الشاهين

٢

امي قالت لي م بتسلمي للضيوف؟

عاينت ليهم بطرف عيني وقلته ليهم السلام عليكم

الولد قال لي وعليكم السلام والبت رددت السَلٱمٌ وراهو،

فجر قالت ليهم احم شهد شكلها م عايزة تعرفني عليكم  السلام عليكم ي جماعه انا فجر صحبة شهد في الجامعه،
ابوي ضحك قال ليها اهلاً ي بتي حبابك يااخي كيفك،
قالت ليهو الحمدلله ي عمو وانت كيفك الف الحمدلله على سلامتك م تشوف شر ي رب ،
قال ليها تسسلمي ي بتي الله يعافيك ي رب

امي قالت ليها اهلاً ي بتي اهلاً اهلاً حبابك قامت وحضنتها

بقيت اعاين يمين وشمال عيني وقعت على حاجات في اكياس وفي الدرج جايبين معاهم علب حلاوة وبارد،وفواكه مالين الغرفه

ابوي قال اشر علي بي يدو وقال ليهم دي بتي الصغيرة،

الولد قال ليهو اي بنعرفها لاقيناها في القسم،

عاينت ليهو بقرف ف سكت

ابوي ضحك وقال ليهو اصلاً الغلبه دي كلها عملتها هي

غلبه؟ يعني ي ابوي بتسمي دي غلبه؟"قلته الكلام دة في جواي"

فجأة الباب فتح جا داخل مهند ومعاهو واحد،الواحد دة الكان واقف معاه برة

الزول التالت القاعد  جمب البت واخوها قال لي ابوي:والله لو جينا للصح دي م غلبه ي حاج معاها حق دي حاجه م بتتفوت بسهوله نحن ك نظامين عارفين الحاجه دي بس برضو زي م شرحنا ليكم موقف البت حساس شويه وصعب مع اهلها  والا انا زاتي كنت قلت ليكم القانون ياخد مجراه لانو دة الصح،

ابوي:ي ولدي طيش الشباب  دة راااقد اسألني انا دة عندي واحد قدامي بس نقول شنو غير  الله يعقلهم!!!

امي:والله هو طيش واي شي لكن على الاقل الزول مدام غلط يقيف ويعترف بغلطو ولا شنو ي اولادي عشان روح البني ادم دي كمان ماااا هينه

مهند:خلاص ي امي الناس شرحو ليكم وضعهم واعتذرو ومستعدين يعملو البتطلبوهو من تكاليف لخسارات  ووافقتو واتفقتو  تاني شنو خلاص ي جماعه حصل خير وقدر الله ماشاءالله ولو مشينا القانون بدينا نفس الخيارات الهسي قدامنا دي ف شنو نحن قلنا الجرجرة اصلاً م حبابها ونحلها ودياً وكفى الله المسلمين شر القتال

ابوي بقى يعاين لي وانا بعاين ليهم بغييييظ وقرف،ربعت يدي وقلته ليهو يعني خلاص اتفقتو وحليتوها ودياً كدة صح؟ وعلشان عايزين تحلوها ودياً انتِ ي امي م كنتِ عايزاني اصل المستشفى عايزاني امشي البيت وسمعتِ كلام ولدك،وانا اخر من يعلم م مهمة المهم راي ولدك والعايزو ولدك يمشي

ي بتي..

م بتك ي ابوي لو بتك م حتسمح ليهم يراضوك بكيس فواكه وحلاوة وبارد نحن م شفع ولا جعانين دي زوله دخلت فيك ومشت خلتك مرمي في مكانك  وبكل بساطه وقوة عين اهلها  جايبين ليك اكياس رامينهم  علشان يصلو معاك لتسويه في روحك الكان ممكن تفقدها بسبب طيش وقلهه ادب بتهم