أنتِ أمانتي

مقتطف

'' أنتي أمانتي ''

مقتطف

للكاتبة زهراء المياحي

~©~©~©~©~©~©~©

'' أنتِ أمانتي ''

أسيل: كاعدة علىٰ الكرسي أهز برجلي وأفرك بأيدي؛ غمضت عيوني اهد بنفسي؛ ياربي بجاه كلمن عنده جاه ابوي يطلع سالم معافنه ما بي إي شيء؛ كل دقيقه تمر تاخذ روحي توترني اكثر؛ ربع ساعه طلع الدكتور ملامحه بارده ومبين من وجها تعبان حجه برود وهو يگلب الأوراق 

الدكتور: الحمدلله تعدىٰ مرحلة الخطر يحتاج كم تحليل حتى نثبت على مضاعفات المرض ونقللها

أسيل: حطت امي ايدها على عيونها تكتم دموعها كمت على حيلي وكفت يمها متوتره حجيت باستعجال بشري شلون صار بابا؟؟ صحته شلونها شوكت يطلعونه تعدئ مرحله الخطر مو؟؟ حنكدر نشوفه

حياة: تطلع تحاليله ونشوف اندعيله

أسيل: حجيت بخوف وتوسل ان شاء الله ما بي شي مو بعيده عن رب العالمين يحلها النا
رجعت كعدت بمكاني اسمع صوت بجي أطفال وناس تروح وتچي وجوهم صفره من التعب والدكاتره نفس حالتهم مبين عليهم التعب
الحمدالله دخلنا مستشفى أهلي جان هسة مات بالحكومي الاهتمام معدوم هناك؛ دخل اخوي بيده بطال مي فتحه وانطاه لامي يهدي بيها شوي وقرب كعد يمي انطاني بطل شربت منه قليل؛ اجتي ممرضه تسولف وي امي

تقي: يالله أمشينا نرجع للبيت

اسيل: نرجع؟! وأمي منو يبقىٰ وياها

تقي: خالتي هيل هسه تجي؛ امشي ارجعج للبيت وابدل واسبح وارجع للمستشفى

اسيل: تقربت شبكت أمي مع السلامة دير بالج علىٰ بابا من يصحىٰ أتصلي بيه طمنيني حبابه حجت وياي برود

حياه: روحي الله وياج دير بالج على أخوج مو تعوفي وحده

اسيل: هزيت راسي بنعم؛ اكيد لاتخافين طلعت من المستشفى ما گلني التوتر والخوف لتفت اباوعها يربي ان شاء الله هاي اخر مرة دوس رجلي المستشفى

تقي: شنو

اسيل: أكول بلكت هاي أخر مرة نجي بيها ويطلع ابوي بسرعه وبسلامه تعبت اهواي امي

تقي: ان شاء الله

اسيل: صعدت هو يسوق؛ حطيت ايدي على گلبي تذكرت حرجع للبيت ماصدكت اصلا الگه عذر واطلع من البيت وهسه حرجع؟ ياريت بس تقبل امي ابات يمها بالمستشفى؛ رجعت اهز برجلي وادمدم بيني وبين نفسي ؛ خايفة أرجع وأشوفة حيل
خايفة منه الى متى ابقه هيج ضعيفه القوه والحيل محد يسندني الىٰ متىٰ ابقىٰ ضامه كلشي بداخلي اخاف ع يوم وانفجر وافضح نفسي!!

_ زين شلون بيها شايلتلها هم كلش جبير ياربي بيمن ورطت نفسي ماصار عمري بالعشرين واني هموم اهموم وراي وراي  لازم أشوفلي حل
أبعدى عني

_لان أذا بقيت وياة أكثر راح يدمرني ويسوي بيه شي واذا اذاني اكثر اهلي راح يكتلوني دمر حالتي النفسيه الله لا يوفقه أنتبهت لايدي يرجفن
بذكرى اتشتت

_مكان ما أضوج علىٰ أبوي اضوج وانقهر ع نفسي حرت بيا جرح اشيل هم؟! مكان ماخاف على صحة أبوي أخاف علىٰ صحتي لتفت لتقي اخذت نفس...
تقي راح تعوفني وتروح! أبقه بالبيت وحدي! لاتعوفني

تقي: ليش محسستيني أكو جني منتظرج بالبيت يريد يأكلج؟! طبعا اعوفج واروح يمج الجهال

اسيل: حچيت بصوت شبه مسموع أخخخ ياريت جني وأقراء ايات وأبعده عني

تقي: شنو؟! ماسمعت؟!

اسيل: أكول خالة سعاد موجودة

تقي: شبيج؟ منو المريض ابوي لو انتي! طبعا موجوده شنو فاقده الذاكره انتي

اسيل: درت وجهي للجها الثانيه من الشباك بتسمت فاقده الذاكره!! اشكد عجبتني الفكره ادعي انو اني فاقده الذاكره يمكن بوكتها مراح يقرب مني وياذيني

تقي: كلها موجوده بالبيت عليش تخافين حته لو بابا وماما مجانو موجودين بس الباقين موجودين

اسيل: حجيت باستهزاء وصوت ناصي...هو أنتم موجودين كلكم مارحمني هنوب خالة سعاد والباقيين؟! ليش هو يعترف بأحد؟! بس سترك يربي
لا سوي جريمة وأبتلي بي وادخل سجن واني بهل العمر

.................

_فتره المراهقه العشتها مجانت مثل سنوات مراهقه بعض البنات؛ ما سويت علاقه بالنت بدافع اتسله لو اقضي وقت فراغي جنت مراهقه تسمع كلام امها وابوها وشنو يگولون انفذ بالحرف الواحد المسبه والغلطه مجانت تعبر وتتلفظها شفايفي اكثر سبه سبيتها واني صغيره لو حقيره لو حيوانه مجنت اتعارگ وي بنات صفي ولا اسوي مشاكل وبطبعي وشخصيتي جانت حيل هاديه ومسالمه

_احب اهلي وبيتنا ولمتنا اهواي مميزه وحلوه جنت احسد نفسي على عيشتنا لانو مابيها مشاكل مابيها حروب نفسيه الشي الوحيد الجنت كلش اختنگ منه انو اهلي يعاملوني طفله عمرها 10 سنوات واني كبرت وصلت لل14 سنه 15 سنه وهما مستمرين يعتبروني طفله حتى مو مراهقه هذا الشي ضعفلي شخصيتي اهواي

_من موجودين حولينا ناس غربه جنت اتلبگ بالكلام واتلعثم حراره جسمي كلها ترتفع؛ اذا احد اذاني اسكت وما احجي اخاف ارد علي واهلي يحاسبوني؛ ماعرف اكعد يم خطار؛ اكبر احلامي جانت يصير عندي مسؤليه قويه تطلعني من جو الشخصيه الضعيفه العندي

_مرت أيام اتخيل بيها نفسي انزل من سيارتي والي سلطه جبيره على الناس ؛ متسامحه وكريمه وهيبتي بمحلها هاي الأحلام استمرت سنوات بعقلي اتخيلها وكل ما انزل اريد اساعد امي بغسل اماعين او اساعدها بطبخه معينه متقبل تگلي بعدج صغيره اهواي تحطمني هل الكلمه وتاذيني بس بسبب شخص واحد گدرت اعتبر نفسي انثى بسببه كمت التفت لنفسي بالمرايه واتغزل وارتب شعري وملابسي واحسن من اسلوبي واطباعي
وهل الشي جان كلش غلط التچأ لانسان حتى احب نفسي!!

يتبع...