Restart

Extra ⚠⚠⚠

ရိပေါ် သားသားမလာခင် အငိုရပ်ကာ မျက်နှာသစ်ပြီး ရေပါချိုးလိုက်သည်။ ထိုအချိန်ထိ ဦးကျန့်က အခန်းထဲ ဝင်မလာပါ။ ညနေကထဲက အခန်းထဲက ထွက်သွားတာ သားသားပြန်ရောက်လာသည်အထိ အခန်းထဲပြန်မဝင်‌‌ေပ။

*ဒက်ဒီရော..ပါးပါး*

*အလုပ်လုပ်နေတာ နေမှာပေါ့ သားသားရဲ့..!ပါးတို့ ညစာစားကြမယ်*

စကားများထား၍ ရိပေါ်မှာ ညစာစားဖို့ ဦးကျန့်ကို သွားမခေါ်။ သားသားစားဖို့ သေချာခူးခပ်ပြင်ပေးကာ ဇွန်းတပ်ပေးလိုက်သည်။

*ဟာ..ဒက်ဒီ့သားလေး ပြန်ရောက်လာပြီလားကွ*

အလုပ်ခန်းထဲကနေ ဒယိမ်းဒယိုက်ထွက်လာသည့် ဦးကျန့်က သားသားကိုလဲ မြင်ရော ကိုယ်ရှိန်သပ်ကာ သားသား ပါးတွေကို မွှေးကြူနေလေသည်။

*ဒက်ဒီ့ဆီက အရက်စော်ကြီးနံတယ်*

*ဒက်ဒီက..နည်းနည်းလေး..နည်း‌နည်းလေးပဲ သောက်ထားတာပါကွာ*

သားသားဘေး ဝင်ထိုင်လိုက်သည့် ဦးကျန့်က အရှိန်မထိန်းနိုင်ပဲ လဲကျမလို ဖြစ်သွား၍ ခုံကို အားပြုကိုင်လိုက်သောကြောင့် နည်းနည်းရုပ်ပျက်သွားလေသည်။

*ဒက်ဒီက အရက်သမားကြီး..!!*

ယိုင်ထိုးနေသည့်အပြင် အကျီရင်ဘတ်ဟပြဲနဲ့ သူ့ဒက်ဒီ့ကို သားသားက ကြောက်နေဟန်။ သားသားရှေ့ အခုလောက်ထိ ရုပ်ပျက်အောင် ဦးကျန့်က တစ်ခါမှ မနေခဲ့ဖူးပေ။

*ဦးကျန့် မူးနေရင် အိပ်လိုက်ပါလား..?*

*မင်းပါးစပ်ကိုပိတ်ထားလိုက်*

စားပွဲကို ထုပြီး အော်လာသည့် ဦးကျန့်ကြောင့် သားသားက လန့်ပြီး ငိုသွားသလို ရိပေါ်ကလဲ မျက်ရည်တွေ ကျလာသည်။

ရန်ဖြစ်လို့သာ သူတစ်ပြန် ကိုယ်တစ်ပြန်အော်ဖူးပေမယ့် အခုလိုကြီးတော့ မအော်ဖူးပါ။ရိပေါ် ဝမ်းနည်းစိတ်ကြောင့် ကျလာသည့် မျက်ရည်တွေကို လျစ်လျူရှုကာ ငိုနေသည့် သားသားဆီ သွားရသည်။

*ဒက်ဒီ့သားလေးက လန့်သွားတာလား..အေ့..! သားလေးရာ..*

ဦးကျန့်က သားသားပါးတွေကို ဖျစ်ညှစ်ကာ ချော့ပေမယ့် အငိုမတိတ်တော့ပေ။