قصص دينيه وعبرة(2)

اسئلتهم عن ربنا

-ماما...لو ربنا بيحبنا ليه بيموتنا؟😓😓
=ممم.....هو لو كنا مسافرين في أحسن عربية أو قطر أو حتي طيارة.....
هاتتمني توصل بالسلامة واللا تتمني تقعد طول الوقت في الطريق؟🤔
-هاتمني أوصل
=حتي لو كان الطريق جميل أوي؟
-حتي لو كان الطريق جميل أوي
=حتي لو كان الأكل في الرحلة حلو جدا؟
-حتي لو كان الأكل في الرحلة حلو جدا
=حتي لو كان الناس اللي معاك في الطريق مريحين أوي؟
-حتي لو كان الناس اللي معايا في الطريق مريحين

=الفكرة بقي إن الدنيا دي زي الطريق اللي ماشين فيه لحد ما نوصل لبيتنا الحقيقي...
اللي هو فين؟
-في الجنة إن شاء الله.

=فالطريق لازم يخلص والرحلة لازم تنتهي⁦🤷‍♀️⁩
وهناك أن شاء الله نستمتع وننبسط ونتجمع مع حبايبنا ونعمل اللي نفسنا فيه🤩

-بس أنا باحب أصحابي ومش عاوز أسيبهم🥺
=مين قال إنك هاتسيبهم أنت هاتفضل معاهم في الدنيا بتونسوا بعض وتعبدوا ربنا مع بعض
وفي الآخرة تتقابلوا في الجنة إن شاء الله🥰
-ولو سيبتهم أقعد في الجنة لوحدي😔
=لا طبعا نقعد مع أهل الجنة اللي هما أحسن من كل الناس اللي في الدنيا
ونتونس بيهم
-بس أنت لو موتي هاتوحشيني
😅😅
=بص أنا الحمد لله جنبك دلوقتي..خليك في دلوقتي وأحمد ربنا
وما تشغلش بالك باللي جاي
وممكن تدعي إن ربنا يحفظني ليك وأفضل جنبك لحد ما تكبر😍

-طب لو موتي وانا صغير؟
=😁😁
لو مت خليك عارف إن ربنا أرحم بيك مني وإن ربنا لو عمل حاجة يبقي هي الخير لينا
أنت عارف إن النبي كان يتيم الأب والأم
-أيوه
=التحدي إنك تقدر تواصل في الحياة وتعرف أنها زي الكوبري اللي بنعدي عليه عشان نروح بيتنا الحقيقي
-بس الموت صعب أوي
=الموت صعب علي اللي مش بيعبد ربنا ولا بيسمع كلامه
والموت راحة للي بيحب ربنا وبيسمع كلامه
-إزاي؟
=بص ممكن أبقي أحكي لك علي ملايكة الرحمة بيعملوا إيه مع المؤمن لما يموت

أحب أعرف رأيكم في الحوار السابق😊
واتمني تشاركونا أكتر أسئلة متكررة عن ربنا سألوها وعملتوا إيه في إجاباتها
#وما_أبرئ_نفسي
#أسئلتهم_عن_ربنا