عامر شاف في خاوتو : درك نروحو للبحر .
لطفي تبسم : هيا عمورة نبردو قلوبنا ونرجعو.
يونس: عامر راك مليح !!
عامر تبسم مع خوه مقدرش حتى يهدر....يونس حاس بلي عامر عافس على قلبو ..تنهد.. راح عامر وخاوتو وصاحبهم للبحر ..عامو وبردو قلبهم .. عامر يعوم ويضحك حاب يفرح لنورهان وينسا همو .. جوزو نهار كامل برا ...حابين يوقفو مع عامر وينسوه همو وغبينتو ... لحق اليل..الوقت باش يرجعو.. عامر شد بزااف بصح مقدرش ..وقف مقابل البحر وعيط على طول صوتو..
عامر : علاااااه ياااربي علاااه..
يونس تنهد..مقدرش يونس يتحمل ..شاف في لطفي
يونس: هيا نروحو.
عامر : مانيش حاب نروح نبقا هنا..
يونس قلبو وجعو مقدرش يبقا :لطفي ابقا معاه انا قلقت نروح مع الجماعة ونتا ابقا معاه متخليهش وحدو
لطفي : روح مهني راني هنا . راح يونس للدار وبقا عامر ولطفي .. دينا عيطتلو جبد روحو يهدر معاها
لطفي : وي دينا ؟؟
دينا : مزلت فالبحر ؟؟
لطفي : ايه راني مع عامر ..
شاف في عامر لقاه رايح.. : عااامر وين؟؟؟ عامر مجاوبوش...
لطفي : منبعد نعاودلك.
دينا: اوك. ...
راح لطفي مور خوه لقاه يمشي و رايح...لحقو : وين رايح عامر ؟؟
عامر : راسي راح يطرطق مانيش قادر راني مخنوق لطفي ..خوك مخنوق
لطفي : توالف عامر شد روحك شبيك ؟؟
عامر هبط راسو وكمل يمشي دخل لوحد البار ثما قريب للبحر.
لطفي : عمورة واش راح دير ؟!
عامر : اليوم برك لطفي ...مانيش قادر نحمل افهمني ..اليوم برك نوعدك ومتقولش ليونس
لطفي : بصح
عامر قاطعو : لطفي انا وراسك اليوم برك.
لطفي هبط عينيه حاس بوجيعتو لخوه.. دخل عامر وخرج رافد معاه قرعات ورجعو للبحر..
عامر يشرب ويسب ماشي موالف بيه
لطفي :عامر خطيك منو ارميه
عامر : ونتا قليل مشربت ؟؟
لطفي : كنت نشرب وحد الوقت منين ذاك مي حبستو ..
عامر يضحك ويغني في غنية تاع ديدين كلاش ويتمايل ويضحك : هههههه هيا هيااااا هيااا ماما كي يطيح اليل عرق شقا يسيل قوت الڨليل زوالي ياحليل خمم فلافونير لي ماسوفاش هنا يامن عاش صاحبي بون كوراج ..
منبعد لطفي شد يشرب معاه خاطر كان يشرب بالتخبية ساعات ...وولاو يشطحو ويغنو وحدهم ملقيت عليها وين ...البيبان ڨاع مقلعين .. نضريت انا هما هما رفدت عينيا للسما لقيتها عليا مظلمة من هذي الدنيا رشاتني ياما.. ..
عيطلهم يونس استبطاهم رفدلو لطفي كان صاحي شوي
يونس: وينكم مجوش ؟
سمع عامر يغني
يونس: شبيه خوك ؟؟
لطفي : ارواح كيما خليتنا خوك خبطها وانا تبعتو
يونس: تفووو يالبغل قتلك عس خوك خربتها معاه...هاني جاي ..
راح يونس ليهم لقاهم هكاك ضربهم وسبهم .. طلعو فالطونوبيل... عامر طريق كامل يدندن ولطفي غايس ويضحك .. ويونس يسب ...حتى لحقو للدار دخلو ترماو في فراشهم.. عامر حط راسو في مخداتو شاف البسي تاعو تفكر نورهان بلي تصاورها فيه ..وقف ودموعو في عينيه وهو ماهوش فايق واش راه يدير.. راح خبطو كسرو.
عامر: روووووحي اخطيني اخطي ق**** اووو ..
يونس : ارقد نعل الراسة تاعك غدوة تخلصوها نتا وابغل لوخر .. ارقد..
حط عامر راسو فالمخدة ويونس عند راسو يعس فيه..
عامر : يونس
يونس: وااااش؟؟
عامر: نورهان تزوجت تهنيت منها فلستني ...افليكسيلي ..شريلي كاوكاو ..شريلي هذي..
يونس : ايه تهنيت ارقد درك..
عامر يغمض عينيه ويرجع يحلهم.
عامر : بصح نحبها يونس ...علاه تزوجت .
يونس : اااه يا ربي ارقد
عامر : لطفي تزوج ولا مزال ؟
يونس : ارقد نعل راسة تاعو وراستك ارقد يرقد حسك..
غرق عامر فالنوم ماشي حاس بوالو فالوقت لي نورهان راهي في دار راجلها بعدما خلاص العرس
جازت الليلة هذيك...عامر راقد في سابع نومة شارب سكران ..القلب تتعو لي عشق نورهان مقدرش يتحمل فكرة انو تزوجت بغيرو واليوم راهي حلالو...
فالوقت هذا كان نورهان جوز في ليلة عمرها من فوق قلبها ...لكن جازت كيفها كيف اي طفلة... راجلها رقد تعبان مالعرس وهي مقدرتش كانت تبكي بااسكات متمنية كون جوزت الليلة مع عامر حبيبها مي الله غالب هذا مكتوب ربي وربي كتبلهم يتفرقو رغم لي حبو بعضاهم ....مي الحب مكفاش وديما المكتوب يغلب .. جازت ليلة هذيك ونورهان دموعها نازلين بلعقل ...منبعد استغفرت ..ومسحت عينيها ....عقلها عند عامر واش راهو يدير ...تفكرت كامل ياماتهم..ولي زاد قهرها كي شافتو يتبسم ويودع فيها .. ...
بعدها بايام عامر ديما يحاول ينسا نورهان مي صعيبة كلما يرقد يشوفها ويتخايلها .. في ليلة من ليالي طلع فوق دراهم حرق كامل تصوارهم وكامل واش يفكرو بيها ..حرق كلشي متحسر ...عمرو متوقع يوصل للحالة هذي ..مي الله غالب .. يبقا يشوف في بلاصتهم وين كانو يقعدو ..يشوف في دارهم..كيفاه كانت جي عند و ...تفكر كلشي ...دموعو نزلو بلا مايفيق...مسحهم وبقا يشوف فالنار لي تحرق في دوزانها ويحس فيها تحرق في قلبو...كل حاجة مدتهالو عندها ذكرى وقصة وحكاية.. غاب كلش وبقات غير الذكريات بحلوها ومرة ...عامر يلزم يتخلص من كلش يفكرو فيها باش ينساها ... تنهد ...ورجع كل يوم يطلع يسهر وحدو ثم ويتكيف ...كل ليلة يبقا وحدو سهران باش ينسا ..حتى وحد الليلة طلع يونس خوه يشوفو لقاه يتكيف.
يونس: عامر واش هذا لي في يدك ؟؟؟
عامر : هذا ل يعوضني فراقها .
يونس: ربي يهديك ياعامر ...ملقيت غير الدخان قدامك ؟؟؟
عامر ضحك: ههه ياريت كون جا ينفع فيا الضرب باش نبطلو كيما ضربتني كي كنت صغير...مي درك قلبي لي راهو مضروب...اضربني يونس بلاك نموت ونرتاح.
يونس: استغفر مولاك واش هذي الهدرة ؟؟
أنت تقرأ
القلب❤(باللهجة الجزائرية)
Romanceإذا ما بدت من أخيك لك زلة فكن أنت محتالاً لزلته عذراً، أحب الفتى ينفي الفواحش سمعه كأن به عن كل فاحشة وقراً، سليم دواعي الصدر لا باسط أذى ولا مانع خيراً، ولا قائل هجراً..
