لي مدولها مي طافي مترفدش...

عامر : ارفدي عليا علاه هاك حابة تهبليني درك...زعما يكون فاقلها خوها ونحالها.

بقا يبعثلها لي ميساج ..ديما باش كي تفتحو تلقاهم وتقراهم.

نورهان ديما شادة روحها كيما وصاها يونس...محبتش تفتحو..مي صبرت بزااف مقدرتش توحشاتو لعامر.

فتحاتو...

لقات لي ميساج تاوعو ماشي وحدة ماشي زوج.

نورهان وينك ارفدي عليا .

نورهان توحشتك افهميني راح نهبل ونسمع صوتك..

وينك يانورهان فهميني واش صرالك.

بقات تقرا وتبكي ...منبعد رجعت طفاتو ورقدت ودموعها في عينيها..

كانت كل يوم تقرا واش يبعثلها وترجع طفيه..

حتى نهار قاللها ياترفديلي ياكشما ندير في روحي...

خافت وبعثتلو ميساج..

عامر غير شافو عيطلها.

عامر : هاذوين ؟؟؟ وين كنتي ؟؟ علاه محبيتيش تهدري معايا ؟؟؟

نورهان دموعها نازلين مي حبت تعفس على قلبها ..

نورهان؛ عامر افهم خلاص بيني وبينك.

عامر : ياعمري حابة تهبليني رح نهبل من جرتك.

نورهان : عامر نتا مزلت صغير وتلقا لي تنسيك وتحبك وتحطك في عينيها...انساني عامر وعيش حياتك..

عامر ؛ انا حابك نتي افهميني ..نورهان يا روحي افهميني يار** منقدرش بلا بيك...والفتك نتي ..توحشتك وتوحشت ريحتك..

نورهان قلبها يتقطع مي عافسة عليه.

نورهان: عامر شبيك ضعيف ؟؟! عامر نتا قوي ووالفت بيك ديما قاوي ...علاه راك ضعيف هاك؟؟؟

عامر : ضعيف قدام حبك ...راح نهبل يا عمري حرام عليهم يبعدوني عليك

نورهان مقدرتش تشد طرطقت بالبكا في وجهو

نورهان : انساني عامر راك تعذب في روحك وفيا..

خليني نعيش حياتي ...خليني ننساك..