"مجنونة بحبك"
-تقدر تفهمني ايه اللي مخليك مش عايز تتجوزني؟
-هو انتي ما بتفهميش ما قولتلك بحبها
-طب أقدر أفهم ايه اللي مش عجبك فيا؟
-هو انتي يا بنتي ما عندكوش مرايات في بيتكم
-عندنا طبعاً
-طب ابقي بصي فيها وانتي تعرفي ده انتي شبه واحد صاحبي.
-ابتسمت وقالت له: وايه كمان؟
-وناقص ليكي شنب ونقولك شكري بدل شكرية
-ضحكت جامد وقالتله: وايه كمان
-استغرب وقالها هو انتي للدرجة دي بيعاها؟
-هي ايه؟
-كرامتك يا حبيبتي
-بصتله بحب وقالتله: الله جميلة أوي حبيبتي دي طالعة من بوقك زي العسل
-نفخ بغيظ وهو بيقول اللهم ما طولك يا روح، مش ممكن.. طب خلي عندك شوية من الأحمر
-يا بني ما أنا لابسة شيميز احمر اهو اعملك ايه تاني؟
-يا مصبر الوحش على الجحش يارب
-طب أهدى كده بس وقولي ايه اللي يريحك عشان توافق على الجوازة دي؟
-هو انتي يا بنتي واقعة على....
-واقعة في حبك يا جسومتي
-طب وربنا طالعة من بوقك زي....
-العسل ما تتكسفش عادي يعني قول
-بصلها بقرف زي السم.. عارفة السم
-اشربه من ايدك ويبقى على قلبي زي العسل كمان
-قال بعلو صوته: يارب.. ايه ده مش ممكن كم البرود ده
-أنا باردة ده انا شربات، ده أنا جنات
-تقصدي سيئات
-وماله سيئات مش هكسفك
-أوووووف
-جاسم تخيل كده لما نتجوز ونعيش مع بعض هنبقى عايشين في جنة
-لا أنا راضي أعيش في نار
-عشانك انت انكوي في النار والقح جتتي
-ما انتي فعلا تلقيحة
-وتسريحة كركركركركركر أنا بضحك معاك
-غمض عينيه وهو بياخد نفس طويل وبعدين مسكها من أيديها بس هي اول ما مسك ايديها ما صدقتش نفسها وفضلت تتنطط في كل مكان عشان كده زعقلها وقلها تعد وبعدين هدى نفسه تاني وقالها::شكرية
-عيونها
مسك أعصابه وقالها: يا بنتي اسمعيني أنا وانتي ما ننفعش لبعض، انتي لسة عندك طموح وعايزة تبقي مهندسة كهربائية اد الدنيا ورايحة جاية مع الصنايعيه عشان تبدأي من الأول
-حصل يا أبو عمه والله الواحد شقيان وطالع عينه
بصلها وهو رافع حاجبه اليمين: أبو عمه!
-ايه وحشة خلاص خليها ابو عرب
-ما علينا، خلينا في اللي كنا بنقوله.. أنا بقى مش عايز كده يا شكرية أنا واحد عايز ارجع من شغلي أحس أن في انثى مستنياني
-يا سطى أحلى انثى هتلاقيها في انتظارك أنت بس قشر
-شكرية من الأخر أنا مش طيقك ومش عايز اتجوزك وبلاش احرجك اكتر من كده
-قامت شكرية من مكانها وهي بتبصله وقالتله كلمة واحدة
هنتجوز
وبعدين سابته وخرجت.
كان قاعد مش مصدق. نفسه وفاق على صوت رنة موبايله
أيوة يا حبيبتي
-عملت ايه يا جاسم؟
-مش عارف اقولك ايه؟
-يعني ايه يا جاسم مش عارف تقولي ايه تقولي انك خلاص نهيت الحوار ده
جاسم: للأسف راكبة دماغها ومش عايزة تسبني
-يا سلام وأنا بقى المفروض اصدق الكلام ده
جاسم بنرفزة: بقولك ايه يا رانيا عايزة تصدقي صدقي مش عايزة انتي حرة أنا جيبت أخري
عيطت وقالتله: ماشي يا جاسم سلام
جاسم: يا رانيا استني بس...
بس كانت رانيا قفلت: يوووه أنا مش عارف ايه اللي بيحصلي ده انا كان مالي ومال شغلة الورث دي ياربي يعني يوم ما الواحد يطلعله خال عدل ويموت وسايب لإخواته ورث يحطلنا شرط اني لازم اتجوز بنت خالتي ومايطلعش من نصيبي الا شكرية.. لا شكرية ايه دي شكري
في أوضة شكرية كانت واقفة وبتبص على نفسها في المراية وهي بتفكر ليه مش عايز يشوفها.. ليه شايف انها شبه واحد صاحبه وبعدين قالت بصوت:
ما عنده حق يا شكرية شوفي نفسك لابسة ايه قميص كروهات وچينس وكوتش رجالي وكاب والله على رأيه ناقصك شنب.
طب أغير من نفسي، لا لا يمكن لو عايز يحبني لازم يحبني زي ما أنا كده وبردوا هنتجوز يا جاسم ده أنا ما صدقت أن الفرصة دي جاتني ومش هفوتها أبدًا مهما يحصل.
يتبع
#رحاب_قابيل
