عودة إلياس

الجزء الثامن

عودة إلياس (الجزء الثامن)
(بعد شهر)
كان واقف الكتير من الاعلاميين قدام شركة الاجهزة الكهربائية
الاعلامي و هوي عم يصور بث مباشر: اليوم ولأول مرة تقوم الدولة بالحظر على هذه الشركة التي لطالما كانت تصدر للعديد من الشركات الأخرى
اعلامي تاني : ها نحن نرى من امام اشهر الشركات في دمشق الحكومة تقوم بإعتقال مديرة الأعمال سماح اليمني بتهمة استيراد أجهزة شبه عاطلة و بيعها للشعب بأسعار مرتفعة
...
سماح : بعدو ايدكن عني شو هالضجة اتركوني
الضابط : امشي معنا و من تم ساكت

كانوا الصحفيين معبايين المنطقة و الشرطة بكل مكان و عم تحاول تبعد الصحافة
و كانت الضجة الي عم تصير كفيلة انها تكون صفعة قوية للعقرب ....
.
.
بمكتب المحقق
سماح و هيي حاطة إجر ع اجر و مقطبة حواجبها و معصبة كتير : خير حضرة المحقق ليش انا هون
المحقق بإستهزاء : معقول ما بتعرفي
سماح كمان بإستهزاء: لو بعرف ما سألتك
المحقق : طيب انتي بتعرفي كمية الشكاوي الي اجت ضد شركتك خلال هال10 ايام
سماح: شو شكاوي و على شركتي ليش بقى?
المحقق : لا ابدا مو بشي بس العملاء بيشترو من عندكن ع أساس وكالة و جديد بعد اسبوع القطعه الكهربائية بتخرب
سماح ببرود: هاد مو ذنبي
المحقق : تمام هاد مو ذنبك طيب شو عن الاجهزة الطبية الي استوردتيها من يومين من أوروبا بفكرك القصة تمرق هيك و المراقبة و التقييم ما يعرفو انو هالأجهزة عاطلة مو حرام عليكي ما حسبتي حساب كام مريض رح يموت بسببك
بهالوقت سماح بلش جبينا يتعرق و توترت و خافت لان بتعرف كل الامور ماشية نظامي و جدها مأمن كل شي و هاي أول مرة بيعترض حدا طريقها
ف بهالحالة التزمت الصمت و ماعادت ناقشت المحقق بشي حتى ما تثير الشكوك اكتر
.
.
عند حلا
حلا بغضب : لك كيف كيف بصير هيك وشلون بيتهموها هيك اتهام
زوج سماح : اسألي سماح لا تسأليني إلي
حلا : بالله بس مو انت الي وراها و كمان سماح ما بتعمل شي إلا بعلمك
زوج سماح : انا ما دخلني انا مجرد عامل بالشركة و بنت خالتك هيي المديرة و المسؤولة عن كل شي
حلا وهيي عم تحاول تخفي عصبيتها لانها بس عصبت ما بتعود بتشوف قدامها: طيب اوك بس هلق رح اسألك و جاوب بصراحة هلق بجد الاجهزة الطبية خربانة و استوردتوها بأسعار منخفضة و بعتوها للمشافي بأسعار غالية
زوج سماح بنفاد صبر : بما انو الكل عرف و نهايتنا محتمة فما رح كذب عليكي اي هالشي صح و كل شي عم تسمعيه بالاعلام صح
بهالوقت قعدت حلا ع كرسيها و هيي حاطة ايديها ع وجها و مو مصدقة هالشي
حلا و هيي بحالة من الانهيار بس عم تحكي بهدوء: طيب آخر سؤال سماح ورا الي عم يصير و لا ما إلها علاقة
زوج سماح بإستهزاء : لا اتطمني بنت خالتك مو مظلومة هيي ورا كل شي صار و كانت كل فترة تستورد متل هلق و تنفد حالها بس هالمرة المراقبة بالجمارك كشفوها و راحت عليها هالمسكينةبهالوقت حلا حست كأنو حدا ضربها كف ع وجها عند عرفت انو بنت خالتها بتعرف بيلي عم يصير بشركتها و كانت عم تخدع العباد بس رغم هالشي كانت عم تحتفظ بهدوء اعصابها
حلا وهيي عم تحذر زوج سماح: ليك انا بعرف انك كمان ورا كل شي لهالسبب بنصحك تطالعها متل ما دخلتا بهالمستنقع
زوج سماح : 😂😂 انا ولا جدك
حلا : هسسس لا تجيب سيرة جدي ع لسانك صح هوي الي عطاكن هالشركة بس ما قلكن اعملو هيك شي
زوج سماح وهوي عم يتمسخر عليها : ااخ يا مسكينة ما بتعرفي شي
حلا : ولا بدي اعرف
و بعدين طلعت من عندو و هيي بقمة غضبها و مو عارفة شو عم يصير حواليها اما زوج سماح فورا بلش يضب اغراضو ليهرب قبل ما يكشفو انو كمان متورط معاها....
.
.
عند روبر كان عم يتفرج عالتلفزيون شو عم يصير وهوي عم يبتسم ابتسامة انتصار
راكان : شكلك مروق
روبر : اكتر من هيك رواق مافي
راكان : يخرب بيتها ما توقعت يكون ورا هالجمال هيك شيطان
روبر : ع فكرة اتقابلت معها من فترة
راكان بإستغراب : وين
روبر : كنت عم سوق و ضربت بنت بالسيارة و عما يبدو سماح بتكون قريبتها و اجت لتساعدها
راكان : اممم
روبر : بتعرف من أول ما شفتا و من قبل ما اعرف هويتها الحقيقية اخدت عنها انطباع كانت انسانة مغرورة و عندها كبرياء و حسيت عندها طمع و جشع هيك الناس بهمن بس المظاهر
راكان : معناها شرشحوك منيح الي ما جروك عالسجون
روبر : لا اتطمن لان قريبتها الي ضربتها كانت عاقلة ما بتشبها ابدا
سكتو التنين شوي بعدين اخترق الصمت راكان
راكان : طيب هلق بتتوقع تكون هيي بس ورا الي صار ولا معاها حدا
روبر : اكيد معاها حدا بس مافينا نثبت هالشي بس بالحكي نحنا عملنا الي علينا و وجهنالو ضربة للعقرب و الباقي تركناه للشرطة تكشف الي بدا اياه
راكان : اينعم بس هلق امورنا توترت اكتر لان اكيد اخدو احتياطاتن
روبر : كلامك صح لهالسبب علينا بالصبر
راكان بهدوء: ايه من ايمت و نحنا صابرين اشو ورانا منصبر اكتر
.
.
عند العقرب
بمكالمة هاتفية بين العقرب و الخال
العقرب : بعتذر عن الي صار بس الانسة سماح عملت الصفقة بدون ما ترجعلنا و تاخد رأينا هالمرة
الخال : بس لو كنت وراهن كل خطوة بخطوتها ما كنا وصلنا لهون
العقرب : انا اسف
الخال ع مضض : هلق الاعتذار ما بينفع بس اعرف انو أي غلط رح يصير الكل رح يدفع تمنو و هلق اعملوا جهدكن لتطلع حفيدتي
العقرب : ولايهمك معلم انا درست الأمر و قريبا رح تكون برى السجن
الخال : طيب تمام المهم بالآخر تطلع براءة

بعد انتهاء المكالمة
العقرب وهوي عم يتنهد : اااوف منيح الي كانو امها و ابوها ميتين كان كمل النق فوق راسي
وبعد بدقايق : خالد خااالد
اجا خالد من برى: نعم معلم
العقرب : شو صار ب نجيب ( زوج سماح)
خالد : معلم نجيب من وقت اعتقال زوجتو وهوي مختفي عن الأنظار
العقرب بغضب : بدي اتلاقوه و لو بكون تحت الارض بدي اعرف من هالغبي كام معلومة

.
.

بالمطار كان نجيب بدو يطلع بالطيارة
و فجأة ما شاف إلا الأمن داهمو المكان و اعتقلوه طبعا هوي كان الضابط مراقبو من أول ما اكتشفوا قصة البضاعة بس ما كانوا متأكدين انو عليه شي بس هلق بعد ما مسكوه مسك اليد هالشي أثبت انو متورط و لهالسبب بدو يهرب
.
.
.
راكان : شايف وهاي نجيب طلع متورط كمان
روبر : هالشي متوقع و لسا بكرا في كتير أسماء رح تنكشف و أسماء رح تتصفى من قبل ما تنحبس
راكان : كلامك صح كل شخص بيعرف مين هوي الداعم الحقيقي لهالعبة رح ينقتل من قبل ما يحكي
روبر بخبث : هلق السيناريو الي رسمناه عم يتنفذ

.
.
و عند العقرب
العقرب : شو في جديد
خالد : الي خبر عن البضاعه مو من جماعتنا
العقرب : معناها من الجماعه الي استوردو منن
خالد : هوي اكيد مو من طرفنا لان مو من صالح شركائنا يبلغوا علينا
العقرب :معناها في حدا مراقبنا وهوي الي اتلاعب بدورية الجمارك حتى اتغير دور الجماعه المتعاملين معهن عالحدود
خالد : طيب مين ممكن يكون وراها
العقرب وهوي عم يفكر : اممم محدا قد هاللعبة الا تنين ......... او ......