قلبي بك قد فتن

3

واكفه بالمطبخ تسوي الها نسكافيه تحس بهدوء غريب عكس ما جانت متوقعه نامت بعمق وراحة وحتى من كعدت ما حاسه بخنكه أو مصيبة هاديه جدا يمكن هذا كله لانها لاول مره تنام بعد ما تذكر ربها وتسأله المغفرة ويبعد عنها الاذى وانها نامت اول مره من بعد كم سنه من غير ما ترتكب معصية اول مره من سنين فاتت تحس روحه طاهرة نظيفة رجعت مثل ما جانت مو خايفه من شي لانها واضحه وبريئه بس الظاهر هذا الهدوء ما راح يطول هواي لانها شافت اختها زينب تدخل للبيت بعد ما فتح اخوها حامد الباب الها وهي تسحب جهالها وراها الي شكلهم مسحوبين من الفراش حتى ما مغسلين وجوهم يا ستار شعدها من الصبح جايه عمرها ما اجت بخير شرها دائما يسبقها ما اهتمت الها وطلعت من المطبخ وراحت لغرفتها قبل لا تشوفها وتبدي تسمعها كلام يسد النفس لان هاي عادتها وما راح تتغير ما تعرف ليش هيج تكرهها هي اختها الوحيده المفروض تكون قريبه منها سرهن واحد تخاف عليها تحميها مو العكس كل مشكله بحياتها سببها زينب منقصة عليها فرحتها الي يضحك انه نسوان اخوانها يحبونها ويموتون عليها وما يرضون احد يحجي بحرف عليها يدافعون عنها لو زينب بدت توز بامها عليها صدك دنيا مكلوبه ...

( يا ستار شنو شايفتنه بحلمج أمس جنى سوى بيت عمج )

كالت الام لبتها الي دخلت عليهم والبوز ممدود متر لكدام

( ما جنت اعرف جيتي ثكيله عليكم كلكم حتى كل شويه واحد يسالني نفس السؤال )

كالت بزعل وهي تكعد يم امها من غير ما تسلم على أساس زعلت منهم بس امها تعرفها وحافظتها مثل كف ايدها تعرف بتها مو خاليه ما تجي الهم من صبح الله وبهذا البوز الا اذا جانت وراها مصيبه

( مو ثكيله بس غريبه )

كالت وهي تخلي لمخده جوا راس احفادها المساكين ناموا بس خلوا روسهم على الارض الظالمه ساحبتهم من الفراش

( عوفج منهم وكوليلي ابوي وينه المحل مسدود من تعديت عليه بعده هنا لو طلع )

سألتها بهمس وهي تباوع على غرفة اهلها هنا خلص امها تأكدت عدها مصيبه مو خاليه

( شتردين منه كولي شمسويه من مصيبه بسرعه )

( شريد منه وبعدين انا الي اجيب المصايب يعني بنتج الشفيه معصومه ولا يطلع منها الزله )

كالت بعصبيه وهي تسبها بداخلها

( بدينه شدخلها هسه بسالفتنا )

( انت كولي ابوي وين وانا اكلج شدخلها بالسالفه )

( والله كلت جيتج مو خاليه ابوج بعده نايم وحامد راح يفتح بمكانه اليوم اجازه من شغله )

( انا داخله اتمدد لحد ما يطلع ابوي ما اريده يشوفني هسه قبل لاكولج شصاير )

( شعندج من مصيبه لا تعبين كلبي هيج من صبح الله )