صدفه

البارت الحادي عشر

ردت اكلك وستحيت كلمه بين شفافي باتت من كثر حرها نجويت كلمه صار سنين المه حيرتني وماغفيت وردت اكلك وستحيت 💔

_______________

شمس : وهيه تبجي يعني شنو بابا هاي هيه حتزوجني بدون رضاتي

سرحان : ولج بويه لاتحركين كلبي كتلج حرجوني والله ماكدرت افشلهم وهمه متعنين وجايبين هاي الشيوخ كلها وهم ماردت افشل جدج وعمامج ويطلعون الناس زعلانين

شمس يعني عادي تضحي بيه بس حتى متفشل الشيوخ

سرحان : ولج بابا فهميني والله على عيوني الصار

بس صدكي بيت الشيخ خالد انه اعرفهم ناس ذهب وهذا عمج ياسر كدامج هوه صديق عمار واكيد يعرفه ويعرف اخوانه شنو ماتحجي ياااسر فهمها

ياسر : سمعي مشمش انه مو لان اريداقنعج هيج احجي ولا لأن اخو صديقي لا ترى لو شمايكونون عزاز عليه انت اعز لانج مو بس بنت اخوي لاوالله بنيتي

بس يابه الحق يقال الولد خوش ولد واهله كلهم ذهب وان كان متزوج هاي بعد قسمتج وانت عاقله وفاهمه
واكيد راح تكدرين تتعايشين وي الوضع

شمس : عمو اني مااكدر اخذ رجال من زوجته صعبه والله صعبه

ياسر : شوفي حبيبتي انت لاتباوعين الها من هذا الجانب فكري انو هوه شكد يحبج وهيج سوه حتى يحصل عليج
فكري انو انت راح تعيشين وي صديقتج بنفس البيت

فكري راح تصير عندج عائله وزوج يحبج

واهم شي انج مراح تكسرين كلمة ابوج وجدج الانطوها كدام شيوخ كبار

شمس : محد يفهمني منكم محد وضليت اشهك بصوت عالي وابجي ماما كعدت يمي وبابا شفته كلش انقهر خفت لا يصير بي شي من القهر لان هوه اكيد يحس بالذنب
فسكتت بطلت بجي بس كلش مقهوره فارس كاعد كبالي وحاله اصعب من حالي بس شبيدي عليه والله دائما ادعيله ربي يشيل حبي من كلبه ويرزقه بأنسانه تسعده

بابا سأل جدو

سرحان : زين يابه انتم اذا تدرون بيهم يردون يجون غير تخابروني تبلغوني جا التلفونات المن خلوها
ليش خليتوني هيج اتفاجئ

الشيخ حامد : بيويه عبالي تدري وقابل وهمه جايبين المشيه بس حتى يقرون الفاتحه لهذا زعلنه كلنه عليك كلنه شلون ينطي بنته بلا مايرجع النه وحته جيتنا كلنه نحضر كدام الناس حتى مانفشلك ولا نقلل من قيمة شمس وكلت بس يطلعون نرد للبصره
ماادري همه جايبين هاي الشيوخ كلها وجايين وانت اصلاً ماتدري

سرحان : شلون تتوقعها مني بويه معقوله انه اخليكم وره ضهري وانطي وحده من بناتي بله شوركم

بقو يسولفون على الاوضع والاخبار وماما والبنات جابن العشه اني ماردت مشتهيت العلاجات الجاي اخذها اغلبها مكملات غذائيه ومال فقر دم فتخليني انام هواي واني بجيت هوايه فنمت نوم عميق رغم الهوسه والسوالف اليمي بس غفيت