متلازمة عائلتي (رواية ليبية)

الحلقة 1

سلمى : ماما خوتي ناضو ؟
خديجة : ايه ناضو تعالي ديري معاي الفطور هيا شوية و يجو يفطرو مرت خوك مسكرة راسها حتى اليوم ما جتش عاونتنا
سلمى : فوتيها يما ماك عارفتها من امس مريضة
خديجة : حتى انا فايتتها اهو

وبدو يستفوا في طاولة الفطور في الكوجينة على جيت علاء

علاء : صباح الخير
سلمى : صباح النور هيا قعمز
خديجة : وينها مرتك قاعدة مريضة ولا شنو ؟
علاء : متحسنة .. شوية و تنزل

و على دخلتها

نسرين : صباح الخير
خديجة : وين شمسك عالية حتى المرض ما تبانيش مريضة
نسرين مشت قعمزت جنب راجلها بدون ما تقول شي وهي مش معبرة خديجة بكل

ويجو الشباب علي كمال و نديم

خديجة : و اخيرا جيتو .. نديم تعالى قعمز هنا طبخلتك الدحي متعك كيف ما تحبه نص طياب
علاء : الله غالب عليا انا و علي كمال
خديجة : انت عندك مراتك تدلعك اونه كان بدلع
علاء : باهي و علي كمال شن مش ولدك حتى هو ولا شنو
تتلخبط خديجة و علي كمال يشبحلها
خديجة : ايح علينا عاد ماهو نديم عارفينه ما ياكلش الدحي طايب هلبا

نديم : ياسركم غيرة عاد
سلمى : انا ندلل خوي عليوة ما تعدلش عليهم
ابتسم علي كمال ابتسامة خفيفة و ناضت سلمى قربتله الخبزة و صبتله الشاهي
علي كمال : خلاص قعمزي افطري .. بوي وينه خيره عطل ؟
خديجة : بوك نايض من بكري فطر و مشي للسوق يبضع للعشاء اليوم
نديم : علاش شن في ؟ علاش العشاء ؟
سلمى : طبعا انت ديما اخر من يعلم .. مش بوك عازم عيلت عمك خالد و عماتك الزوز فاطمة و رقية و عيلة خالك رمضان
نديم : علاش شن المناسبة ؟
خديجة : ماك عارفه بوك مرة في السنة ضروري يديرها العزمة هادي لوجه الله
نسرين بصوت واطي : ماهو ناقصنا شقى و هم
علاء : اسكتي
خديجة : نسرين خيره صوتك شكله مبحوح لان ما نسمعوش فيك شن تقولي
نسرين : لا تكلمت بالشوية اصلا .. نقول في حاجة خاصة لراجلي ماهو

طبعا ديما هما الزوز كلامهم بالقصف على بعضهم ما يبطلش

على كمال ناض : بنمشي الكلية عندي محاضرة بنعطيها نكمل مع ال12 توصوني على حاجة نجيبها معاي ؟
سلمى : ايه بالله جيبلنا انت الشكلاطة و الحلويات بوي ما يعرفش هلبا في الحاجات هادي
علي كمال : باهي حاضر .. هيا يا شباب ما شبعتوش قاعدين ؟
نديم : يلا هي .. علاء هيا بالك بنمشي معاك سيارتي تبي باطنيات
علاء : تمام .. نسرين تبي حاجة ؟ كان تعبتي كلميني
خديجة : وعلاش تكلم فيك اللطف واحنا هنا شن نديرو .. تنوض تعصر على راسها ليمة قارصة يبدا ما فيها شي
نسرين : سلم راجلي حاضر تو نكلمك ..

و طلعوا الشباب قدام الحوش

علي كمال : ما تعطلوش بعدين في الشركة .. تو مرات يجي خالكم رمضان عارفيني ما نتحابش انا وياه
علاء : خالك هذا .. شن ما تتحابش انت وياه هادي ؟
نديم : خلاص يا علي كمال تم .. كان ما ساندتش خوي امالا من بنساند وبيجي حتى ولد عمكم وليد الدراه الكبد
علي كمال : شفت كيف يا علاء هههه
علاء : هو هذا انتم اصلا ديما واقفين مع بعض ههههه