متلازمة عائلتي (رواية ليبية)

الحلقة 2

التفاعل ضعيف يا جماعة .. هيا ديروا مشاركة
و خلوا اصحابكم و صاحباتكم يقروها 

#متلازمة_عائلتي 

الحلقة 2 :

تاني يوم الصبح في المطبخ نسرين و خديجة يوتوا في الفطور

نسرين : عمتي وين سلمى ولا اليوم واخذة اجازة ؟
خديجة : ساهرة البارح تقرا بنيتي عندها امتحان قالت ما تنوضونيش
نسرين : ايه صح قوليلي خيره جوك امبارح تقولي متعاركة انتي عمي فتحي ؟
خديجة : لا متعاركة لا سو قتلتك تعبانة وبس

..................................

.......................................
ويجو كلهم على سفرة الفطور
وفي الوقت يلي كلهم قاعدين يفطروا والكل ساكت
نسرين مقعمزة بعيد عليهم ..

نسرين : عمتي .. كيف جبتي علي كمال و نديم هكي ورا بعض مش فاهمة انا بالضبط ؟ يعني قداش بيناتهم هما توة ؟

خديجة كانت تشرب في الشاهي وشرقت و علي كمال يقعد يشبحلها ونسرين تراقب فيها

فتحي : من وين تجيبي في الاسئلة هادي ع الصبح ؟
نسرين : خطر على بالي توة فجأة و انا نشبحلكم

علاء يأشر لنسرين بمعنى اسكتي وينوض

علاء : صحتين .. نسيت اوراق فوق بنمشي نجيبهم (ويمشي)
فتحي : مفيش داعي للأسئلة الزايدة هادي
نسرين : حاضر يا عمي
نديم : ناس فاضية معش لقت شن تسأل ع الصبح

علي كمال يفنص لنديم بمعنى اسكت

نسرين : وشن فيها كان سألنا اللطف ولا حرام نتكلموا ؟
نديم : كل شي ليه وقته و مكانه
فتحي : خلاص عاد
نسرين : تشبح فيه يا عمي كيف يعامل فيا وانا ما درت شي
نديم : اشبح ....
علي كمال : نديم ياسر اسكت
فتحي : نديم عيب عاد هادي زي اختك
نديم : لا انا عندي خوات سلمى و جميلة سادين
فتحي : ما ادوريشي يا بنتي عارفاته نديم
نسرين : حتى انا اصلا مش مدوراته خلي يقول اللي يبيه

يكملوا فطورهم و يجو طالعين

خديجة : علي بما انك بتروح بكري بالله جيب لحم للغذاء
علي كمال : حاضر يما (ويطلع)

علي كمال : نديم استنى
.........
.................

نسرين : عمتي .. علاش انتي الوحيدة اللي تقولي لعلي كمال علي بس ؟

خديجة تصكر باب الكوجينة

خديجة : لعند وين تبي توصلي انتي ؟ سمعتينا امبارح انا فتحي صح ؟ هذا علاش نازلة اسئلة اليوم
نسرين : اللطف علاش شن بنسمع مثلا ؟ شن في اسرار واحنا ما ندروش ؟
خديجة : قولي الحق
نسرين : ما نيش عارفه على شن تتكلمي انا يا عمتي شن في ؟

وتدخل سلمى الكوجينة

سلمى : امي خيركم مصكرين الباب
خديجة : شي انضموا في الفطور اهو