Aya Hikmah dina Musibah
Reuwas lain di kieuna nampa bèja kitu tèh. Kuring sakulawarga taka mata simeuteun. Atuh da teu sangka, teu sangka kasusna jiga kitu, korbanna loba deuih, lain saurang dua urang. Para korban kompak ngalaporkeun kasus panipuan ieu ka pulisi.
Kiwari cenah manèhna geus dicerek ku nu berwajib pikeun dipènta katerangan saluyu jeung laporan nu katarima.
Dua bulan waktu pikeun silih pikawanoh jeung Kang Hadi tèh. Basa kulawarga Kang Hadi nganjang munggaran, langsung nanyaan jeung nangtukeun tanggal kawin, limalas Rayagung geus pasini. Hubungan jeung Kang Hadi tèh lain karep sorangan tapi diamprokeun ku nu jadi Aki. Majar cenah baheula aki jeung bapana Kang Hadi kungsi kedal jangji rèk bèbèsanan. Mimitina mah kuring nolak, da rumasa saukur urang kampung bau lisung, sapopoè ulukutek di lembur. Rupa teu sabaraha tibah ised meueusan ti nu disebut jajar pasar. Sakola bisa tamat SMA gè meunang hèsè belèkè ku taya waragadna tèa. Teu sakupu jeung Kang Hadi nu kaluaran paguron luhur, malah cenah ayeuna keur neruskeun S2na. Tapi aki ngalelemu, keun waè cenah asal urang bisa ngigelanana 'perbedaan' eta moal ganjor teuing. Jeung deui Kang Hadina sorangan langsung panuju, pas ningali kuring langsung cop, cenah.
Dua bulan waktu pikeun persiapan kawinan, waktu nu bener-bener samporèt. Tapi ceuk ti pihak lalaki ulah riweuh-riweuh cenah, sagalana geus ditangkes make jasa wedding organizer. Ti mimiti gedung, konsumsi, salon, surat ondangan jeung sajabana. Kuring sakulawarga mah cicing waè, nu penting kè siap dina waktuna.
Hiji poè Kang Hadi datang ka imah dibarengan ku hiji awèwè geulis, dangdanan modis, kekinian.
Ngaranna Dèwi, cenah babaturan kuliahna nu boga jasa WO tèa.
Kuring diajak ka hiji tempat, salon rias pangantèn pikeun fitting baju. Balik ti salon kuring diajak ka emol, balanja pangabutuh kuring pikeun tanggeuyan seserahan. Sajeroning balanja Dewi nu riweuh pipilih. Baju, sapatu, kantong mèh kabèh pamilih Dèwi. Kuring kur cicing teu wani baha sanajan èta pakèan lain selèra kuring. Komo pas lebah ngajèngjrèngkeun setèlan jeroan, kelir beureum burahay, aya rèndaan na sisi-sisina. lh, nempona gè èra parada, komo deui makèna.
Kang Hadi jiga nu teu paduli ka kuring, manèhna geus mercayakeun sagemblengna ka Dèwi, ceuk manèhna naon nu ceuk Dèwi alus, pasti cocok ogè keur kuring.
Sanggeus dikira kumplit kuring dianteurkeun balik, barang balanjaan mah dibawa ku Dèwi rèk dihias keur seserahan tèa.
Waktu mingkin nyèrèlèk. Dua minggu ka acara walimahan sasalad datang. Sakabèh pangeusi nagri kudu cicing di imah, teu meunang aya kerumunan. Acara-acara nu sakirana ngumpulkeun jalma rèa kudu ditunda atawa dibolaykeun nepi ka waktu nu teu ditangtukeun. Pon kitu deui acara walimahan kuring, daèk teu daèk kudu bolay.
Sabulan satutas acara bolay, perhatian Kang Hadi ka kuring karasa bèda. Biasana mèh saban poè nelepon atawa chat na WA, kiwari geus mèh saminggu taya iberna. Kungsi kuring nelepon tapi teu diangkat, WA ogè teu dibales.
Keur riweuh meureun, pikir tèh husnudzon waè.
Kamari, pabeubeurang aya bapana Kang Hadi nepungan Aki. Katingal paromanna juga nu baluweng. Kuring disaur ku Aki, laju diuk ngariung jeung aranjeunna.
Bari pok deui, pok deui mènta dihampura, derekdek bapana Kang Hadi nyaritakeun naon-naon nu jadi bangbaluh manèhna. Horèng salila ieu manèhna geus ditipu ku anakna pituin. Kang Hadi satuju daèk diamprokkeun ka kuring tèh geuning saukur akon-akon.
Basa Hadi mènta duit ratusan juta nu disebut keur biaya pèsta jeung sagala rupana, golosor dibikeun ku bapana. Taya curiga nanaon, da èstu ka anak sorangan, percaya wè.
Horèng simana horèng duit nu sakitu gedèna tèh dipakè keur kapentingan manèhna jeung Dèwi nu taya lian ti balad kumpul kebona.
Talajak Hadi mimiti kabongkar basa aya sababaraha urang jalma datang ka imah nanyakeun Hadi. Cenah maranèhanana geus katipu ku WOna Hadi jeung Dèwi. Duit geus asup mèh satengahna, tapi barang dikonpirmasi ka pihak salon jeung katering tacan asup sapèrak-pèrak acan. Kitu deui balanjaan keur seserahan, lebeng taya laratanana.
Teu kaampeuh cimata bedah, antara nalangsa jeung bungah. Nalangsana ras ku kalakuan Kang Hadi nu sakitu tègana ngawiwirang kulawarga kuring jeung kulawarga manèhna. Bungahna, Alloh geus ngabuka aib Kang Hadi samèmèh kuring sah jadi pamajikanana.
'Hmmm ..., nuhun korona!' hatè gagerentes.
Boa jigana kuring hiji-hijina jalma di sakuliah ieu dunya nu nyebut nuhun ka si korona. Sab ku ayana ieu sasalad kuring teu jadi ngajatuk rami jeung Kang Hadi.
Jalma mah saukur ngarencana, nu ngajadikeunana mah anging Alloh, pangèran nu murbeng alam.
