صدفه

البارت الثامن عشر

‏نشف دمعي ونسيتك والعشك مات
جنازة وغربت بيد اليشيعون
اذا هانت عليك العشرة والزاد
عليه دموع عينك باجر تهون
لا تصدك أحن للما وفه وياي
خلك دفان وهواي اليموتون
روح وما اكلك الله وياك
لأن ما يوكف ألله وي اليخونون💔

______________________________

شمس: بعد مااجوي اهلي واجوي اهل اسد وصار كلام واخواني  تعاركو وي اسد وحسب كلام ستار هوه غالط عليه كدامهم وكايم عمار ضاربه راشدي بنص الديوان  وطارده بره

بعدين من طالعين ورايدين يروحون جان هوه بره واكف هم حاجي مااعرف شنو وهمه اخواني  اصلاً متحملين عليه ضاربي وصايره هوسه

المهم بعد يومين اهلي راحو  لان بعد عشر ايام زواج حسام وعمو ياسر يروحون اسبوع ويرجعون الزواج يصير بالبصره واثنينهم نفس اليوم وثاني يوم يرجعون اهلي وحسام ورنا البغداد فكالو نروح ونجي قبل العرس بيومين

واني راح ابقى ببيت جدو بس حسن راح يبقه ويايه هنا كال خاف تحتاجين شي وتستحين من الولد وعمي وهم علمود حجي الناس لان نضيمه مراح تعوفج بحالج على الاقل اخوج وياج محد يكدر يحجي

بعد مراحو اهلي اني استمريت اداوم وعمو ياسر يوديني ويجيبني وهم هوسه التحضيرات مالت زواجه خطيه محد عنده بس اني كتله اني اروح وياك ونجهز اي شي تحتاجه الك او للغرفه هيه العروس مختاره الغرفه بس احنه نجهزها

ياسر : مشمش شلون تروحين وانت بهذا وضعج بعدين هاي السوالف تحتاج مره كبيره تصير افهم بهيج شغلات وامج ماراح تلحك من تجي

شمس : عمو اني حخابر شيخه زوجة عمار متكول شي هيه حبابه

ياسر : انت اتصلي بيها وشوفي شنو تكول

شمس : رحت اتصلت دك دك ومحد يرد توني اريد اقطع الاتصال رد عمار

عمار : الووووو هلا بويه شلونج يلغاليه

شمس: هلو عمو شلونك اني الحمد لله زينه شنو خاله شيخه نايمه

عمار : لا بالحمام  هسه تطلع خل نسولف علما تجي

شمس : ههههههه شنسولف عمو

عمار : سولفيلي شلون صرتي

شمس : الحمد لله عمو محد يموت وره احد

عمار : اي الحمد لله اريدج دوم قويه هسه كليلي وليدنه شلونه

شمس : عموووو منو يكول ولد يجوز بنوته

عمار : بويه اذا يشبهج انريده بنيه مانريده ولد

شمس : ليش

عمار : جا بويه خافنه يطلع مايع ووين يرهم عدنه زلمه مايع

شمس : عموووو ابني مو مايع بعدين هوه شعليه بالشكل حسب تربيته