طلعت من الغرفه العب معهم وبدينا
اللعب ودخلت حماس باللعبه
وبعد مرور وقت باللعبه كانت طيف تلحقني حتى تمسكني
كنت اركض بالصاله للي قدام غرفتي كنت اركض بحماس
والحيوانه طيف سريعه كثير ومن كثر الحماس بدون وعي توجهت للدرج وتزحلقت على الدرابزين
ومع ذلك هالزفته طيف نزلت على الدرج تلحقني
وصلت قبلها لتحت وبسرعة توجهت خلف الدرج
وهي تلحقني
وبعدها ركضت على المطبخ وانا خلاص تعبت ما اقدراتحمل ركض اكثر
تخبيت تحت الطاوله بالمطبخ
ارتاح شوي واريح جسمي كنت اتنفس بسرعة وقلبي يدق بسرعه
وبعد خمس دقايق دخلت طيف المطبخ كنت مرتاحه شوي ونفسي رجع طبيعي تقريبا
خليتها حتى اعطتني ظهرها وبسرعه طلعت من المطبخ وانا اركض
ومن كثر الحماس كنت ازاعق
دخلت غرفه استقبال الحريم ووصلت لنص الغرفه وانا اناظر خلفي وازاعق
بعدها وقفت وناظرت امامي وانصدمت وانا اشوف عندنا ضيوف
وللاسف مو اي ضيوف
ناظرت نفسي كنت لابسه بلوزه باكمام طويله لونها اسوده ماسكه على جسمي (بدي)
وشباح جينز ازرق وكمان ضيق
وشعري هنا المشكله رابطه قرون وحاطه شبره لونها ابيض
كنت واقفة ومتصنمه دخلت طيف من خلفي وهي تضحك ومسكتني وبصراخ : مسكتك مسكتك
ناظرتنا جدتي وبحده : ريم طيف
كنت ودي انزل وادبك واقول طار العريس طار العريس
يخلف علي وعلى حظي ....وداعا إلى اللقاء يا عريس الغفلة <فيس يبكي
بس لااااااااااا مستحيل استسلم واطير العريس من يدي
اخذت نفس وبابتسامه : هلا والله بخالتي ام زياد وانا اقول البيت منور
وتقدمت منها وبوستها على راسها وجلست مقابلها وانا اهلي وارحب بها
وبعدها ناظرت طيف : خلص روحي عند البزران
وبعدها ناظرت ام زياد وانا ابتسم : تعرفين اطفال صغار وجدي ما يخليهم يطلعون يلعبون برا فحبيت افرحهم والعب معهم وحتى اكون قريبه منهم لبست وعملت كذا بنفسي وابتسمت بغباء
ناظرت جدتي وهي متفشله مني وتناظرني بحده
ابتسمت ام زياد مجامله : اخبارك يا ريم ؟؟
ناظرتها وانا ابتسم : بخير الحمد لله
ردت ام زياد : اسفين زرناكم بدون موعد
ناظرتها وانا ادلع : لا عادي يا خالتي البيت بيتكم وبأي وقت تشرفينا
دخلت الخدامه ومعها العصير وقفت بسرعة حتى اظهر قدامها اني سنعه وتناولت من الخدامه صينيه العصير
ام زياد :خلص لا تتعبي حالك
قدمت لها العصير : تعبك راحه يا خالتي انا اخدمك بعيوني وبنفسي كنت اقول كله علشان عريس الغفلة :)
وبعدها قدمت لجدتي وهي تهمس لي علشان ابدل ملابسي طنشت لانه خلص شافتني وانتهى الأمر
وحطيت صينيه العصير وجلست مكاني
ناظرتني ام زياد نظره ناقده : وكيف دراستك ؟؟
ابتسمت : الحمد لله
دخلت الغرفه ام خالد وقفت وانا اهلي بها : هلا هلا خالتي تعالي اجلسي اعرفك على خالتي ام زياد
ناظرتني ام خالد وهي تقرص عيونها بمعنى من متى الاحترام بس سلكت لي
تقدمت وسلمت على ام زياد وبعدها جلست
ودخلوا مع بعض سوالف مع انه جدتي وام خالد ماخذين موقف منها علشان المشكلة للي صارت
أنت تقرأ
طفولتي المشتته
Mystery / Thrillerباختصار الرواية تحكي عن بنت ضاعت بين امها وابوها وهم ما متقبلينها لانو والد ريم تزوج امها عن طريق الانتقام وكانت بين الاسرتين عداوة قديمة ما تعرفها والدة ريم وبعد انجاب ريم الاب طلق زوجته وعاشت ريم طفولة مشتته #الروايه ليست من تأليفي✨
