حسام قال لي شجن أصلا أمي عايزه تقول ليك إنو الليله جايين خالاتي 😊 قلت ليهو يشرفو قال لي بس هم ما جايين عندنا هنا جايين لـ أمي أصلا عندهم جمعية الأهل كل مره في بيت وحده من خالاتي والليله عند امي ✋ قلت ليها اهااا تمام 😊 قال لي يعني ح تمشي تسلمي عليهم قلت ليهو إحتمال أمك عزمتني كـ أداء واجب لأنو ما كان بتحب إني أقابلهم وحتى خالاتك ما بتشرفو بي قطع كلامي وقال لي شجن ده كان زمان وإنتهى 😒 هسي لو حبيتي تمشي تسلمي عليهم خير ما فعلتي ولو ما حبيتي انا ما ح أجبرك ✋ قلت ليهو بحاول أمشي ليهم ان شاء الله قال لي ان شاء الله بلغة السودانين معناها لاااا اوك راحتك هز راسو وطلع الشغل 😊 الضهر سمعتهم يضحكو وانا قاعده تحت الشجره بعدها جاتني خالتي ليلى قالت لي شجن اخواتي وصلو تعالي سلمي عليهم رديت ليها نفس رد حسام ان شاء الله 😊 وكنت متردده في إني أمشي ليهم لأنو عندي فوبيا من اللمه وقلت لو مشيت أكيييد أخواتها ح يطاعنوني بحقيقتي وانا ما ح أقدر أرد عليهم عشان كده أبعد عن الشر وغنيلو وفضلت قاعده تحت شجرتي 😓 بعد شويه خالتي ليلى نادتني قالت لي منتظرنك بالجبنه إتشجعت ومشيت سلمت عليهم ولقيت خالتي ليلى في المطبخ بتعمل في الشاي قلت ليها إرتاحي بعملو أنا 😊 قالت لي والله انا ناديتك عشان تتونسي معاهم ما عشان تشتغلي 😓 قلت ليها ما مشكله وفعلا عملت الشاي والجبنه وقعدت إتونس معاهم " العصر إتصل حسام قال لي شجن انتي وين 😒 ؟؟ قلت ليهو ح أكون وين أكيييد في البيت قال لي بس انا هسي في البيت وما لقيتك 😓 قلت ليهو تعال ناس امك إتخلع قال لي وووين 😳 وفعلا بعد جا لقاني شغاله في المطبخ بحضر في الغداء قال لي ما إتوقعتك تجي 😍 قلت ليهو جاتني خالتي ليلى وما حبيت أحرجها باسني في خدي بطريقه سريعه وقال لي عمرك ما خيبتي ظني فيك 😘 إتخلعت قلت ليهو حسام أطلع من المطبخ عشان أقدر إشتغل 😡 وبعد طلع حضرت الغداء وانا شايله الصينيه سمعت خالة حسام قالت والله يا حسام مرتك مرت السرور انا ما عارفه عرست فيها سماح كيف 😏 ( خالتو دي كانت في قطر ما حاضره عرس سماح ) حسام رد ليها والله عرستها غلطه بس عشان أرضي أمي خالتو إتلفتت علي أختها قالت ليها يعني من الاول ما كنتي عارفه سماح زي أمها وعندك مرت ولد زي شجن كيف تفرطي فيها وكنتي مفهمانا طبع شجن غلط وظلمناها معانا 😒 حسام لاحظ لي واقفه قال خلاص يا جماعه ممكن نقفل الموضوع ده 😓 نطيت انا قلت ليهم كل حاجه قسمه ونصيب وسماح كان ليها نصيب وأخدتو وختيت الصينيه وطلعت ✋ خالة حسام قالت بالجد بنت الإصول بالتربيه ما بالأهل ✋ حسام حصلني في المطبخ وقال لي شجن زعلتي عشان سيره سماح 😢 قلت ليهو مافي سبب يزعلني قال لي أعرفي انو سماح ماضي وانتهى ✋ قلت ليهو صح وعايزه أمشي حبسني بيدو قال لي لو الهنا وأشر بأصبعو في قلبي بتظهري في تعابير وشك كان ريحتيني بس مشكلتك كتومه 😓 قلت ليهو والله ما زعلانه جات أمو داخله إضطره فكاني 😅 وبعد الغداء حضرت التحليه والشاي وخالاتو يشكرو فيني وإعتزرو مني على الخلاف الـ كان بينا ✋ وبعد الضيوف طلعو غسلت العده ونظمتها في مكانها خالتي ليلى قالت لي شكرآ ليك والله ما قصرتي 😘 قلت ليها لا شكر على واجب 😊 ورجعت بيتي لقيت حسام مجهز السراير والحفاظه مليانه مويه بارده إستغربته قلت ليهو حاسي بشنو 😳 ؟؟ قال لي مبسوووووط ما أكتر لم مرتي تساعد أمي وتريحها من حقها لم تجي راجعه بيتها ترتاح صح 😘
وعدا شهر والمره دي الجمعيه عند خالتو لـ حسام قلت لـ حسام اتجهز عشان توصل امك ما تتأخر عليها 😊 قال لي بس أمي قالت ما ماشه قلت ليهو ليييه 😳 ؟؟ قال لي ما عارف قلت ليهو خلاص انت أجهز وانا بقنعها مشيت لـ خالتي ليلى وقلت ليها لو عشان عمي وحازم إمشي وإطمني بعمل ليهم الغداء 😊 قطعت كلامي وقالت لي أنا لغيت المشي ما عشان عمك عشانك انتي 😓 قلت ليها كيف يعني أنا السبب 😳 !! قالت لي مكان ما فيهو انتي حرمان علي 😓✋ وحاولت أقنعها بس رفضت في الآخر قلت ليها طيب أجهزي انا ح أمشي معاك 😊 ورجعت البيت لقيت حسام راقد قلت ليهو انت لسه ما إتجهزته وخالتي غيرت رأيها ماشه قال لي أقنعتيها بشنو 😳 ؟؟ قلت ليهو ده سر وبدأت إتجهز حسام بخلعه قال لي إنتي برضو ماشه 😳 قلت ليهو عندك إعتراض 😒 قال لي بالعكس بتمنى نعيش حياتنا بصوره طبيعيه وتتعرفي علي كل أهلي 😍 وكنت بتجهز بآخر نفس لاني مجبوره على المشي 😓 عايزه ألبس التوب لقيتو شابك إتلفت لقيت حسام ماسك التوب قلت ليهو بحده حسام ده ما وقت هظارك 😠 قال لي شجن ما تمشي ولو عشان أمي ح أقول ليها انا الـ منعتها 😓 قلت ليهو ليييه ما أمشي 😒 ؟؟ وبعدين قلت ليك ما تدخل في علاقتي مع أمك 😓 جراني من التوب وقربني منو قال لي بس في الحاله دي ما بقدر أسكت لأنو ما ممكن تمشي وانتي صاره في وش أمي كده وفي نفس اللحظه ما عايزك تعملي حاجه وانتي مجبوره 😓✋ قلت ليهو إطمن أولآ ما صاره لأمك وثانيآ ما مجبوره ماشه بكل رضاي بعد ده ممكن تفك التوب 😓 قال لي بتمنى تكون دي الحقيقه 😊 بعد وصلنا البيت وقبل ما ننزل حسام قال لي شجن أفردي وشك شويه ملاحظ ليك طول الطريق صاره 😒 هسي عندك فرصة ممكن ترجعي معاي ابتسمت ونزلت من العربيه اول ما دخلنا إستقبلوني أحلى إستقبال 😍 وبعد شويه جات وحده لاحظت ليهم سلمو عليها من غير نفس وبطرف اليد 😓 وخاصه حسام إتضايق من وجودها وأول ما المرا قعدت حسام طلع برا وبعدو طلعت خالتو القاعدين في بيتها وبعدها طلعت خالتي ليلى 😳 وكلكم وقفو يتكلمو في الحوش ما كنت سامعه كلامهم بس ملاحظه لتعابير وشهم وخاصه حسام كان متنرفز شديد 😱 المرا لفتت إنتباهي قالت لي إنتي شجن صح قلت ليها اي 😊 نطت خالة حسام الـ كانت قاعده معاي في الغرفه قالت ليها دي شجن زينة البنات لـ حدهن 😍 وانا قلبي كان مشغول في الـ بيحصل برا شنو ؟؟ وليييه مجتمعين أكييد بيتكلمو عني لأنو أنا الوحيده الغريبه بينهم يعني عازمني عشان يقطعو فيني قدام عيوني 😏 إستحاله أسكت ليهم والفضول قتلني طلعت قلت ليهم بعتزر للتطفل بس حسيت انو كلامكم ده بيخصني 😊 خالة حسام قالت لي لااا دي مشكله بسيطه واتحلت وانا مثبته عيني في حسام وملاحظه كان متوتر ومدخل يدو في جيبو واليد التانيه بيمسح في شعرو قلت ليها والمشكله دي انا السبب فيها صح ✋ امو قالت لي أكييييد لااا حسام قال لي اي عندك فيها دخل سكت مسافه وقال لي شجن ح ترجعي معاي البيت 😓✋ ""
#يتبــــع ⏪⏪⏪⏪
