قلبي بك قد فتن

1

دخلت للغرفة بعصبيه وهي تريد تجن من ورا اختها الي معنده وما تقبل تطلع

( حنين يلا كعدي ترى والله اصيح محمد عليج كومي بسرعه مللتيني ترى )

صاحت هاله بعصبيه وهي تسحب الغطى من عليها

( شتردين ما اكعد وما اسوي شي والله افضحكم إذا جبرتوني اطلع )

صرخت بعصبيه وعيونها حمر من كثر ما باجيه

( انت لو تستحين شويه جا ما حجيتي هي الكلمه بس شكول عمرج ما راح تتغيرين ابد بس راح تطلعين والله وغصب عليج فاهمه )

صرخة عليها وطلعت من الغرفة خلتها تنفجر بجي على حاله سحبت النقال من جوى لمخده حتى تتصل للمره مليون بلي قافل جهازه وما يحاجيها من اسبوع

( طيب لا ترد ظل هيج بس وروح امي وابوي الا اطلع وتعدل واقبل بالحيوان الي جاي بس صبرك علي واذا انت زلمه عود سوي شي )

كالت وهي تشمر النقال بعيد بكل عصبيه وتكوم من مكانها ...

( شصار )

سالت شذى هاله الي دخلت للمطبخ وهي مشتعله نار

( الظاهر ما ربيتها شنو الظاهر اكيد ما ربيتها هاي ما مار عليها يوم تربيه ولج تكلي افضحكم إذا طلعتوني الما تستحي على وجهها ولا تكول اختي الجبيره كبالي انا الها انما تعدلت وطلعت مثل البشر والله ورحمة الراحوا اجرها من شعرها واطلعها للناس بس شكول غير حظه الاسود هذا الي راح تكون نصيبه ربي يعينه على ما بلاه )

كالت بعصبيه وهي تساعدها بترتيب الضيافة

( خلاص سكتي محمد اجى لا يسمع )

كالت شذى الها وهي تشوف رجلها يدخل من برا ويا بنتهم

( انا شنو مسكتني عن قلت ادبها غير لا يعرف محمد ولا من زمان كتلة عليها حتى يربيها )

كالت بعصبيه تهمس الها

( لا تزعلين مني ترى راح اضحك وربي ترى محد مقويها هيج الا انت ومحمد فلا تضغطين على نفسج هيج وفرحي وانسي دلالها شوي )

كالت شذى وهي تضحك خلت هاله تتنهد وهي تستغفر ربها

( الله يساعد الحلوات )

كال محمد وهو يدخل عليهن

( ويساعدك حبيبي )

كالت شذى وهي تقرب منه وتاخذ بنتها وتبوسه على خده وتبتعد بسرعه وهي تضحك على خجله من اخته الي ابتسمت على خجل اخوها

( اي وين عروستنا خو ما ناقصكم شي )

كال حتى يغطي على خجله وبفرحة أبو راح يزوج بنته واخ يزوج اخته يعني فرحته فرحتين ما شايلته كاع يحس روحه طاير لسابع سما