قلت لـ حسام حمد لله علي السلامه هز راسو ودموعو نازله قلت ليهو مستكتر تتكلم معاي ما عايز ترد لي بـ لسانك 😓 إتلفت مني بالإتجاة التاني بس رد لي حازم قال لي نسيت أقول ليك إنو عاملين ليهو عمليه في لسانو وحاليا ما بيقدر يتكلم 😔 طبعا بعدها انهرت تماما بس حبست دموعي معقول ده حسام في لحظه يكون في الوضع ده وقلت لييهو آسفه ما كنت عارفه 😢 حازم قال عن إذنكم أخدو راحتكم ✋ وطلع من الغرفه أنا قربت من حسام وقلت ليهو ممكن أطلع مع حازم لو وجودي مضايق 😊 إتلفت وهز راسو لاااا أشر لي بيدو عشان أقعد جنبو في السرير طلع التلفون وكتب انا آآآسف كنت فاكر إنو ح نرجع زي الأول وعلاقتنا ح تتصلح عشان كده رفضت أطلقك بس ما كنت متوقع يحصل معاي كده و حاليا من حقك أنفذ طلبك 😔 بعد قريت الكلام مسحت دموعو بيدي وقلت ليهو زهجت مني بالسرعه دي ياااخ على الأقل خليني أتم معاك 24 ساعه حتى تذكر لي سيرة الطلاق 😒 وبعد ده كلو انا ح أرفض أطلع من البيت ولو طردتي من غرفتك ح أقعد في الهول 😊✋ وآخير لاحظت للإبتسامه في وش حسام ومسك يدي بس في الحقيقه انا ما كنت مبسوطه وكنت قاعده معاهو من باب الشفقه لا غير 😓 فكيت يدي عايزه أطلع مسكني عشان ما أمشي 😢 ؟؟ قلت ليهو عايزه أدردش مع خالتي ليلى حسام هز لي راسو لااا 😓 قلت ليهو ما ظريفه والله بقعد معاها بسيط وأجي راجعه 😊 طلعت لـ خالتي ليلى في الهول وقلت ليها عايزه أوضح ليك معلومه أنا جيت راجعه هنا من باب الإنسانيه يعني إطمني ما عايزه أرجع علاقتي بـ حسام 😊 وبالنسبه لمشاعري ناحيتو ماتت زماااان من يوم عرس فيني وإتهمني بالسرقه قطعت كلامي وقالت لي والله ما عارفه أشكرك كيف 😍 ؟؟ قلت ليها تشكريني بطريقه بسيطه اول ما حسام يتعافى تقنعي يسلمني ورقتي ✋ قالت لي يا بنتي إنتي لسه ما سامحتينا 😢 قلت ليها إعتبري ده شرطي الأساسي ✋ ورجعت الغرقه وحسام كل ما يشوفني يتبسم 😊 وفضلت جنبو وبعد نام فكرت أعمل ليهو مديدة دُخن إتزكرت أمي كانت بتعملها وبتقول لينا مغذيه دخلت المطبخ خالتى ليلى قالت لي عايزه حاجه 😊 قلت ليها انا لو عايزه حاجه لروحي كان رجعت عملتها في بيتنا بس عايزه أعمل لـ حسام مديده ✋ قالت لي الله يبارك فيك واثناء ما بجهز فيها سمعنا صوت حاجه إتكسرت في غرفة حسام جرينا بسرعه ناحية الغرفه لقينا كباية قزاز مدشدشه في البلاط وحسام منفعل وصّاري وشو خالتي ليلى قالت ليهو في شنو يا ولدي 😳 ؟؟ إتلفت علي وبـ نرفزه أشر لي بيدو بس ما فهمتو قلت ليهو كيف أنا منو 😒 !! أمو قالت لي لااا قصدو مشيتي وين ؟؟ رديت قلت ليهو أهااا كنت في المطبخ أمو قالت لي خلاص يا بتي خليك جنبو وانا بتمها ✋ بعد أمو طلعت قلت ليهو عايز مويه هز لي راسو لااا قلت ليهو طيب ليييه كاسر الكبايه 😓 كتب لي في التلفون كسرتها مخصوص عشان تسمعو الصوت وتجو لأنو ما بقدر أناديكم 😔 كلامو أثرني قلت ليهو طيب ليييه كنت منفعل ؟؟ كتب لي عشان كنت فاكرك تركتي البيت للمره التانيه وإتخليتي عني 😢 قلت ليهو إطمن أنا قااااعده بس أكيييد ما ح أقعد أحرسك في الغرفه زي الطفل حسام تعابير وشو إتغيرت لـحزن 😢 وأنا حسيت بتأنيب الضمير بس والله ما كنت قاصده بس حاولت أصلح كلامي وقلت ليهو كنت بعمل ليك في مديده عشان تتغذى وتقدر تقيف علي رجلك 😊 ولسه تعابير وشو حزينه خلخلت شعرو بـ يدي وقلت ليهو ولأ حابي انو نقضي باقي حياتنا كده طيب الـ ح ينفذ لي طلباتي منو ؟؟ وآخيرا إبتسم 😍
المساء زارنا ياسر وقال لـ حسام ما شاء الله ما شاء الله خلال يوم واحد وشك نور لو عرفنا السحر الإستخدمتو ليك شجن كان عملنا ليك من أول يوم 😂 حسام إبتسم ياسر إتلفت قال لي شهر كامل وانا بحاول معاهو بكل الطرق عشان أظهر الإبتسامه دي على وشو بس دايما كان بيطردني من الغرفه وبيحب يقعد لـ وحدو 😏 حازم قال ليهو ده سحر ما بنقدر عليهو إسمو سحر الحب 😍 وطبعآ انا دوووبت من الخجل حازم قال ليهو وحتى الحبوب من يد شجن بياخدها من غير نقاش 😅 انا بسبب كلامهم طلعت من الغرفه وبعد خلصو دردشه وياسر خلاص طالع بيتهم ودعنا قال لي بهمس شجن عايزك دقيقه 😊 بعد إنفردنا قال لي انا متأكد انك ما مرتاحه هنا بس انا عند وعدي ليك لو إحتجتي لأي حاجه انا في الخدمه حتى لو دعم مادي والمره دي عشان خاطر حسام تمام ✋ هزيت راسي حاضر بعد شهر مشينا المقابله الدكتور قال لـ حسام حاول إتكلم بس حسام بيحرك شفاهو من غير صوت وهز راسو ما بقدر 😢 الدكتور كشف عليهو وقال ليهو حاول بس هز راسو للمره التانيه ودي كانت صدمه بالنسبه لينا والدكتور كتب ليهو يعمل صوره ورجعنا البيت بـ خيبة أمل 😔 وطول الطريق كل الأسره كانت بتصبر في حسام وإنو أكيييد ح يتكلم 😓 وصلنا البيت وبعد دخلنا الغرفه سمعت صوت قال شجن إتلفت على حسام بس كـ العاده ساكت 😳 وتاني سمعت صوت خافض قال حياتي قلت ليهو حسام انت سمعت ليك صوت 😢 هز لي راسو لاااا قلت أكييييد يا الغرفه مسكونه يا أضاني مسكونه 😳 حسام أشر لي عشان أصلح ليهو المخده وفعلا قربت منو أصلح المخده همس لي في أضاني عشقي إنتي 😍 لو ما كان ماسكني من خصري كان فتحت الباب وطلعت جاريه 😅 طبعا إتخلعت قلت ليهو حسام وغلبني أعبر دموعي جرت 😭 مسحها بيدو وقال لي دي دموع الفرح ولأ زعلانه عشان تاني ح تسمعي صوتي وح أقدر إتناقش معاك وباسني في خدي 😘 وفضل يهدي فيني قلت ليهو دقيقه أكلم عمي حسن مسكني من يدي ومنعني قال لي حتى هم عايز أفاجئهم بكره 😍 قلت ليهو طيب ليييه ما فاجأتنا كلنا وإتكلمت جنب الدكتور قال لي عشان عايز إنطق إسمك أول حاجه وما ح أقدر أنطقو جنب الدكتور 😍 طبعا من الفرحه هو بتكلم وانا بس بعاين فيهو قال لي بتعاين لي كده ح تسحري صوتي الرنان قولي اي حاجه 😘 قلت ليهو حسام وسكته طبعا ما قادره أستوعب واعبر عن فرحتي وكان زي الحلم ضماني عليهو وهو يضحك من حالتي 😅 قال لي فضل بكره أشوف ردة فعل أهلي ح تكون كيف وفعلا اليوم التاني أثناء الشاي حسام قال ليهم ما إشتقتو لـ صوتي طبعا كلهم إتخلعو وحازم عايز يتناول الكبايه يشرب بالخلعه دفقها في جسمو 😱 وكلهم بعد إستوعبو إجتمعو حول حسام وامو شغاله تبوس فيهو ودموعها جاريه 😭 وكانت أحلى مفاجأه وبالنسبه لمشكلة المشي حسام مواصل في العلاج الطبيعي مع دكتور وفي البيت بيحاول يتمشي وكنت بتابع تمارين الدكتور وبعملها ليهو بصوره مستمره ✋ وفي يوم وأثناء ما بنتمشى في الغرفه الباب فتح ودخلت علينا من غير ما تستأذن 😱 ""
#يتبــــع ⏪⏪⏪⏪
