قلبي بك قد فتن

8

من يعيد القلب بكراً ..

واكف كبال الباب ومستحي يرن الجرس الوقت بعده توا طلع الصبح بس ما كدر يصبر اكثر من دون ما يجي ويشوفها ويطمن عليها عينه ما غمضت البارحه ويوم الي غفلت شاف العجب

(هلا عمي صبحك الله بالخير)

التفت بسرعه شاف محمد يتمشى وبيده علاليك

(هلا بيك بويه اعذرني واكف من الصبح باب البيت بس كلبي نار وانا ابوك عليها ما كدرت ما اجي)

(شتكول عمي ترى البيت بيتك وهي بيت اخوها وان شاء الله ما اقصر بواجبي الها اتفضل ادخل خل نتبرك بيك وينور بيك البيت وناكل لكمه سوا)

تقرب محمد منه بسرعه وباس راسه وفتح الباب وهو يرحب بيه كلبه موجوع على حاله وحال المسكينه الي نايمه جوا الي ما جاي يصدك الي صار بيها ولا حالتها الي وصفتها شذى اله لحد الان ما شافها ما يهون عليه يشوفها بهيج وضع وهي اللي ضحكها وسوالفها تنطي للشخص طاقه وحياة

(البيت منور بيكم يا طيب الاصل يا الله)

حجه اخر كلمه بصوت عالي شوي حتى ينبه على دخوله وهو يمشي ورا محمد الي فتح باب الاستقبال اله

(تفضل عمي اخذ راحتك)

(تسلم يا بوك بس يا ريت تشوفها الي اذا كاعده)

(تدلل هسه اخلي شذى تشوفها الك بس قبلها نتريك انا وياك لان اذا شفت المزعجه ما راح تعبرني اعرفك)

ابتسم ابو رباب على كلامه يعرفهم هو بنته مثل الفاره والبزون من صغرهم وكبروا على هذا ما تغيروا ابد انتبه على دكت الباب ودخلت شذى مرت محمد عليهم تبتسم وهي تصبح عليه

(صباح الخير)

(هلا بويه صباح النور شلونج وشلون بنيتج)

(الحمد لله كلنا بخير وبنتي تبوس ايديك)

(ربي يحفظها الكم ويبارك بيها)

(تسلم)

حجتها هي ومحمد سوا وهي تاخذ الغراض من ايده

(اي ام حبايب اريد احلى ريوك من ايدج قبل لا تكعد المزعجه وتاخذ عمي مني خل نشبع من سوالفه)

ضحكت على كلام زوجها الي يتحول 180 درجه من يتعلق الموضوع برباب تحس تتعامل ويا اطفال يموتوها ضحك لو انجمعوا بمكان سوا

(عيب)

(ترى هسه شوي عقلوا يعني على اساس كبروا ما شفتيهم وهما صغار الي يشوفهم يفكرهم رويسيه محد يصدك انهم مو اخوان)

ضحكت وهي تسمع كلام ابو رباب وبعدها تذكرت قبل كم يوم شنو صار وزاد ضحكها ولمن شافتهم استغربوا ضحكها حجت الهم وهي تحاول تكتم ضحكتها