شوق المارو

١٤ : فات آوان.... الندم!

١٤ : فات آوان.... الندم!

- الشخص بيندم متأخر و ممكن يروح يعتذر و يترجى... لكن للأسف بيكون فات الآوان... فات آوان....الندم.

- ملك مراد.

- اميره بتوتر : مروان هتعرف تكسر الباب ؟ مقفول.
- مروان : مش المفروض انتي معاكي نسخه؟؟
- اميره بتوتر : غير المفتاح.
- مروان : طب ثواني... سمر ابعدي عن الباب...حاولي تبعدي عن الباب..
- سمر بعياط : حاضر.
- مروان : شوق اتصلتي بالاسعاف صح؟
- شوق بقلق : اه..
- مروان بجديه : ابعدوا كلكوا....واحد اتنين تلاته.... و ضرب الباب برجله و اتفتح .
- سمر بعياط : ماما اياد.... اياد جوا...معرفش ماله... مغمض عينه.
- اميره و وشها اصفر : مغمض عينه؟!....ابني... اياد.... و جريت للأوضه جوا.....الحقوا بالله عليك يا مروان... ارجوك الحقوا....
- مروان : شوق خدي اميره حاولي تهديها... سمر روحي مع تيتا هناء يلا يا حبيبتي... انا هشيله و انزل العربيه اروح المستشفى بسرعه....يمكن نقدر نلحقه.
- اميره بعياط : هاجي معاك.
- مروان : ماشي يلا انزلي بسرعه.
- شوق لنفسها : حسابك معايا يا امير... وحياة امي لأفوقك انهرده... هتخلص من الزفت ده انهرده.
مروان ركب عربيته بسرعه و اميره ركبت معاه و ساق بأقصى سرعته... و بعد ربع ساعه لقوا امير داخل عليهم.
- شوق بعصبيه : قدامي يا امير و من غير ولا حرف لإما قسماً بالله ارتكب فيك جريمه حالاً.
- امير : ما تهدي يا بت في اي.
- شوق بعصبيه عايز تعرف في اي ها؟ ابنك بس شرب من الزفت الي بتشربه و اتنقل للمستشفى... و مسكت ايده و طلعت فوق بسرعه.
- امير بصوت عالي: انتي جيباني هنا لي سيبيني الحق ابني.
- شوق مسكت الاكياس و قالت : هو مش بردوا علموك قبل ما تاخد الحاجات دي و تشتريها منهم.... انك تحطهم بعيد... بعيد عن متناول الاطفال... يعني مفيش اي طفل يقدر يوصلهم.... انا سبتك يا امير براحتك.... لكن سمر و اياد خط احمر.... انهرده  اياد كان هيموت بسببك بسبب غبائك .
- امير بصوت عالي : ما تلمي نفسك يا شوق... انتي نسيتي نفسك ولا اي ؟!....انا راجل البيت هنا.
- شوق ضربته بالقلم و قالت بعصبيه اكبر خلت الجيران تطلع من شققهم : هو تعريف الرجوله عندك انك تضرب مراتك و اختك..... هيا الرجوله تديك الحق انك تشرب الزفت الي بتشربه ده؟!...عايز تعرف يعني اي رجوله يا امير... هقولك يعني اي رجوله... يعني تكون موجود لما نكون محتاجينك... تكون موجود جمب مراتك و عيالك... تربي عيالك.... تحب مراتك... مش تضربها.... تكون سند لاختك و امك... تحبهم....لكن للأسف انت عمرك ما كنت موجود جمبنا يا امير.... فوق يا امير.. فوق بقى... انت ولا حاجه... انت طول عمرك ولا حاجه... و هتفضل طول حياتك ولا حاجه لحد ما تفوق لنفسك....فوق بقى.... القلم الي اخدته ده عشان تفوق... يارب تفوق و تريحنا منك... بس انهرده الموضوع هينتهي.... اميره انهرده هتطلق منك... و اياك تعتب عتبة بيتها تاني.... و عيال انت معندكش عيال... اياد و سمر تنساهم... و تنساني انا و ماما كمان.... من انهرده انت لوحدك....انا ماشيه انا ماما و سمر رايحين المستشفى...لو شفتك هناك اوعدك اني هاخد اي حاجه حده قدامي و احطها فيك و ارتكب فيك جريمه.....لو عايز نرجع نحبك ارجع امير القديم.... احنا عايزين امير القديم....كل الجيران كانت واقفه بتتفرج عليهم و نزلوا بسرعه اول ما لقوا شوق خلصت إلا دينا.
- دينا : اهدي يا حبيبتي ان شاء الله خير... سيبي سمر هنا عندي مع تيمور يلعبوا مع بعض....و انتوا روحوا و اتاخروا عادي براحتكوا.... بس ابقي طمنيني على اياد لما تروحي.
- شوق بحرج و راسها في الارض : هشوف ماما يا طنط.
- دينا و رفعت راس شوق و ابتسمتلها : متتحرجيش يا حبيبتي... انتي كان لازم تاخدي الخطوه دي من بدري...انتي كده فوقتيه... هو كان بيتخيل... هو كان متخيل نفسه راجل باللي بيعمله انتي فوقتي... لما ترجعول صدقيني هيجي يشكرك انك ضربتي بالقلم... ضربة القلم دي هدت كب خيالاته...و فوقته و خلته يفوق للواقع الي هو فيه... القلم ده قفل صفح كتير و فتح صفحه جديده...و ضريب هتلاقي كلامي صح و هيجي يشكرك.
- شوق و حضنت دينا : شكرا يا طنط لوجودك جمبنا.
- دينا : متشكرنيش... انا جمبك على طول...يلا روحي بسرعه.
- شوق بإبتسامه : حاضر.. يلا سلام.
شوق نزلت اخدت سمر و راحت لدينا .
شوق : بصي يا سموره... هتقعدي هنا مع تيمور لحد ما احنا نطمن على اياد و نجيلك ماشي؟!
- سمر بحزن : هو هيبقى كويس ؟!
- شوق : اه يا سموره ان شاء الله اول ما يفوق هتصل على طنط و تشوفوا بعض.
- سمر بحزن : ماشي..
- دينا : يلا يا حبيبتي ادخلي جوا مع تيمور.
- شوق : معلش يا طنط هنتقل عليكي شويه.
- دينا : مش هرد عليكي عشان انتي هبله... يلا يا حبيبتي روحوا و ابقي طمنيني عليه.
- شوق : من عنيا .
- دينا : يسلمولي.
شوق اخدت هناء و راحوا المستشفى.
- شوق بقلق : طمني يا مروان... اياد كويس؟!
- مروان : الدكتور الحمدالله لحقوا و اداله حلجه تنضف بطنه من الاستروكس... كويس لحقناه في الوقت المناسب.
- شوق : الحمدالله.... طب اقدر ادخله ؟!
- مروان : لسه نايم... هيفوق كمان ساعه.. ساعه و نص كده.
- شوق : تمام... و مسكت تلفونها تتصل بدينا.
- دينا بقلق : طمنيني.
- شوق : الحمدالله يا طنط بقى كويس... الدكتور اداله حاجه تنضف بطنه و هيفوق كمان ساعه ولا ساعه و نص كده.
- دينا : طب الحمدالله...يلا انا هقفل افرح سمر... سلام.
- شوق : تمام... سلام.
*************************
الباب فضل مفتوح... مكنش عنده قوه يقوم يعمل اي حاجه... اترمى مكان ما كان واقف مع شوق.....قعد يفكر في كلامه و لأول مره دموعه تنزل... كان ديما بيفكر في الي بيعمله بس عينه بتتملي بالدموع و عمرها ما نزلت... قاعد بيفكر في كل كلمه قالتها... هيا عندها حق....هو ولا حاجه.... هو مش راجل فعلاً...قام بحركه بطيئه مسك الأكياس و فضاها كلها في الحوض و فتح عليها ميه....و جاب تلفونه ومسح كل الارقام بتاعت الناس الي بيشتري منهم بس الاول عملهم بلوك عشان ميرنوش عليه تاني...و وقف بص لنفسه في المرايا و ضربها بإيده و جاب صندوق من تحت السرير و طلع منه برواز لصورته قبل ما يبدء يشرب و حطها على التسريحه.
- امير بندم : اوعدك يا شوق اني هرجع امير القديم.... آسف على اي حاجه عملتها... بس انا ندمت فعلاً...بعدين سمع حد بيخبط.
- مروان : تسمحلي ادخل؟!
- امير بحزن : اتفضل.
- مروان : انا مش جاي اشمت فيك ولا حاجه... بس جاي اقولك كلمتين و ارجع المستشفى اقف معاهم.
- امير بحزن : اتفضل... بس اول حاجه اياد كويس؟!
- مروان :اه كويس الحمدالله...
- امير : الحمدالله.
- مروان : انت ندمان ؟
- امير بحزن : اه....و ان شاء الله هبدء اغير من نفسي.
- مروان : انت هتغير من نفسك لي؟
- امير : ......
- مروان : انت هتغير من نفسك عشان شوق قالتلك ولا عشان تكسب الي حواليك؟
- امير : ........
- مروان : لو عايز تتغير بجد يا امير لازم تسأل نفسك "انا هغير من نفسي لي "
- امير : هغير من نفسي عشان ارجع اعيش تاني... عشان اكسب نفسي قبل ما اكسب الي حوليا.... انا هغير من نفسي عشان انا فوقت... شوق فوقتني قبل ما اغرق اكتر.
- مروان : لو كلامك صح.... يبقى انت عارف انت لازم تعمل اي.... انا همشي سلام.
- امير : شكرا يا مروان انك اخدت بالك من شوق في الوقت الي انا ماخدتش بالي منها فيه.
- مروان : متشكرنيش... ده واجبي... سلام.
- امير : سلام.
مروان راح للمستشفى....و دخل لقا شوق بتكلم سمر.
- شوق : الو يا سمر.
- سمر : الو يا عمتو ها اياد فاق؟!
- شوق : اه يا حبيبتي معاكي اهو.
- سمر بحزن : اياد عامل اي؟!
- اياد : انا كويس يا سمر... متزعليش انا كويس اهو.
- سمر بحزن : بس ده كله بسببي.
- اياد : مش بسببك متقلقيش... يلا اضحكي.
سمر ضحكت و ساد الصمت.... كانوا بس بيبصوا لبعض... هما اطفال اه... بس نظراتهم حكت حاجات كتير... و اياد طمن سمر... وسمر اعتذرت لإياد .
- اياد : يلا تصبحي على خير يا سمسم.
- سمر : انت من اهله يا دمدم....و قفلت....فجأه لقوا امير داخل عليهم و شكله متغير جدا.... كان حلق دقنه و ضبط شعره و كان لابس قميص على بنطلون كان شكله كويس جدا..و كانت عينه حمرا.
- امير بهدوء : شوق لوسمحتي عايز اتكلم معاكي.
*******************
يا ترى شوق هترد عليه؟!

يا ترى امير هيتغير بجد؟!
*******************

☆4 votes