سنغدو رفاتاً ويبقى الأثر...💔

الحل البسيط..💜

تدبر القُرآن كـ حبل مُلقى إليك وطرف الحبل في يدّ الله

- من 3 سنين زي دلوقت بالظبط وبعد انتهاء رمضان كُنت قاعد مع نفسي في يوم وبقرأ الورد بتاعي  تاني يوم العيد ووقفت عند قول الله تعالى

" لَوْ أَنزَلْنَا هَٰذَا الْقُرْآنَ عَلَىٰ جَبَلٍ لَّرَأَيْتَهُ خَاشِعًا مُّتَصَدِّعًا مِّنْ خَشْيَةِ اللَّهِ "

مليون سؤال جه في بالي في اللحظة دي

ايه اللي في القُرآن ممكن يخلي جبل يصدّع ! طب ما أنا بقرأ الورد بتاعي يوميًا وقلبي لسه مليان ذنوب
ولسه متعلق بالدنيا

هو اللي بيقرأ قُرآن لازم وهو بيقرأ يكون خاشع !
طب ولو قرأت بدون خشوع هيحصل ايه ؟!

افتكرت قول شيخ الإسلام ابن تيمية لما قال " ندمت أن ضيعت عمري في غير تدبر القُرآن ولو أعطيتكم ملئ هذه الأرض ذهبًا ما كافئتكم على ما فعلتم
طب ليه !؟
عشان خلتوني في خلوة مع حبيبي وبدأت أفهم القُرآن "

قررت في اليوم دا أبدأ ولأول مرة في حياتي أقلل الورد بتاعي خالص
بدل ما بقرأ ربع ، قررت أبدأ أقرأ صفحة واحدة
صفحة بس أشوف تفسير كل آية
أفهم كُل آية ليه نزلت !؟ ونزلت في مين ! معنى كل كلمة فيها
بدأت بالفعل من جزء عمّ
بمرور الوقت وبعد شهرين لاقيت نفسي لسه مخلص جزء عمّ

حسيت بيأس وأنا بقول لنفسي معقول يا محمد لسه مخلص جزء واحد !
ياااااه دا أنا كنت بخلص الجزء في 3 أيام

بدأت أراجع حساباتي تاني وقررت أكمل زي ما كُنت
كُل يوم رُبع أو رُبعين أو أكثر
لاقيت نفسي بخلص الجُزء في اسبوع ففرحت جدًا وكملت قراءة فقط بدون تدبر

وفي يوم روحت أصلي الظهر ، وصلت المسجد قبل الأذان بشوية ، الشيخ اللي بيأذن جالي وقالي قوم أذن يابني وصلي بينا لإن الأحبال الصوتية عندي تعباني شوية
انت حافظ القُرآن صح!
صمت تام لمدة دقيقتين
أنا !
أنا هأذن وأصلي بيكم !

أه انا حافظ بعض الأجزاء

-طب يلا يابني قوم صلي بينا وأذن

قومت بالفعل وأذنت ولأول مرة في حياتي أستشعر قول أشهد أن لا اله إلا الله

الناس بدأت تتجمع وأنا واقف مرعوب
ازاي هصلي بالناس دي كلها !
ازاي هخشع !

وقفت وبدأت أصلي بيهم ، قرأت في الركعة الأولى الفاتحة وبعض الآيات من سورة الإنسان
مكنتش حاسس بخشوع ، كنت حاسس إني بسمع مش بصلي
مستشعرتش إن أنا واقف قدام الملك ، بدأت أحزن على حالي لإن دي أول مرة أفهم ان صلاتي دي متنفعش
وإن مش دي الصلاة اللي هتدخلني الجنة
هتتقبل بس ناقصه الأجر
وإن ربنا لما أنزل القُرآن قال

"كتاب أنزلناه إليك مبارك ليدبروا آياته "

قومت للركعة التانية وأنا مقرر إن أنا هصلي بالفاتحة وسورة عبس ، السورة اللي وقفت عندها كتير وانا بتدبر جُزء عمّ
السورة اللي سألت نفسي مليون سؤال فيها واللي عيشت جواها كتير
واللي حسيت انها خطاب من ربنا ليا أنا تحديدًا

بدأت أقرأ قول الله تعالى :

يَوْمَ يَفِرُّ الْمَرْءُ مِنْ أَخِيهِ * وَأُمِّهِ وَأَبِيهِ * وَصَاحِبَتِهِ وَبَنِيهِ

لِكُلِّ امْرِئٍ مِّنْهُمْ يَوْمَئِذٍ شَأْنٌ يُغْنِيهِ * وُجُوهٌ يَوْمَئِذٍ مُّسْفِرَةٌ

ضَاحِكَةٌ مُّسْتَبْشِرَةٌ "

أقسم بربي كُنت أول مرة أحس إني بصلي فعلًا ،بقرأ وقلبي مدمع قبل ما تكون عيني مدمعة ، استشعرت إن أنا واقف قدام الملك ، تخيلت يوم القيامة وربنا بيقولي

" اقرأْ وارقَ ورتِّلْ، كما كنتَ تُرَتِّلُ في دارِ الدنيا"

ياترى هقرأ قدام ربنا ازاي !

هقرأ زي ما أنا متعود في الدنيا كده!الصفحة في نص دقيقة !
ولا هقرأ بخشوع !

صليت بيهم وخلصت الصلاة
وبعدها روحت للشيخ اللي قالي قوم صلي بينا
قعدت قدامه وأنا عاوز إجابة محددة
بالكم ولا بالكيف يا شيخ

أنا عاوز إجابة تريح قلبي وتشجعني إن أنا أكمل

- يا شيخ هو بالكم ولا بالكيف ! بـ كم التلاوة ولا بكيفيتها

= بالطريقة اللي تُحب أن تلقي الله بها ويستمع الله لك يوم القيامة وأنت تقرأ بها
أنت ممكن تقرأ الصفحة في ساعة وبتجويد وترتيل ومقامات ومحاولة فهم الآيات دا عند ربنا أعظم مليون مرة من أنك تقرأ الصفحة في 5 دقايق
التدبر هيخليك تخشع في الصلاة
وانت بتصلي هتفتكر كُل آية و وقفتك معاها وهتفتكر تفسيرها وقصتها
و أثناء الختمة هتلاقي إن الآية دي تفسيرها مُشابه لآية تانية فهتبتسم وهتلاقي نفسك بتكمل
التدبر بيساعد على الحفظ لإن كُل صفحة هتاخد منك وقت كبير ،
انت ممكن تنوي ختم القُرآن قراءة وتموت وأنت لسه مخلصتش الختمة ، فربنا يُعيطك أجرها
وممكن تنوي تدبر القُرآن وتموت وأنت لسه مخلصتش تدبر
فربنا يُعطيك أجرها
تفتكر أنهو أثقل في الميزان ؟!

القراءة فقط ! أم التدبر وفهم الآيات كأنها أنزلت إليك خصيصا
وكأن الله اصطفاك ؟!
أقرأ القُرآن بالطريقة التي تُحب أن يستمع الله إليك وأنت تقرأ بها
كُل ثانية بتمر وانت بتتدبر القُرآن وبتبحث على تفسير الآيات دي أعظم إجابة لسؤال عن عمرك فيما أفنيته ؟!!!!
وممكن تخصص ختمة تدبر وختمة قراءة فقط يعني ختمتين

- أنا بقالي 3 سنين مختمتش لسه ختمة واحدة
ولسه فاضل ليا جُزئين سورة البقرة
بس عاوز أقولكم إن أنا ختمت مليون مرة ، ختمت مع كُل سورة فهمتها ، حفظت 28 جُزء وتعلقت بيهم جدًا
كُنت أوقات بقرأ آية واحدة بس وبحاول فهمها وأسهر فيها وأسمع التفسير من كذا شيخ
بقيت جاهز أصلي بالناس وأخشع ،وبقى عندي القُدرة أخليهم يبكوا من الخشوع
تجربتي في رمضان 2020 كانت عظيمة لإن لأول مرة أوقف الورد بتاعي وبدأت ختمة جديدة (قراءة بدون تدبر) ، لاقيت نفسي بتدبر أصلًا وانا بقرأ لإني فاهم الآيات
ختمت القُرآن بأهلي في صلاة التراويح وقدرت أبكيهم في الـ 30 يوم
صليت وأنا فاهم كُل آية بقرأها
صلاتي على مدار الـ 3سنين إتغيرت تمامًا
خشوعي كُل يوم بيزيد عن اليوم اللي قبله
تعلقي بلقاء الله وأنا بتدبر القُرآن بقى كبير أوي وبقى اقصىٰ أُمينة ليا
وإشتياقي لترتيل القُرآن أمام الله بيزيد
والنهاردة بدأت في الجُزئين اللي فاضلين

رمضان خلص وتسابق الختمات خلصت
حان وقت التدبر فـ أقرأ القُرآن بالطريقة التي تُحب أن تُرتل بها أمام الله ، ولا تخشى إنتهاء العمر قبل أن تنتهي ، تدبر القُرآن كـ حبل مُلقى إليك وطرف الحبل في يدّ الله💙"))

#إسراء_عاطف
منقول.💜