#متلازمة_عائلتي
#الحلقة 18 و الأخيرة
قــراءة مـمـتـعـة
ــــــــــــــــــــــــــــــــ
قبل نص ساعة
فتحي (بصوت عالي) : خلاااص عاد .. اللي نديره انا و اللي نقوله هو اللي بيمشي ع الكل و انت يا نديم تمشي توا تروح بمرتك
نديم : مش المرة هادي يا بوي .. سمعت كلامك بما فيه الكفاية و شفتوا اللي صار و شن اللي درتوه فيا
فتحي : لو ما ترجعش مرتك مش حنسامحك لا دنيا ولا اخرة اهو قلتلك
علي كمال : خلاص يا بوي خلاص .. معش تاخد قرارات من راسك و تخلي فينا في مشاكل بين بعض . كل اللي صار فينا من البداية لعند توا بسببك انت .. تفرض رايك على نديم تاخد حق علاء و ترفع ايدك عليا و تضربني بدون ما تسمعني ولا تخليني نتكلم
يسخن علي كمال في الكلام و يبدا يطلع اللي في قلبه
علي كمال : بالك تسحابني نسيت الكف اللي عطيتهولي قدام العيلة كلها بسبب كلمتين من ولدك علاء و صدقتهم .. في حياتي مش حنسامحك عليه الكف يا بوي
علاء : انت قاعد حاط الموضوع في بالك لتوا ؟ .. شوف احنا وين وانت وين ؟ نتكلم على حقي هنا مش وقت مواضيعك الصبيانية الزايدة
نديم : طبعا انت ديما مصلحتك قبل كل شي .. في جرتك انت خليت في مشاكل بيني وبين علي كمال
علاء : انا يومها قلت اللي سمعته لكن انت واضح عليك مش واثق لا في خوك علي كمال و لا في مرتك
يتعصب نديم من كلامه و يشد روحه بالسيف
علاء : و طبعا كالعادة انت الزوز ديما في طرف واحد ضدي طول عمركم هكي مش حتتغيروا
و تكثر الدوة بين فتحي و أولاده
فتحي : خلاص صكر فمك انت وياه .. و احترموني حتى انا قدامكم يلي ما تتحشموش .. انا بوكم و كبيركم تسمعوا كلامي و كلامي يمشي ع الكل
نديم : سمعنا كلامك هلبا و شوف شن صاير فينا
فتحي : انت تصكر فمك شن هو اللي صاير فيك ؟ تكلم خلي نسمعوا حتى احنا
نديم يسكت و علي كمال ينزل راسه لوطا
فتحي : خلاص امالا .. تمشي توا ترجع مرتك .. تسمع فيا ولا لا ؟
نديم يشبح لبوه بتحدي
نديم : مش ح نرجعها .. وهذا اللي عندي
فتحي : كان ما ترجعها والله ماني راضي عليك لا دنيا ولا اخرة يا نديم
علي كمال : بوي خلي الولد يحدد مستقبله بروحه بيلي يـبـيـه .. علاش تقرر في مستقبله
فتحي : انت خليك في حالك .. و موضوعي معاك بعدين
علي كمال : موضوع شني اللي بنتكلموا فيه ؟
فتحي : موضوع دلالك الزايد ..ايه انا بوك و نضربك لما تغلط طبعك زي أمك بالضبط
علي كمال : لكن انا ما غلطتش يومها يا بوي كان تتفكر
علاء : اياه علينا عاد ..
فتحي : و انت التاني .. انا نقرر لمن نعطي رزقي و كل حد ياخد حصته ما تخافش
علاء : في حاجة اسمها شرع .. وبعدين المحلات هادوم من حقي انا مش حق ولد السورية هذا
أنت تقرأ
متلازمة عائلتي (رواية ليبية)
Fanfictionمفيش انسان معصوم من الأخطاء مفيش انسان كامل .. بعيدا عن روايات المراهقين رواية ليبية واقعية ممزوجة بالخيال مشوقة رواية تحكي عن العائلة و مشاكل العائلة و اسرارها والحب في حياة كل شخص فيها شخصيات مميزة و احداث قوية ..
