علي كمال : واليوم الموضوع زاد عن حده خلاص اللي بيصير خلي يصير انا تعبت
جميلة (وهي مصدومة) : باهي غير قعمز هدي روحك سلم وخي
علي كمال : جميلة مش على اساس قلتي انك بتخطبي البنت ليا وجيتي كلمتيني عليها ولا لا ؟
نديم (بصدمة) : شن ؟ ( و يزيد يبخ من الاكسجين اللي عنده)
جميلة : ايه هكي صار لكن حتى انا زيك اليوم تفاجأت لما طلبتها لنديم !
نسرين(بصوت واطي) : العفو شن عيلة المجانين اللي طحت فيها ههه
فتحي : شن اللي صاير يا خديجة احكيلنا
خديجة ساكتة ومقعمزة وحاسة روحها دايخة
علي كمال : انا توة نحكيلكم السيناريو المعتاد .. امي عجبتها البنت وطبعا حبت انها تكون لولدها .. زي كل مرة الحاجة اللي تزهى في عينها هي لنديم وعلي كمال مش مشكلة ما يقول شي
نديم : انا ماكانش عندي علم انك متكلم عليها قبل .. خلاص من غدوة نقوللهم مفيش نصيب بالنسبة ليا او انهم لخبطوا بيناتنا او اي موضوع كل شي يتصلح غر انت....
فتحي : شن لعب صغار هو ولا شن ؟ اللي صار صار توة انا اعطيت كلمة وكلمتي ما توليش بين التريس ووجهي ما يسودش قدام اختي .. البنت لنديم وتم الكلام
نديم : لكن يا بوي ......
علاء : اسمع الكلام .. اخر الوقت تبي راسنا ينحط في الارض على خاطر مواضيع زايدة
نديم : مواضيع علي كمال زايدة توة ؟! شن تقول انت ؟
علي كمال : بوك و خوك عندهم الحق .. انا موضوعي مش في البنت وربي يهنيك يا نديم ما ادورنيش ! انت فاهم موضوعي في شن (ويشبح لخديجة)
فتحي : خلاص موضوع البنت تصكر ومعش ينفتح تاني .. و حسابي معاك بعدين يا خديجة (ويطلع)
علي كمال يتكنطى و يمشي لداره و يقربع الباب بقوة
نسرين : فضيحة فضيحة فضيحة .. مش معقول يلي قاعد يصير هههه
علاء : هيا نركبوا معش عندي جهد لشي توة (ويمشوا)
و جميلة يجيها راجلها خدت ولدها وروحت وهي في صدمة
سلمى : يما نوضي ادخلي دارك ..
خديجة : خليني توة .. بري انتي خشي لدارك ما تقعديش هنا
و تمشي سلمى لدارها و حتى هي مصدومة
يمشي نديم لقدام غرفة علي كمال
نديم : علي كمال افتح شوية
علي كمال ساكت بدون حرف
نديم : افتح والله ما كنت نعرف .. امي قالتلي بنمشي نخطبلك البنت وانا قلت باهي .. علي كمال افتح
يفتح علي كمال الباب و يضرب نديم بوكس على وجهه باقصى ما عنده لن نديم يوخر
علي كمال : كان لازم نفرغ غضبي وانت ما هنيتش روحك
ويدخل يسكر الباب من جديد
نديم : غير كان تستريح تعالى اضرب تاني
تجي خديجة تجري
خديجة : نديم صارتلك حاجة ؟
نديم : معليشي يما انا وخوي نتفاهموا
أنت تقرأ
متلازمة عائلتي (رواية ليبية)
Fanfictionمفيش انسان معصوم من الأخطاء مفيش انسان كامل .. بعيدا عن روايات المراهقين رواية ليبية واقعية ممزوجة بالخيال مشوقة رواية تحكي عن العائلة و مشاكل العائلة و اسرارها والحب في حياة كل شخص فيها شخصيات مميزة و احداث قوية ..
