قلبي بك قد فتن

5

كاعده كباله تنتفض من الرعب طول عمرها الي عاشته ويا وهم متزوجين ما شافت منه غير الهدوء وطولة البال حتى صوته ما رفعه لا عليها ولا على احد من ولدهم بس الي سمعته وهي محبوسه هنا بغرفتهم تنتظر مصيرها على ايديه بعد ما يخلص من بنتهم اساس المصايب لو ماهي لعبة بعقلها ما سوت اللي سوته هي لحد الان ما تعرف شلون طاوعها كلبها على بنتها بس فرت راسها مثل إبليس وعمت عيونها بوسوستها وهي توصف اللي مو بنتها هي لحد الان ما تعرف شصار ويا رباب لو زينب عايشه بعدها لو ماتت بعد الصياح الي هزت بيه البيت ما تعرف شسوا بيها لو شراح يسوي بيها هي بس لمن حجى تجمد الدم بعروكها وعيونها صارت تبجي لوحدها من صوته المكسور ومن الوجع الي بيه

( ما اعرف شسوي بيج او اعرف بس مو كادر اسوي بعد ما شفت بعيون ولدج الرجا من اني ما امد ايدي عليج واكتفي انو اعاتبج على الي سويتي على اساس انج فشلتيها لانها ما سمعت كلمتج مو انج ردتي تموتينها لو ما ربج لطف بيا وبعد عنها الموت لان يعرف اموت وراها لو صار بيها شي )

رفع عيونه الها وشافها تبجي وتنتفض من الخوف وجهها جايب الوان من الرعب مو كادر تحملها وصورت رباب ما تفارك خياله لا شعوريا صرخ بعلو حسه بيها خلاها تنتفض نفضه من مكانها

( ولج فهميني شلون طاوعج كلبج شلون كدرتي تمدي ايديج على بنتي انا بنتي انا الي الكل يحلف بشرفها وادبها واخلاقها انت تشكين بيها وتسوين الي العدو ما فكر بيه ولج ليش فهميني لو ما بنتج جان كلت تكرهه بس بنتج بنتج )

صار يصرخ باخر كلمه وهو يكسر كلشي يطيح جوا يده بس حتى لا يمد ايده عليها وهو تبجي وتتوسل بيه ما حس بالباب الي انكسر ولا بولده اللي دخلو عليهم إلا لمن جتفوه وسحبو برا لغرفه

( اهدى يبا ابوس ايدك مالنا غيرك لا تسوي بنفسك هيج )

صاح حامد وهو يحضن ابوه بس ابوه دفعه وصاح بصوت يوصل لامه الي صارت تلطم لانها خسرت كلشي بيدها هي مو احد غيرها

( تاخذها لخوالك وتكلهم ابوي يكول امانتكم وردها الكم )

( يبا )

كالها حامد بصدمه بس صوت ابوه كطع عليه اي كلمه يكولها

( اقسم بالله كلمه زياده وما تظل على ذمتي ثانيه وحده )

كالها وهو يبتعد عن الكل ويطلع برا البيت كله اللي يحس بيه يخنكه يحس حيطانه تبك على انفاسه الكل ضايع ما يعرف شيسوي بين صياح امهم ولطمها ونين اختهم الي ما هز بيهم شعره بس مضطرين يسون الي يريده ابوهم حتى لا ينفذ قسمه ...

**************

عند شاهين ...

اتوقع اي شي الا الي سمعه من صاحبه ما يعرف شنو يرد بعده بصدمته من الطلب بس شاهين ما تركه يطول بصدمته وهو يسأله لأن ما عنده وكت لكل هذا