ام البنات

البارت الثامن عشر

منى: حالت ملك جاي زيد يوم عن يوم ... تحولت من صخونة كامت تتقيئ دم .. صار الها عشرة ايام بالمستشفى .. اضطريت اخابر سلام عليهة .. لان ما اكدر اروح الها امها او زهرة اهناك .. و محمود جاي يتخبل
يريد بس يشوفها .. اكثر من مرة يريد يروح .. و اني الزمة .. لحد ما لتحق صار له يومين .. و امي الي جاي يرتفع ضغطها على محمود .. المشاكل من تلم تلم مرة وحدة .. اخذت اجازة اسبوع .. ما اكدر اعوف امي بحدها . .. الجهال نقلهم سلام غير مدرسة اهلية شوية بعيدة .. تمر الايام بروتين ممل جدا ... صار موعد نزول محمود ... كلت خل اروح اسوي كيكة لجهال خطية ..
طبيعتي من اشتغل اهوس .. و من اخلص الم .. نمارق تحب هل اسوالف وكفت اساعدني او صفا اتلعب قمر
ضليت اشتغل لحد مدخلت امي

ام منى: يمة منو طاك عبوة هنا

نمارق: بيبي جاي نسوي كيكة

ام منى: يمة منى شمسوية بالمطبخ

منى: يمة من اخلص امسحة

جاي اخبط الكيك بالطاسة كمل الخليط درت الخليط بالقالب بقة شوية

نمارق: لالا لتغسلي جيبي اني اكلة

منى: لج شتاكلين عوفي

نمارق: لالا نطينيا طيب اصلا هذا اطيب من الكيك

منى: موزين ماما

نمارق: جرت الطاسة مني لا طيب بيبي ضوكين شوفي شلون طيب

ام منى: يمة دعوفيها بالعافية بيبي

نمارق: حبيبتي بيبي احسن من ماما

منى:يا ولج نزعت النعال جاي اركض وراها ذبت طاسة بالكاع او ركضت للهول ... اني اعلمج اذا ما اشوي على اذاناج بصل .. ام نص السان .. تعال

راحت ركضت ورا جدها ختلت او طلعلي لسانها

نمارق: جدو باع ماما شايلة نعال علية

ابو منى: ولج جدو سويتي الامج

نمارق: اني حبابة ما اسوي شي

صفا: عيب تعيبين هيج على امج ميصير

منى: يمة فدوة البنات العاقلات احسن من ام نص السان  ذبيت نعال او رحت حضنتها ..قمر من شافتني حاضنة صفا اجت جيتت بحضني ...وراها اجت نمارق تركض .. معلية اني هم حبابة .. تعالي لكفتج اليوم منو بخلصج منى .. كمت ادغدغ بيهن او هنا سكرانات من ضحك ... ولكم نسيتوني الكيكة

ام منى: اني حطيتها بالفرن ضلي كاعدة

منى: اي يمة عاشت ايدج .. باوعت ابوية صافن علية .. و يضحك ... ها يابة شو صافن علية

ابو منى: الله يديم الضحكة الج يابنتي و اشوفج هيج دائما فرحانة .. واشوف ذني الحلوات عرايس قبل ما اموت

منى: كمت كعدت يمة .. يا بابا شبيك اسم الله عليك ... بعدك شباب .. عود جنت مقررة ازوجك الثاني .. خيبت امالي