အမှားသင့်ကြမ္မာ -The Wrong Destiny

Part 2 (Unicode)

၂၀၁၆ ခုနှစ်၊ မူဆယ်မြို့

"မား သားအခုတလော အိပ်မက်မက်နေတယ်"

၁၃နှစ်အရွယ် မျက်နှာဝိုင်းဝိုင်း ကောင်လေးသည် မီးဖိုချောင်တွင် ခေါက်ဆွဲပြင်နေသော မိခင်ဖြစ်သူကို လှမ်းပြောသည်။

"ဟုတ်လား သားလေး ဘာတွေမက်တာလဲ၊ မားကို ပြောပြပါဦး"

မိခင်ဖြစ်သူသည် ပန်းကန်လုံးကိုယူလိုက်ကာ ခေါက်ဆွဲထည့်ရင်း ဆက်ပြောသည်။

" ရှောင်ဖေး လာထိုင်လေ၊ သားကြိုက်တဲ့ ကြက်ပေါင်းခေါက်ဆွဲ ချက်ထားတယ် ၊ စားရင်းပြောပြ သားအိပ်မက်ကို"

​ကောင်လေးသည် ခုံကိုဆွဲ၍ ဝင်ထိုင်သည်။

"ကောင်မလေးတစ်ယောက်ကိုမက်နေတာ"

မိခင်ဖြစ်သူသည် သားဖြစ်သူ၏ မျက်နှာချင်းဆိုင်တွင် ဝင်ထိုင်လိုက်ကာ

" အမယ်လေး သားလေးက ကောင်မလေးတွေကိုတောင်အိပ်မက်မက်နေပြီပေါ့" ဟုပြောကာ ပါးကို လှမ်းဆွဲလိမ်လိုက်သည်။

"အာ..မားကလည်း"

ကောင်လေးသည် ရှက်သွေးဖြာကာ ခေါင်းငုံ့သွားသည်။

"မား ကိုပြောပြပါဦး..ဘယ်ကောင်မလေးကို မက်တာလဲ။ ကျောင်းကလား"

မိခင်ဖြစ်သူက ပြုံးစစဖြင့်မေးသောအခါ ထိုကောင်လေး၏ ပါးနှစ်ဖက် ရဲတက်သွားကာ တူဖြင့် ခေါက်ဆွဲပန်းကန်ကို ဟိုဟိုဒီဒီ ထိုးမွှေနေလေသည်။

" သားက မျက်နှာတောင်မမြင်လိုက်ဘူး"

"အင်း"

"ခဏခဏမက်​နေတာ သူ့ကိုပဲ၊ သိလား မား၊ မျက်နှာမမြင်ရပေမယ့် သူမှန်း သား သိနေတယ်"

၂၀၁၉ခုနှစ်၊ မူဆယ်မြို့။

ဖြူဖြူဝိုင်းဝိုင်းကောင်လေးသည် လူပျိုပေါက်အရွယ် ဖြူဖြူသွယ်သွယ် ကောင်လေးဖြစ်နေ​ပြီ။

"မား သား မန္တလေးမှာ ကျောင်းတက်ချင်တယ်"

သူအမြဲတမ်း ဆယ်တန်းအောင်ရင် ပါးပါး ဆီလိုက်သွားပြီး ဟိုမှာပဲ ကျောင်းတက်တော့မည်ဟုပြောနေကြဖြစ်သည်။
အိပ်မက်ထဲက မိန်းကလေးတစ်ယောက်ကြောင့် ပြောင်းလဲသွားမှန်းသိလျှင် မားမား စိတ်​ဆိုးလေမလားမသိ။မဆိုးတော့မဆိုးလောက်ပါ။ မားမား သည် သူ့ကို ဒီမှာပဲ နေစေချင်သူဖြစ်သည်။