قلبي بك قد فتن

7

لو اجتمعت الكوارث جميعها لا تأتي بلحظة غضب منكِ ..

(انا شورطني وضحكت والله راح اطلع هاي الضحكه علي زقوم وكولوا كالت)

كالت شذى بخوف من حنين تخاف منها ساعاتها تذكرها بعمتهم سناء من تنتقم من احد يمس كرامتها ما يهم هي شنو تسوي بالناس المهم محد يدوس الها على طرف

(شحدها ساعتها الا اكسر ظلوعها الج)

طمنتها هاله وهي تشوف الخوف بعيونها ما تلومها اختها مؤذيه لو تركوها من دون حساب وعقاب جان سوت البلاوي بس الي موكفها عن أذية شذى هو زعل محمد منها كلشي ولا زعله عليها تنجن لهذا ما تقرب على شذى انتبهت لرباب الي يستحيل تفوت سالفه بيها حنين لازم تدخل بيها حتى توزها عليها تحسهم مثل الفاره والبزون ما يرتاحن الا لمن يناكرن بعض

(لو بس اعرف على شنو مدلعينها لهاي الدرجه هاي نتيجة دلعكم الها ما تحترم وقليلة ادب)

(اصلا الدلال ما خلق الا الها وبعدين اذا احنا ما دلعناها منو الي يدلعها)

(لعد لا تشتكين من تصرفاتها)

(عود اذا شكيت الج لا تسمعيني يا عروس)

(هاله)

صاحت رباب بعصبيه خلت هاله تتنهد بتعب وهي تكوم من مكانها وترد على رباب وشذى تباوع الهم من دون ما تفهم شي بس ساكته حتى تشوف نهاية الكلام شنو

(بلا هاله بلا بطيخ اروح اشوف هاي المجنونه الي طلعت منا عليمن اجت مثل الاعصار وراجعه الج بس يا ريت يكون عقلج براسج وفكرتي عدل لان محد خسران غيرج انا اريد اطلعج ربحانه باي طريقه فهمي ترى انا مو عدوتج)

طلعت هاله من الغرفه من دون ما تسمع رد رباب الي نزلت دموعها مثل الشلال تعرف انها تفكر بمصلحتها ومن خوفها عليها تصرفت هيج بس ما تكدر تقبل الي فرضته عليها هي تريد منها تزوج شخص حتى اسمه ما تعرفه مو بس شكله لا أصله لا فصله وتنسى حب عمرها ليش بس لانها ما متقبله هذا الحب حتى لو كان حب غلط وانبنى على أغلاط وآثام ما تنتهي بس هي حبته بطهارة مو ذنبها انه هو حول طهارة حبها الى غرايز قذره تشبع رغباته المقرفه

(انا ما اعرف شنو الموضوع ولا اريد اعرف بس نصيحتي الج خليج ويا هاله لأنها تريد مصلحتج صدكيني ساعات الانسان يبني أوهام ويحب يعيش بيها على الرغم انها مبنيه بخيوط عنكبوت واهيه اقل شي تتمزع اليوم شفت هاله بحاله ما مرت علي وهي داخله بيج النا جانت مثل الجثه غير الدم الي ماليها الروح ما ردت بيه الا لمن فتحتي عيونج ترى محد يخاف على احد الا اذا كان يحبه اكثر من روحه لا تزعلين منها وفكري بالي طلبته منج)

نهت كلامها وطلعت من الغرفه ورباب بس تبجي ما وقفت لحظه وهي تسمع كلام شذى الكل يطلب منها تسمع الكلام وتقبل بالامر الي فرضته هاله عليها بأي حق احد يفهمها ...