اسف جداا على التأخير .. كان المفروض تنزل أبكر من هكي
لكن الظروف ما سمحتش
الحلقة الجاية تنزل ابكر من هكي بإذن الله
#متلازمة_عائلتي
#الحلقة 12
..............
و ليد في مربوعتهم راقد في سابع نومة و فجأة يستاقظ على تقرببعة الباب و ينفتح الباب
يفتح عيونه شوية شوية و يشوف حد واقف و يشوفله
و يلقاه نديم ..
يخاف وليد و يركبه الرعب .. نديم يشوفله بشر و عيونه قريب يطلع منهم الشرار
........................
..............
في فيلا فتحي :
خديجة : هيا بسرعة بالكم .. جميلة هيا عطلتينا
جميلة : هيا اني جيت .. غيرت لحمودة و جيت .. نسرين ردي بالك عليه بالله عليك
نسرين : ما ادوريشي بري
سلمى : هيا بوي يستنى فينا في السيارة
و يركبوا السيارة
............
.........
يخاف وليد و يركبه الرعب .. نديم يشوفله بشر و عيونه قريب يطلع منهم الشرار
يسكر نديم الباب متع المربوعة و يتلفت لـ وليد
وليد (بخوف) : نديم .. شن تبي ؟
يوقف وليد و هو خايف و نديم يقرب منه
وليد : اسمعني .. راهو ما كانش قصدي والله
يصكر نديم على ايده بقوة و يضرب بيها وليد على وجهه
يوخر وليد للخلف من قوة الضربة
وليد : نديم اسمعني توا يسمعوا عيالي بالله عليك
يقدمله نديم و يعطيه ضربة تانية على وجهه يطيح وليد على الفراش
وليد : والله ما كنت على وعيي يا نديم
نديم : حتى انا توا مش على وعيي .. كيف الراي ؟
وليد : كنت سكران مندريش على روحي شن ندير
يشده نديم من حوايجه و يقيمه الفوق و يضربه تاني على وجهه لين خشمه نزل دم .. و يعطيه ضربة تانية و تانية
يطيح وليد على الارض ويشوف لـنديم و الدم على وجهه
و نديم بدون رحمة ينزل فيه ضرب و هو على طايح على الارض بوكس ورا بوكس و وليد يتوجع بصوت واطي باش ما يسمع حد و ينفضح
يكمل نديم ضرب وليد و يقعد يشوط فيه بضربات برجله في جسمه
و أخيرا يسيبه
نديم (و هو رافع صبعه يأشر لوليد) : هادي فشة غل بس .. حسابك بعدين علاش وكيف درت هذا كله ؟.. مازال حسابك بعدين يا وليد
....
نسرين كانت واقفة في روشن الفيلا اللي في جهة حوش عمهم و في ايدها حمودة ولد جميلة
و فجأة تشوف نديم طالع من مربوعة حوش عمهم و تقعد تراقب نديم لن يركب سيارته ويطلع بالتشليش ويجري بسرعة
و شوية و يطلع وليد من مربوعتهم و تقعد تشوفله نسرين و تلاحظ الدم على وجهه و كيف انه يمشي بصعوبة و تستغرب
أنت تقرأ
متلازمة عائلتي (رواية ليبية)
Fanfictionمفيش انسان معصوم من الأخطاء مفيش انسان كامل .. بعيدا عن روايات المراهقين رواية ليبية واقعية ممزوجة بالخيال مشوقة رواية تحكي عن العائلة و مشاكل العائلة و اسرارها والحب في حياة كل شخص فيها شخصيات مميزة و احداث قوية ..
