طفولتي المشتته

الفصل 80

قاطعه بسرعه واشر بعيونه : شوف ذيك البنت ؟؟
طالع نايف مكان ما اشر له وعقد حواجبه وبداخله
نار وبتردد : علامها ؟؟
رد بثقه : هذي البنت للي كان يبغى يخطفها الرجال
وساعدتها
بهتت ملامح نايف فقد احاسيسه وهو يناظر جهة البنت
ويحس كأن المكان فاضي ما فيه
احد الا هو وهذي البنت
كان يكلمه بس نايف ما كان يسمعه
كل شيء فيه تعطل مو قادر يستوعب الصدمه
وكأنه الزمن توقف لعده دقائق
هز كتف نايف باستغراب وهو يشوفه يناظر جهة البنت : وش فيه ؟؟؟
رفع نايف نظره له واخذ نفس يخفف من البركان للي بداخله
ما يبغى يفضح نفسه بزياده
طالعه وهو يكتم عصبيته : ما في شي
تذكرت ملف ازرق ضروري على مكتبي
اذا تقدر تجيبه لي
هز راسه وهو حاس فيه شيء : ان شاء الله
دقائق وارجع لك
وغادر المكان
شد نايف على قبضة يده بقهر وهو يحس
اعلام الفضيحه ترفرف
مو متخيل اذا حد عرف
بالموضوع
وش رح تكون سمعتهم ؟؟؟
ما خلص من سالفه الزواج تطلع له الحين
سالفه الخطف
عض شفته بقهر
ما عنده وقت للتحليل اهم شيء عنده يطلع الحين
من هذا المكان بدون فضايح وبعدها يحل الموضوع
بطريقته
توجه لجهة ريم للي ما في غيرها بالانتظار مثل البركان رح ينفجر بأي وقت وهو متحلف لها

ريم
كنت جالسه بالانتظار احس بالملل من الانتظار
كانت يدي بحضني واناظرهم
زفرت بضجر من الملل
تركني هنا وراح ما رجع
تأففت ورفعت راسي
ويا ليتني ما رفعته
كان نايف متجه لجهتي وملامحه ما تبشر بخير
انا اكثر وحده اعرفه خبرة سنوات
لما يكون شكله كذا
فهذا ينذر بوقوع مصيبه كارثه دمار شامل
الله يستر
وقف عندي ومسك يدي بطريقه للناظر هاديه
بس مسكت يده وهو شاد على معصمي بقوه
اكدت شكوكي
رفعت نظري له بتساؤل حتى اعرف وش فيه
اعطاني نظرات ناريه و تكلم من بين اسنانه : امشي معي بسرعه
وما اعطاني فرصه اتكلم
وسحبني خارج المستشفى
للي يشوفنا يقول يا الله الظاهر يحبها وخايف عليها
ماسكها بيدها بهذا الشكل
ما يدرون اني احس انه فك يدي من قوه قبضته
حاولت اخفف من قبضه يده بس ما في
فايده
حسيت بدموعي على وشك النزول من الوجع
وانا مستغربه ما عالجني ولا عمل شيء
رجع وحاله مقلوب وش فيه ؟؟؟!!
وصلنا عند السياره نفض يدي بقوه وبعصبيه : اركبي
طالعته باستغراب : وش فيه
تكلم من بين اسنانه : لك وجه تسألين بعد سواد
وجهك
اركبي قبل ما ادفنك هنا
طالعته وما عجبني كلامه انا مو مثل النعجه
يسحبني خلفه تكلمت بصوت واثق من نفسه وبهدوء : ما رح اركب قبل ما اعرف وش فيه
اقترب من ناحيتي وفتح الباب وبفحيح : ريم
ترى ثواني انفجر فيك اطلعي احسن لك وبالبيت
اتفاهم معك
دفعني للسياره بقوه ودخلني غصب عني
وحرك بسرعه وانا تحت اندهاشي
وش للي صار حتى خلاه كذا

نواف وهو يسترخي على الكنبه بمكتب سليمان بغرور
سليمان كش عليه : مالت عليك
اصلا ما حد رح يقبل يعطيك بنته
وتكلم وهو يقلد نواف : ما لقيت وحده بالمواصفات للي ابغاها
نواف نهض نفسه وبغرور : للي رح اتزوجها رح تكون غير عن الكل
صقر وهو جالس مقابل نواف : وش رايك تفصل
تفصيل احسن لك
نواف ابتسم : فكره حلوه
سليمان : اصلا عقاب لك لازم نزوجك ريم
قاطعه صقر بحده : سليمان
طالعه سليمان باستغراب : وش فيه ؟؟؟
صقر بجديه : رجاء تجلس تتمسخر على ريم ما اسمح لك
سليمان طالعه بنص عين : ذيك المره كنت تتريق
عليها وهي عبود لو تزوجوا وش فرق الحين
قاطعه صقر : الفرق اني بعد ما شفت البنت غيرت نظرتي
البنت كبيره مو صغيره
وبعدين انا لما تكلمت كان كل ذهني صوره ريم
الصغيره
فاحفظ لسانك واحترم عمك نايف مهما كان
تبقى بنته
سليمان مو عاجبه : خلاص
اعوذ بالله اكلتني
نواف ضحك : ههههههههه تستاهل
انقهر سليمان وضربه بالقلم على راسه