عودة إلياس

الجزء الرابع عشر

عودة إلياس(الجزء الرابع عشر)
راكان بنبرة غضب : شو بيقربك العقرب
انتأزت حلا من الصوت بس هالمرة ما بدا تبين خوفها و حاولت تكون قوية و ردت عليه : أنا ما بعرف عن شو انت عم تحكي و مين هاد العقرب
راكان و بلش يعصب اكتر : انتي ما عم تجي بالذوق عما يبدو رح نستعمل معك اساليب تانية
حلا وهيي عم تستجمع قوتها : لك انا ما عم افهم عليك و لا شو بدك مني لك اتركني بحااالي اتركني روح ع امي بترجاك ب ت ر ج ا ك
بهالوقت قرب راكان و شدها من راسها بقوة ع اثرها نزعلا حجابا و هون نزل شعرها الطويل الناعم و شدها راكان منو و هوي عم يقول : احكي وليك احكي كل شي بتعرفيه
صارت حلا تبكي و هيي عم تحاول تفلت ايدو عن شعرها : اتركني بحالي ياويلك من الله ما عندك خوات و ام
راكان بغضب : كان عندي إم بس بيوم من الايام قتلها رئيسك العقرب
و لسا راكان عم يشدلا ع شعرها أكتر فجأة دخل روبر و قال بلهفة : راكان اتركها
قعدت حلا عالأرض و انهارت بالبكا
أما راكان طلع من الغرفة و بقي روبر
و مسك شالها و حطلا اياه ع راسا
ارتعش كل جسم حلا اتطلعت للأعلى و من أول ما شافتو اتذكرتو
وقفت حلا و هيي عم تنظر بحقد و عم تحكي بصوت عالي : هاد انت لكن ، شو بدك مني و ليش كنت عم تراقبني انا شو عملتلكن شوو ...اذا بدكن مصاري خبروني بابا مستعد يدفع قد مابدكن بس تتركوني
بهاللحظة اتطلع فيها روبر شوي بعدين طلع من الغرفة و سكر الباب وراه بدون ما يحكي ولا حرف و بقيت لحالا حلا قاعدة بزاوية الغرفة عم تبكي و ترتجف
.
.
روبر بغضب : راكان ليش انت متهور باين عالبنت انو ما إلها دخل و كمان شلون هيك بتنزعلا حجابها انت مسلم و لازم تعرف قيمة الحجاب للبنت المسلمة
بهالوقت كان راكان قاعد حاطط اجر ع اجر و عم يدخن و يتصفن بحكي روبر بعدين صار يضحك بصوت عالي و سخرية : هههههههههه شو صابك يا زلمة هاي مو أول مرة منحقق مع حدا شو شايفني بدي اقتلها بس هاد مجرد تخويف و ايمت كنت هيك صاحب مشاعر مو بيوم من الأيام طلبت مني اضحك ع بنت خالتها بس مشان ناخد المعلومات الي بدنا اياها
روبر : بس حلا مو متل بنت خالتها بتذكر لما ضربتها بالسيارة كانت انسانة كتير محترمة و متحفظة ع حالها
راكان ببرود : هاي بنت خالتهن سماح شفت وجهها فكرتها ملاك طلعت حرباية و بالآخر هيي الي قتلت جدها
روبر وهوي عم يكز ع اسنانو : خلص راكان بكرا اخلي سبيلها
راكان بهدوء: ماني
روبر بنظرة تحدي : راكان
راكان : طيب شو رأيك انت الي اتحقق معها لأن متأكد في علاقة بتربطها مع العقرب
روبر : طيب انا الي بستلم التحقيق و الأفضل انك ماعاد تتدخل فيه
راكان : ماشي
سكت التنين شوي بعدين بلش راكان يضحك
روبر بإستفهام : شو صابك?
راكان و بلش يضحك اكتر : مانك ملاحظ انك بالغت بردة فعلك
سكت روبر لانو لاحظ هالشي ع حالو و تلبك و ما رد ع راكان
راكان بنظرة استفهام و هوي رافع حاجب و منزل حاجب : ليكون عاجبتك!!!?
روبر بعدم المبالاة : عملت هالشي من باب الإنسانية
راكان وهوي مو مصدق : اممم قلتلي إنسانية
روبر : انقلع عالنووم
راكان: 😂😂تصبح على خييير
روبر : وانت من اهلو
راكان وهوي طالع من الغرفة : يعني رح تنام بالمكتب مارح تروح عالبيت
روبر : لا ما بدي روح
راح راكان و بقي روبر بالمكتب فتح ملف حلا ليقراه و وقف عند شغلة انو حلا يتيمة ابوها متوفي و اتذكر كيف من شوي عند كانت عم تصرخ كيف كانت عم تقول بابا مستعد يدفعلكن قد مابدكن مصاري ...
كمل روبر قراءة الملف مالقى فيه أي شبهة فقرر يروح هلق ليحكي معها بتأني و يستفسر مين ابوها
...
دخل روبر الغرفة لقاها نايمة عالارض و دمعتها ع خدها
روبر بهدوء : حلا آنسة حلا
انتفضت حلا من مكانها و اتطلعت فيه بخوف : شو بدك ?
ابتعد روبر و قال : لا تخافي محدا رح يإذيكي قومي نامي عالسوا بكرا في كتير شغلات لازم نحكي فيها
طلع روبر و قامت حلا من مكانها و هيي مخووتة من الي عم يصير معها بعدين اتسطحت عالفرشة و اتغطت بشرشف و راحت مستسلمة للنوم
.
.
عند ام حلا
كانت متسطحة ع تخت حلا وهيي عم تمسح ع مخدتها و تبكي و تقول : وينك يا بنتي وينك ياروحي بابا الله لا يسامحك لا بالدنيا ولا الآخرة الله ينتقم منك شلون دمرتلنا حياتنا بعمرك ماكنت أب و ما حافظت لا ع بناتك و لا حفيداتك كان همك الوحيد بس المصاري و ياما قتلت أبرياء مشان هالشي 😭😭آخ ياربي يمكن الحق عليي اني ما خبرتها انو جدها هوي الي قتل ابوها وهوي الي زوجني بالغصب لواحد من الحثالة الي بيشتغلو عندو اااخ ياربي شو هالقلب بدو يتحمل ليتحمل يارب انا ما بدي شي من هالدنيا غير ترجعلي بنتي ياارب😭
.
.
عند الصبح
بغرفة التحقيق
حلا بكل قوة : طلع أنا ماعندي شي اخسروا هاي خطفتوني و الله اعلم الناس شو عم تحكي عني خلص اقتلوني و خلصوني من هالعيشة
روبر بهدوء وهوي عم يقدملها كوب: هدي اعصابك و اتفضلي اشربي قهوة
اتطلعت فيه حلا بخوف و اخدت الكوب منو و حطتو ع جنب
روبر : آنسة حلا انتي بتعرفي حالك وين
صفنت حلا شوي بعدين قالت : لأ
روبر : طيب بتعرفي شو بدنا منك
حلا : كمان لأ
بهالوقت طالع روبر هويتو و انصدمت حلا لما عرفت انو ضابط استخباراتي و اسمو إلياس
اتوترت حلا كتير بعدين حكت وهيي خايفة وعم تبلع ريقها : طيب شو بدكن مني
روبر بإبتسامة : اول شي اتطمني نحنا ما منخوف بس في كام معلومة بدي اعرفهن منك بعدين بتروحي بحال سبيلك و هلق اشربي قهوتك حتى اعصابك تهدى
سكتت حلا و مسكت الكوب و ايديها عم ترجف و صارت تشرب شوي شوي و هيي عم تتأمل غرفة التحقيق و عم تتذكر انها بالفعل هيك كانت تشوف بالافلام البوليسية لما الشرطة تحقق مع المجرم
روبر : هلق آنسة حلا ممكن تحكيلي شوي عن حياتك
حلا كانت مترددة بس كان لابد إنها تجاوب فبلشت تحكي عن حالها
و بعد ما خلصت
روبر : طيب بما انك يتيمة ليش بتذكر انك مبارح قلتي ابوكي مستعد يدفع مصاري بس نتركك بحالك
حلا : هاد زوج امي و بناديلو ابي
روبر : عجب مو مذكور بملفك الشخصي انو عندك زوج ام
حلا : لأن زواجهن كان برى البلد عن طريق الشيخ مو مسجل بالمحكمة
روبر : شو مو مسجل طيب شقد صرلهن متجوزين لحتى لهلق مو مسجل
حلا : من 22 سنة
روبر : معقول كل هالسنين و ماسجلوا وثيقة الزواج طيب امك شلون موافقة عهالأمر و كل هالقد زوج امك جاهل
حلا وهون بلش الخوف ينتزع من جواتها و بلشت تساير بالحديث: مابعرف ليش زواجهن مو مسجل بس زوج امي شخص كتير منيح و مو جاهل بالعكس انسان مثقف و منبثق عالحياة
(طبعا روبر قصدا عم يستدرج حلا لأن شك بأمر زوج الإم و لهالسبب حب يتوسع بالأمر )
روبر : طيب كيف علاقتو معك و مع امك
حلا : علاقتو معنا جيدة بعمرو ما زعلنا طلباتنا كلها مجابة و شو ما بدنا بيعطينا بس بالمقابل ما منشوفو كتير لان بيبقى ملتهي بشغلوا بس آخر فترة عشنا مع بعض سنة بعدين افترقنا مرة تانية
روبر : ليش وين بيشتغل ???
حلا : بسنغفورا
هون بلشت ضربات قلب روبر تتزايد بس بقي محتفظ بهدوء أعصابو حتى ما ينكشف الأمر
روبر و بلشت أسألتو أدق : طيب و علاقتو مع جدك كيف
حلا : حسب معرفتي علاقتهن عادية وبصراحة انا بعمري ما تدخلت بهيك أمور
روبر : طيب شو اسمو
سكتت حلا و ماردت عليه و كأنو في شي مخبيتو
روبر استغرب لصمتها و رجع عاد السؤال عليها مرة تانية : شو اسمو زوج امك ?
بلشت حلا تتعرق و توترت و تذكرت شغلة
فلاش باك***
حلا : بابا ليش دوما بتوصيني ما قول اسمك قدام حدا
العقرب : طيب بما انك وعيتي رح احكيلك سر
حلا بفضول : عم اسمعك
العقرب : بيوم من الايام جماعة بمكان عملي ورطوني بجريمة مالي دخل فيها بعدين اتهموني أنا و صارت الحكومة تلاحقني و من يومها ما بقدر انزل ع سوريا بهويتي و مضطر خبي اسمي عن الكل
حلا بحزن و الدموع بلشت تجري ع خدها : بابا انت انسان بريء ليش هيك ظلموك
العقرب : هيك يا بنتي الحياة دوما فيها ظالم و مظلوم
حلا : خلص من اليوم بوعدك ما رح احكي اسمك لحدا حتى محدا يإذيك
العقرب : شكرا حبيبتي 😘
...طبعا كل الي حكاه العقرب ل حلا كذب و خبرها هالكذبة مشان ينال عطفها و ماتحكي اسمو قدام حدا
باااااك*****
روبر و بلشت الأفكار تراود عقلو : آنسة حلا ليش هيك سكتي ما خبرتيني شو اسم زوج امك
وأخيرا بعد صمت طويل حكت حلا : مافيني خبرك شو هوي
روبر بإستغراب : ليش
بلشت الدموع تنزل ع خدها وماقدرت تتمالك حالها و هيي تقول : بترجاك لا تضغط علي مافيني خبرك اسمو ما فيني

هون شكوك روبر بلشت تزيد و صار بس عندو فضول كبير لحتى يعرف اسم هالشخص
روبر : بترجاكي آنسة حلا ساعدينا و لا تعملي هيك معنا انتي بتعرفي انو كتير أبرياء ماتوا بسبب جدك و شخص تاني اسمو العقرب و زوج امك هوي المرشح الأول ليكون العقرب بترجاكي كوني واعية وحطي عواطفك ع جنب و هالمرة كوني ل جانب الحق
بعد سماع هالشي مسحت حلا دموعها و اتحكمت بأعصابها و سألتو : من أول ما اخدتوني و انا عم اسمع عن شخص اسمو العقرب بس مين بكون مابعرف و كمان جدو انسان شريف بعمرو ما قتل حدا
روبر : طيب و اذا فرجيتك مقاطع و مستندات تثبت انو جدك تاجر اسلحة و انو هوي و العقرب ورا المجزرة الي صارت من 3 سنين بالشام
حلا وهيي عم تتذكر : قصدك الانفجار الي راح فيه حوالي ال50 شهيد و 150جريح
روبر : اي نعم هوي
حلا بكل ثقة : أنا متأكدة انو جدي ما دخلوا و نحنا ما إلنا علاقة بهيك أعمال تخريبية
روبر بنظرة تحدي : طيب و اذا طلع جدك الي وراها بتقوليلي اسم زوج امك و كل شي عنو
حلا : ماشي موافقة
كانت المسكينة حلا واثقة من حكيها بس بعد ما غاب روبر شوي رجع و معو مقاطع موثقة و كمان مستندات بتثبت تورط جدها و كمان تورط شركتها و شركة سماح بهيك أعمال
حلا و هيي متفاجئة : لا مستحيل مستحيل يكون جدو هيك
روبر : آنسة حلا اتأكدتي هلق من حكيي و شلون انا ما عم اكذب عليكي و هلق بتمنى تتعاملي معنا و تساعدينا بمعلوماتك
حلا و لساتها تحت تأثير الصدمة و الدمعة بعينها لا عم تنزل ع خدها ولا عم تقدر تخبيها صارت تحكي بدون ما تحس و عيونها مركزات عالملفات الي قرتهن و شفايفها صارت تتحرك لحالها و تنطق الاسم : اسمو ساهر الحمصي
روبر بإستغراب : شو قلتي
حلا : ساهر الحمصي ابي زوج امي اسمو ساهر
بهاللحظة اتجمدت اطراف روبر حس بالاختناق و قلبو قبضو ماعاد يعرف شو يعمل و حالتو صارت متل حالتها و لسا أسوأ منها وخلال ثواني راودو ألف تفكير : معقول العقرب ابي معقول ساهر نفس الشخص الي باعني معقول هوي الي قتل خطيبتي معقول هاد الشخص الي كان دوما يخسر بالقمار اليوم هوي أكبر تاجر اسلحة و اكبر عدو إلي
ما قدر روبر يتحمل أكتر و انتفض من مكانو و قلا : امشي معي
حلا : لوين
روبر : عندك صورة إلو
حلا بتوتر : اي
روبر : اروحي معي
طلع ل برى و ركب بسيارتو و حلا لساتها واقفة برى
روبر : اطلعي
حلا : ما فيني
روبر بغضب و بصوت عالي : عم قلك اطلعي
أخدها معو و خلاها تأشرلو ع مكان منزلها اخدها ع البيت رن الجرس ردت امها الي من أول ماشافتها ارتمت بحضنها و صارت تبكي أما روبر نظرات عيونو كانت لجوا البيت و كأنها عم تدور على صورة ابوه
ام حلا ولساتها مو عارفة شي : بنتي مين هاد
صحي روبر من شردتو و رد عليها : انا الي كنت خاطفها
ام حلا : شووو
حلا : ماما لاتفهمي الموضوع غلط هاد بكون ضابط و كنت موقفة هالفترة بفرع أمن
ام حلا : فرع أمن ليش بنتي شو عاملة و ليش لتاخدوها بهالطريقة.
روبر و هوي عم يحط ايديه ع راسو تعبان و مو فاضي لسماع هالحكي
وقف قدام الام و قال : بدي صور لزوجك ساهر وهوي بعمر العشرينات
ام حلا بإستغراب : نعم ليش
روبر بطريقة توسل : بترجاكي لا تجادليني بس اعملي معي هالمعروف و فرجيني صورتو
دخلوا الكل ل جوا الصالون و بعدها فاتت الام شوي عالغرفة جابت صورة
ل ساهر و عطتو اياها
مسك روبر الصورة بلش يتأمل الملامح كتير منيح و بلش يتذكر شكل الشخص الي كان واقف قدامو بالمطعم بدو يقتلو طلعت نفس الملامح و نفس الشخص الي باع ابنو اي طلع ابوه هوي نفسو العقرب
صارت ايدين روبر ترجف و وقعت الصورة من ايدو مشي خطوات ل ورى ليطلع من هالبيت ماعاد يشوف قدامو صار يتفشكل بالكنبايات صدرو صار يضيق عليه بلش يفتح ازرار قميصو بس ما قدر يتحمل و وقع بأرضو و فقد وعيو💔