طفولتي المشتته

الفصل 54

يوم الثلاثاء

كانت واقفه بالمطبخ وتناظر بعجز بعد ما ايقضها
خالد تجهز الفطور
زفرت ريم بضجر وتمنت لو ما رجعوا البارحه من الشاليه
كان كانت الحين مرتاحة مو قايمه
تجهز فطور
لها اكثر من خمس دقايق بالمطبخ بس واقفه
مو عارفه من وين تبدأ
مدت بوزها وتوجهت للثلاجه وتتريق بنفسها وهي تقلد بخالد : اعملي توست بس ما تغلبي حالك بفطور بس توست
اقول روح يا شيخ الخدم تارسين البيت واقوم من الصبح اعمل فطور
قال عروس يقطع حظي المفروض الحين اكون مسافره
شهر عسل
اخخخخخ مالت على حظي
شهر بصل
وعضت على شفتها بقهر
صارت تجهز الفطور وبعدها جهزت القهوه والحليب
رتبتبهم على الطاوله
وجلست تستريح وهي تناظر السفره بفخر
حست نفسها انجزت شي كثير
بعد دقايق وقفت وتلاشت فرحتها
لما تذكرت تنظيف المطبخ
طلعت من المطبخ بضيق وتوجهت للصاله
كان جالس ومصعب وطيف يلعبون حوله
وهو يلاعبهم ومبسوط عالاخير
ناظرتهم بغيره تحس الغيره تاكل قلبها
لما تشوف اهتمامه بعياله يذكرها بنايف
واهتمامه بإخوانها وهي ولا كأنها موجوده
تذكر نايف يضحك مع اخوانها و يلاعبهم ويشتري لهم ما يحرمهم
من شي يطلعهم يغيرون جو
وهي مثل الجدار ما لها وجود في حياة نايف
غمضت عيونها وهي تتذكر بصغرها كانت تتمنى
ابوها عايش علشان يضرب نايف وياخذها معه
ويدلعها ويلعبها ويشتري لها كل شي بنفسها
ما كانت تدري انه ما في مفر من نايف
لانه طلع ابوها
كان ولا زال ابوها بالاسم ما حست بحنانه
ما حست بالاهتمام
لما تناظره ما تحصل الا نظرات الكره والحقد والاحتقار
والاشمئزاز
فتحت عيونها وهي تقارن
خالد كان بينه وبين زوجته مشاكل ومتفقين على الطلاق
بس ما تشوفه يكره عياله بالعكس تحس ما عنده بالدنيا
الا عياله وما يسمح لاحد يمسهم بسوء ولو بكلمه
اما نايف طلق امها بس ما عاملها
مثل ما خالد يعامل عياله !!!
ليه وش يفرقون عنها طيف ومصعب
ما حد يزعلهم !!
مع انهم اهل ابوها ما يحبون كاترين بس ما حقدوا على عيالها !!
طيب هي وش تفرق عنهم اهل ابوها ما يحبون امها
بس كلهم يكرهونها ويحقدون عليها
ليه يفرقون ليه ؟؟؟
حرموها من كل شي
بس ما تشوف الحرمان بعيون طيف ومصعب !!
ما تشوفهم رموهم هنا وهناك !!
ليه هي رموها وكأنها شي مقزز ودهم يتخلصون منها
ليه ؟؟؟!!
غمضت عيونها بقوه متألمه نفسيا منهم
وش الذنب للي اقترفته حتى يعاقبوها عليه ؟؟؟!!
بلعت غصتها
وفتحت عيونها بألم
وناظرت خالد وعياله والسعاده ما تفارقهم
حست بالعبره خانقيتها
انتبه خالد على وجودها
ناظرها خالد بابتسامة : الفطور جاهز ؟؟؟
هزت ريم راسها بالموافقة بدون اي كلمه
ما تقدر تنطق حرف واحد لانها ما تضمن نفسها
تدخل بنوبه بكاء تحكي كل جروحها واحزانها للي
دفنتها بقلبها
ما تقدر تنطق حتى ما تسمح للبكاء يظهر ضعفها
لانها خلاص قررت ما تبكي وتنسى كل الماضي
الماضي للي كسرها وذلها وحرمها من كل شي
تمنته
وقف خالد وهو يمسك يد طيف وباليد الثانيه
مصعب : يالله يا حلوين الفطور جاهز
تقدمتهم ريم ودخلت المطبخ وجلست بهدوء
دخل خالد وهو يردد : خلص يا طيف الحين ازعل منك
ردت طيف وابتسامتها العريضه وبطريقه طفوليه
تجذبك لتناظرها : توبه توبه ما اعيدها
حملها خالد بفرح وباسها على خدها : ربي ما يحرمني منك ويخليك لي يا اجمل طيف
بالدنيا كلها
ناظرته طيف والسعاده تغمرها وكأنها حصلت
على سعاده الدنيا كلها من كلام ابوها
لكن بنفس الوقت كان كلامه سهم اخترق قلب
ريم ليجعل قلبها
ينزف الما
وهي تتذكر كلام نايف