معليشي عطلت شوية ..
عارفين الظروف هروب ضي و امتحانات جامعة اخر سنة
....
بارت طويل شوية
قراءة ممتعة
#متلازمة_عائلتي
................................
يأشر علي كمال لندى و يحط صبعه على فمه بمعنى بلا صوت
و يثني ركابه و ينزل بيفك الحبل و هي تشوفله و لكن في لحظة يلقى مسدس موجه على راسه من الخلف و يرفع يديه على طول !
.......
في المستشفى خليفة بو ندى بدي ينشغل يتصل بندى وما تردش و يتصل بمروان بعد كمشة اتصالات و يرد
خليفة : ألوو وينكم ؟ خيركم ما تردوش ؟
مروان : ايوا يا عمي .. ندى مش معاكم ؟
خليفة : كيف ؟ شن تقول مش قلتلك فوت روح بيها !
مروان : وصلت للكلية توا ما لقيتهاش .. الحق انا عطلت راحت فيا نومة سامحني يا عمي
خليفة : غير شن تقول انت .. ندى وين مشت ؟
مروان : مش عارف
و فجأة يجي لخليفة رقم غريب
خليفة : غير صكر توا ( و يرد)
خليفة : ألو .. أيوا
الراجل : عمي خليفة شن حالك !
خليفة : ايوا من معاي ؟
الراجل : كيف ما عرفتنيش ؟ حمزة أنا !
خليفة : بالله عليك فكني مش فاضيلك توا .. فلوسك تو يوصلوك وقت ما نحصلهم !
حمزة (بإستهزاء) : لكن انا نبي فلوسي اليوم .. كيف يصير ؟
خليفة (بعصبية) : ما عنديش توا .. دفعتهم للمستشفى وتوا خليني عندي ستين موضوع في راسي
و كيف بيصكر
حمزة : خلاص امالا بنتك ندى تقعد ضيفة عندنا لعند ما تحصل الفلوس
خليفة ينصدم من كلامه
خليفة : شن تقول انت ؟ ندى وين ؟
حمزة (بكل برود) : خطفتها
خليفة : كذاب .. انت كذاب
حمزة : موضوعك تبي تصدق ما تبيش بلاش .. و كان نكذب وينها بنتك خيرها ما روحتش لتوا ؟
خليفة (و الدموع في عيونه) : اسمع اسمع بالله عليك خليها تمشي في حالها موضوعك معاي انا .. انا نجيك وخليها هي تروح بالله عليك
حمزة : لا لا .. عندي ما ندير بيك انت .. انت وظيفتك ادبر الفلوس و تجيبهملي
خليفة : والله اليوم صاعب من وين بنحصلهم .. بالله عليك قولي وين انت خلي نروح ببنتي أمها في العملية بين الحياة و الموت
حمزة : مش موضوعي .. هيا سلامتك توا عمي خليفة .. وقت تحصل الفلوس اتصل بيا .. و ها قبل ما نصكر الشرطة ولا الردع ممنوووع تلقى بنتك على طول للقبر كان هذا .. الفلوس بس يلي يرجعولك بنتك (و يصكر المكالمة و يصكر حتى الهاتف )
خليفة : الوو الوو ( و يعاود يتصل يلقاه مصكر و تصغر بيه الدنيا)
خليفة : من بنكلم و من بيعطيني 30 ألف الديون كثروا عليا و هلبا ناس تبي مني .. من منوا بنطلب .. يا رب تسااعدني ما لياش غيرك
.......
.........
يحط حمزة النقال في جيبه و يدخل الداخل للمستودع .. يلقى علي كمال واقف على جنب و المسدس على راسه و ندى الدموع ينزلوا منها وخلاص
أنت تقرأ
متلازمة عائلتي (رواية ليبية)
Fanfictionمفيش انسان معصوم من الأخطاء مفيش انسان كامل .. بعيدا عن روايات المراهقين رواية ليبية واقعية ممزوجة بالخيال مشوقة رواية تحكي عن العائلة و مشاكل العائلة و اسرارها والحب في حياة كل شخص فيها شخصيات مميزة و احداث قوية ..
