جازو يامات ..فاميلة نورهان والجيران مخلاوهاش وحدها ..وقفو معاها وحاولو ينقصو عليها ..مي لي فالقلب فالقلب ..جازت سمانة نورهان مراحتش تقرا...حتى صحاباتها يجو لعندها وعاونوها كتبولها الدروس لي راحولها..عارفين حزينة ومقهورة على يماها وزاد جاتها حتى مع الباك تاعها ..
عامر النهار الرابع عيطلها رفدتلو بالتخبية...وتبكي مقدرتش حتى تهدر...كانت ساكتة غير سمعت صوتو طرطقت بالبكا
عامر هبل من مخو : نورهان خلاص عمري عيشك اسكتي ربي يرحمها ويصبرك...متبكيش بزااف عليها ..تعذبيها في قبرها..
نورهان مقدرتش حتى تهدر كانت حابة كون عامر راهو معاها يخفف عليها مي الله غالب....
مور السمانة هذيك رجعت نورهان تقرا والبنات مع الاساتذة يعزو فيها ...عامر راح يشوفها مقدرش توحشها ..
شافها مالبعيد..مقدرش يقرب ليها...عينيها حزان...عارف ماهيش محتاجة يحكي معاها برك..محتاجة يعنقها يخبيها عندو يصبرها يطمنها بلي راهو معاها ومحال يخليها ولا يسمح فيها..
لعشية كي رجعت راحو كامل فاميلتهم...دخلت بيتها وتحكي معاه تليفون..
عامر : حبيبي ريحتي؟؟؟
نورهان: ايه ...نقولو الحمد لله..هذي حال الدنيا
عامر : علابالي هذي يماك وعزيزة عليك...بصح متزيديش تبكي عليها ..تعذبيها في قبرها
نورهان : ايه عارفة
عامر : كون راكي عندي في داري ...نمسحلك دموعك ونخفف على عمري ...الله غالب سمحيلي مقدرتش نقرب ليك ..خفت عليك مالمشاكل
نورهان : علابالي ...عادي...راح ننسا مع الوقت...كيما يقولو الزمان يداوي لجراح
عامر : اليوم نشوفك...ياك راكي بايتة وحدك ؟؟؟
نورهان : ايه...عمتي حبت تقعد مي مخليتهاش...بصح راهي تسقسي فالتليفون
عامر : ايا مليح...المهم نشوفك ياك..
نورهان : نشالله....
فاليل حتى رقدو كامل وعيطلها عامر طلعت ليه..غير شافتو دموعها نزلو ...عامر جبدها عندو عنقها وهي مكبشة فيه وتبكي وهو خلاها في هواها ...يلعبلها بشعرها يسكت فيها...
خلاها بكات حتى شبعت منبعد شاف فيها..ومسلحها دموعها بصبعو ...
عامر : خلاص عمري ..يزي مالبكا ...ربي يرحمها
نورهان : نشالله ربي يرحمها..
عامر جبدها عندو وباسها من شعرها يهدن فيها..وهي ساكتة.
عامر : نورهان.
نورهان : اممم
عامر: اهبطي البرودة عليك..
نورهان : خليني عندك عامر ..هذاوين حسيت روحي ريحت..حتى شفتك...توحشتك عامر
عامر : كان شوفي انا...قريب هبلت عليك...وسيرتو كي عارفك مقهورة وحزينة...مي يلزم تهبطي ..تخافي يحوسو عليك...وديجا راهي البرودة...مانيش حابك تمرضي...متزيديش على مابيا..انا هاك وسمانة النوم ميجينيش كون تمرضيلي كيفاه ندير..
نورهان : اوك..هاني هابطة..
عامر شاف فيها وتبسم.: تاكلي كاوكاو ؟؟
نورهان تبسمت
عامر ضحك : هكا اضحكي ينعل بوه لي يزعفك..
جبدلها كاوكاو مدولها
نورهان : والله ما عيني ناكل
عامر : خبيه وقت لي تتوحشيني كولي منو يروح الوحش..ههه
نورهان عنقتو وزيرت عليه ومنبعد هبطت..
عامر تنهد حتى شافها باش حس روحو ريح.. هبط يرقد...نورهان رقدت ديراكت حتى هي لليوم باش رقدت مرتاحة حست بحنانتو لعامر لي ممكن تعوضها ولو شوي من غياب يماها
بعدها بايام ..نورهان بدات تنسى حزنها بلعقل ...عامر مخلاهاش ووكان ديما معاها يخفف عليها. ..مخلاهاش وحدها ولا خلاها تبكي ...كان ديما يحكو ويضحكو ...
نورهان تنسى همها وحزنها معاه..
رغم لي كانت في مشاكل مع مرت خوها مي كانت تخبي على عامر متحبش تحكيلو خاطر تعرفو مقلق وقادر يدير اي حاجة في جالها
ميسا ويونس عصافير الحب ...ميسا توجد للباك تاعها ويونس يعاون فيها وديما يحرص عليها ويفهمها ..
كانو عايشين اروع ايام حياتهم...
يونس : ميسو السنة نديك متقوليلي والو
ميسا: انا عقلي فالباك ونتا تحكيلي على العرس..منقدرش
يونس: امممم شدي في هذاك الخيط...انا السنا نديك..
ميسا: واش فيها اذا زدت صبرت عام ؟؟
يونس: وشنو ؟؟! عاام؟؟؟ مريضة نتي!!؟؟ والله نسرقك من داركم...
ميسا تضحك عليه.
يونس: الدار سامطة بلا بيك...راني نستنا وقتاش تكوني معايا وندخل للدار نلقاك تستقبليني والصباح نفتح عينيا نلقاك قدامي .وعينيك اخر حاجة نشوفهم قبل. مانرقد..حتى ونموت نموت شابع منهم
ميسا: بعيد الشر عليك...وشنو هذا الفال عليك.
يونس : هههههه علاه وكون نموت واش ديري ؟؟
ميسا: اعععع يونس اسكت يالسامط 😢
يونس : نورمال تفرحي تتهناي مني
مبسا : علاه نتهنى منك ..يونس علاه هاك..ياك علابالك نحبك منحبش هذي الهدرة
يونس: تحبيني ؟؟
ميسا: اممم
يونس: انا نعشق فيك..مهبولتي..جيبي الباك برك وشوفي نديرلك عرس سبع ايام وسبع ليالي هههههه
ميسا: هههههه بزااف عليا
يونس: ماشي خسارة في عمري ..نتزوجو مرة وحدة ماشي عشرة
ميسا: صح ههه
لطفي يحكي مع دينا
لطفي : دينوشة ياكشرودة حياتي يالي كشردتيلي حياتي وخلطتيهالي ..واش ماامشطة تسلكها
دينا : هههههه هذا شعر ولا رومنسية ولا خليني ههه
لطفي : نزيدلك؟؟
دينا : اممم هههههه زيد نشوف
لطفي: دينا يالمسمومة...سمك بوشالي العروق ...خلاني مخنوق...اعطيني نشرب الترياق...وهو كلمة نحبك باه نفيق. .
هههههه
دينا : هههههه شوف اسيدي
لطفي: خسارة فيا كلمة نحبك...قولي ياللفعى تاعي...
ااهخخخخ راح نمووت قوليها ..
دينا : نح.....
لطفي : كملي ..
دينا : زيدلي وحدة شوكبستانية تقتل هههههه
لطفي: نزيدلك شوكبستانية ؟؟
دينا : ايه ههه
لطفي كوبالها وطفا تليفون
لطفي:هاو الشوكبستاني لا يحلب...ايا ق***
دينا تضحك عليه : هههههه لطفي شوكبستاني اوريجينال ههههه
جازو يامات لحقت العطلة تاع الربيع....لطفي فرحان كي راح يديلها الخاتم لدينا
كانو قاعدين يحكو فاليل الخاوة مع يماهم...عامر ويونس ..قاعدين يحكو ويضحكو...طلعو فوق لتيراس وقاعدين يستانو في لطفي راح يجيب طونوبيل..
زهيرة : معليش نفوتو فالطونوبيل ويكمل بنيانو بعقلو..ونتا يونس كي تخلص على جيه دير الدالة ..ومنبعد جيب طونوبيل
يونس : نشالله يما نشالله..
عامر : خخخخخ راني حاس روحي في فيلم عثمان عريوات
يونس: وينك يالطفي جيب الكروسة شبعنا برد...زهيرة امشي نهبطو
زهيرة: نبقا هنا حتى نشوف وليدي بالكروسة..ونروح نحوس فيها انا الاولى
يونس:تروحي للسوق ههخخخ
زهيرة: اذا كاين نروح علاه لالا...ديجا راهم خاصين حاجات للفيونساي تاع لطفي ..نجيبهم على جيه..عييت مالترونسبور..
عامر : خخخخخخ كيما قالها عثمان عريوات سوق مك يفتح فاليل خههه
يونس وعامر شابعين ضحك.
زهيرة: امشي يذهب لي يذهبك..درق وجهك عليا..هذيك بكري درك كاين ..
بقاو يشوفو حتى لحق لطفي صونا عند بابهم...زهيرة شافتو فرحت..
بقات تزغرت بلعقل..متقدرش تزغرت فوور.
زهيرة: يوووووووو...فرحي سعدي بوليدي..
خاوتو هبطو يبوركولو ويضحكو..
عامر : صحاا لطفي صحااا....تسلفهانا نظربو تورة
لطفي : ايه وعلاه لالا هههخ
يونس: بصح انا نسوق...عندي مدة مسقتش
لطفي: علاه نتا وقتاش. سقت ؟؟؟
عامر : كهكهكهكه من عام البرويطة هخخخخ
لحقت زهيرة رافدة حجرات سكر وترمي فوق الطونوبيل..
لطفي: يمااا تكسريلي الزجاج 😭
زهيرة: اسكت ...هذي فال مليح تبعد العين..
يونس غمز عامر وشاف في زهيرة ..
يونس: لطفي يماك قاتلك ديني للسوڨ
لطفي : اااه؟؟! عثمان عريوات لحق ..
زهيرة : بووه عليكم مكاش لي يضحك معاكم...
لطفي : ماشي خسارة في زهيرة ...امشي نضربو تحويسة
طلعو كامل يونس ولطفي مالقدام وعامر ويماه ماللور
يونس بسوق
لطفي : يونس رد بالك عندك مدة مسقتش..
يونس: نورمال نترودا
زهيرة: بلعقل راك تجري ..
يونس : راني بلعقل يا يما...وين نديكم.؟؟
زهيرة : اديني عندك عمتك نزوخ عليها
عامر : نهبطو للبحر.
لطفي : بحر فالبرد هذا ؟؟؟
يونس :😑😑😑
لطفي : زهيرة رايحة عروسة...راكبة فالكروسة .. نزوجوها بعمي عيسى ...لي يحرس فالمدرسة...
بقاو يغنو ويضحكو ..وزهيرة تسب فيهم.
زهيرة : بووه على سعدي يبردلكم ذك الوجه رجعوني للدار..خصي غير عيسى الشايب ..
عامر : خخخخخخخخ علاه معجبكش
زهيرة: يبرد وجهكم ويسود حلايسكم...رجعوني
أنت تقرأ
القلب❤(باللهجة الجزائرية)
Romanceإذا ما بدت من أخيك لك زلة فكن أنت محتالاً لزلته عذراً، أحب الفتى ينفي الفواحش سمعه كأن به عن كل فاحشة وقراً، سليم دواعي الصدر لا باسط أذى ولا مانع خيراً، ولا قائل هجراً..
