و يسكتوا شوية
نديم (متردد) : اسمع .. بالنسبة لموضوع الخطبة والله ما كان عندي علم بان جميلة مكلماتك عليه .. امي جتني تاني يوم بعد يوم العشاء كلمتني على وصال قالتلي كذا وكذا في الاول قلتلها لا بعدين قنعتني
علي كمال : خلاص صكر ع الموضوع
نديم : انا مش عارف شن نقولك .. لكن اسف والله اسف
علي كمال : نديم الدنيا نصيبات و و بنت عمتك من نصيبك و قلتهالك و بنعاود نقولها البنت مش موضوعي انت عارف موضوعي شن .. وربي يهنيكم ان شاء الله
نديم : بارك الله وفيك .. ما تبي شي ؟ انا بنمشي نرقد !
علي كمال : خود من بخاختك قبل ما ترقد
نديم : حاضر
...........................
......................................
وصال : انا نبي نفهم شن اللي صار بس ؟ كيف جميلة تكلمني على علي كمال و يجو يخطبوني لنديم
ألاء : و المشكلة جميلة لا ترد على الرسايل و لا الاتصالات و سلمى حاولت نسحب منها الكلام لكن شكلها ما تندري على شي !
وصال : في إن في الموضوع و انا لازم نعرف
..........
.....................
يروح فتحي و يلقى كل واحد في داره يمشي لداره ويلقى خديجة
فتحي : خيره الحوش مسكت .. شن في ؟
خديجة (بتعب) : ما في شي
فتحي : قولي شن في .؟ عارف ان في حاجة صايرة ما ادسيش عليا
خديجة : الولاد تعاركوا بكري (و تحكيله ع اللي صار)
..............
.......................
علي كمال مكسد وكيف جاي بيرقد يجيه اتصال من وصال
وقرر ما يردش عليها
...................
.......................
فتحي يمشي لجناح علاء و يطق الباب و يفتح علاء
علاء : ايوة يا بوي ان شاء الله خير
فتحي : سمعت انك تعاركت مع خوك علي كمال
علاء : هذا اللي صار
فتحي : و ضربته ؟
علاء (بتردد) : ايه
فتحي : توة تنزل تتأسف منه
علاء : لكن يا بوي حتى هو ما احترمنيش
فتحي : انا قلت توة تمشي تعتذر منه .. ما تخليش خوك يرقد مضايق منك انت اللي ضاربه وما نبيش نسمع لا
علاء : حاضر يا بوي
فتحي : هكي نبيك انت خوهم الكبير نبيك ترد بالك منهم مش تعاركهم
علاء : باهي يا بوي
فتحي : هيا برا
ويمشي علاء لعلي كمال و فتحي يدخل لداره
...............
تعاود وصال تتصل تاني وثالث و بعدين علي كمال يرد
علي كمال : ايوة نعم
وصال : انا نبي نعرف حاجة وحدة بس
علي كمال : تفضلي
وصال : كيف في الاول جميلة تقولي انك انت اللي بتجي تخطبني و بعدين تخطبوني لخوك قولي كيف ؟
علي كمال : اسمعي يا وصال
وهنا علاء قبل ما يطق يسمع اسم وصال يقعد يتنصت
علي كمال : انتي قلتيها بفمك اسألي جميلة ع الموضوع انا ما نقدرش نجاوبك
وصال : كيف ما تقدرش تجاوبني ؟ مداير عملتك ماهو وقت اللي معش صارلك مني .. بدلوك بنديم .. شن انا ما انسانة و نحس ونضايق ؟
علي كمال : كيف ؟
وصال : في وقت اني انا معجبة بيك تبيني نتزوج خوك ؟ هادي كيف تصير ؟
أنت تقرأ
متلازمة عائلتي (رواية ليبية)
Fanfictionمفيش انسان معصوم من الأخطاء مفيش انسان كامل .. بعيدا عن روايات المراهقين رواية ليبية واقعية ممزوجة بالخيال مشوقة رواية تحكي عن العائلة و مشاكل العائلة و اسرارها والحب في حياة كل شخص فيها شخصيات مميزة و احداث قوية ..
