فضلت تبص على الاوضة اللي كل حاجة فيها مابقتش سليمة وهي بتبصله قامت من مكانها وقربت منه وقالت بهمس: اسمعني أرجوك يا جاسم
قام جاسم من مكانه بعصبية وقال بصوت مليان غضب: اسمعك! اسمع ايه بالظبط؟ عايزة تقوليلي ازاي استغفلتيني عايزة تقوليلي إن كان ليكي علاقة مع واحد وغلطي وطبعا جاسم يشيل الليلة، وأنا أقول ايه يخليكي تقربي مني بالطريقة دي وطول الوقت تجري ورايا وأول ما تجوزنا بقيتي تهربي ما هي حاجة مش طبيعية وياترى غلطي مع مين؟ بلاش تقولي يمكن يكون أسر صح اللي كنتي عايزة تخديه بالحضن اول ما شوفتيه ولا يا ترى علي السلاموني اللي جري عليكي و....
اتفاجيء بالقلم اللي نزل على وشه وبص ليها: يبقى هو وقرب منها ومسكها من كتفها: امتى؟ قوليلي امتى؟
بدأت شكرية ترتعش وهي بتحاول تفك نفسها منه: جاسم ايدك بتوجعني
شد أيده عليها أكتر: خليها توجعك ده اقل احساس أنا حاسس بيه دلوقتي عارفة أنا حاسس بايه نار، نار في كل جسمي حاسس اني اضربت بسكينة تلمة بتقطع في كل حتة في جسمي
شكرية: كفاية أرجوك اسمعني
جاسم وهو بيضغط اكتر بأيديه وبيجز على سنانه: عيزاني اسمع ايه بالظبط؟
شكرية: تسمعني، تعرف الحقيقة قبل ما تحكم عليا
جاسم: أنا مابقتش عايز اسمع صوتك مش طايقك يا شكرية مش طايقك
وهنا فقد جاسم السيطرة على أعصابه وبدأ يضربها بالاقلام وهي بتحاول تدافع عن نفسها لكنه مادهاش الفرصة وفضل يضرب فيها لحد ما وشها ورم وبدأت تنزف من كل حتة في وشها
زقته شكرية وهي بتحاول تاخد نفسها من كتر الضرب: أنت خلاص اتجننت ثم ايه اللي معصبك للدرجة دي مش كنت شايفني شكري مش كنت مابتحبش غيرها دلوقتي ايه اللي حصل
قرب منها بغضب ومسكها من شعرها: اللي جد اني حبك اتجدد جوايا مجرد ما شوفتك فكرتيني بحلم دفنته من زمان وحاولت اهرب منك ومن مشاعري وقولت يمكن يكون اللي بتعمليه ده عشان الوصية وحاولت أكمل مع رانيا لكن كتر مطاردتك ليا خلاني افوق وبعدين جت شروط الوصية وكانت دي فرصتي عشان اثبت لنفسي انك مجرد وهم لكن حبي ليكي كان بيزيد حتى وانتي عاملة فيها شكري لكن فجأة بدأتى تبعديني عنك لحد ما قربتي تاني لكن ماكنتش أعرف أن تربيتك برا يعمل كده، وبعدين شدد من قبضة أيده على شعرها وقال بصوت مخنوق: ليه؟ ليه عملتي كده ليه؟
وبعدين سابها ومشي وهي ماقدرتش تستحمل ووقعت على الأرض مغمى عليها
************************************************
تاني يوم في بيت بسيط في حي شعبي...
شهد: يا ماما خدي ابنك اللزج ده عايزة أذاكر
أمينة: تعالى هنا يا خالد بطل تضايق اختك
مسكها من خدودها: أنا أقدر اضايق أم خدود دي
بعدت ايديه: ده انت غتت
خالد: غتت بس بحبك
ابتسمت شهد على تصرفات اخوها الطفولية ما هو في الاول وفي الاخر عنده عشر سنين: طب امشي يا لمض بقى عشان أذاكر واه خد وبعدين مسكت شنطتها وطلعت فلوس: خد فلوس الدرس يا حبيبي
كشر خالد: قولتلك أنا هنزل اشتغل مع عمي عبد الحميد في الورشة عنده
شهد بعصبية: تشتغل ايه؟ خالد قفل على الموضوع ده وخد الفلوس وابعد عن خلقتي الساعة دي
قال خالد بنضوج يناقض سنه: يا ديدو يا حبيبة قلبي أنا خلاص كبرت وماينفعش أفضل معتمد عليكي لازم اساعدك أنا بقيت راجل البيت بعد بابا ما ينفعش أفضل معتمد عليكي طول الوقت وأنا عارف انك بتتعبي اد ايه عشان توفقي ما بين كليتك ومصاريف البيت
قعدت جنبه مرة تانية وابتسمت: عارف يا خالد أنا أحيانا بحس انك انت الكبير مش أنا بس خلينا نتفق اتفاق
خالد: سامعك
شهد: أنا أشتغل لحد ما انت تبقى كبير كفاية وتقدر تعتمد على نفسك
خالد: بس انا كبير
هنا أدخلت أمينة: عارفين انك كبير يا حبيبي بس مش كبير كفاية عشان تقدر تعتمد على نفسك
خالد: وامتى اعتمد على نفسي؟
أمينة: لما تبقى طول اختك كده
وقف خالد على الكرسي: بقيت طولها أهو
ضحكت شهد وضربته على قفاه: طب يلا يا لمض روح الدرس قبل ميعاده مايفوت
خالد: ماشي هروح عشان بس أكمل واثبتلكم اني راجل يعتمد عليه
اول ما خرج خالد: هتفضلي يا بنتي شايلة همنا لحد امتى؟
شهد: لحد اخر نفس ليا يا أمي
أمينة: بعد الشر عليكي يا حبيبتي ربنا يفرحني بيكي كده واشوفك مع عريسك
شهد: لسة بدري يا ماما على الكلام ده
أمينة: ولا بدري ولا حاجة
شهد: طب عن أذنك بقى يا ماما عشان أتاخرت على ميعاد شغلي
أمينة: روحي يا بنتي ربنا معاكي
**************"***"*****************************
عند شكرية...
سمية: كان قلبي حاسس ان فيكي حاجة من امبارح ده لولا أن كامل كان معاه نسخة تانية من المفتاح كان زمانك في خبر كان
كامل: أعتقد أنك هديتي دلوقتي ممكن نفهم حصل ايه؟
كانت شكرية باصة للفراغ وأمها وخداها في حضنها وبتعيط وشكرية سرحانة في كل اللي حصل
مسكتها سلوى من أيديها: شيري حبيبتي قوليلي ايه اللي حصل؟ وجاسم فين؟
اول ما سمعت اسم جاسم بدأت تعيط بصوت عالي وحضنت أمها أكتر، قرب منها ماجد: يا شيري
شكرية: شيري! شيري هي سبب كل المصايب دي ماكنش لازم تظهر ماكنش المفروض أخرجها أنا مابقتش قادرة أنا عايزة أسافر كفاية كده كفاية بقى
ماجد: يعني خلاص نسيتي سبب تواجدنا هنا من الأول، نسيتي معاناتنا في المصحة لمدة تلت سنين، نسيتي بابا هلال
اول ما قال اسم باباها هنا مسحت دموعها وبصت ليه: عمري ما أنساه عمري
سمية: يبقى لازم تقوي عشانه
كامل: بس الأول لازم نفهم حصل ايه؟
شكرية: هفهمكوا كل حاجة بس الأول لازم يكون جاسم موجود
كامل: وهو فين بس؟ احنا بقالنا اكتر من تلت ساعات بنتصل بيه وموبايله غير متاح
************************************************
دماغه مش مبطلة تفكير، إزاي؟ وامتى؟ وفين؟ طب ليه؟ وعشان ايه تعمل في كده وكلامها وتصرفاتها كل ده كان كدب
استغفلته ياريته ما قرب منها هي عمرها ما حبته هي كانت عايزة تغطي على غلطتها، ياريتها كانت صارحته وهو كان هيتجوزها عشان هي قربته
ضحك وقال أنت بتضحك على مين يا جاسم أنت حبيتها، ورميت رانيا الوحيدة اللي حبيتك، رانيا اللي ظلمها في وسط ده كله ونسيها لازم يشوفها على الأقل ويعتذر منها
************************************************
في كلية فنون جميلة...
أميرة: يا ديدو خلاص بقى
شهد بعياط: خلاص ايه بس يا أميرة أنا اترفدت وانتي عارفة كويس أنا محتاجة الشغل ده اد ايه
مسحت أميرة دموعها: عارفة يا حبيبتي والله بس انتي كنتي صح
شهد: يارتني ما كنت ضربته
أميرة بنرفزة: يعني عايزة واحد يمد أيده عليكي ويتحرش بيكي وانتي تفضلي ساكتة
شهد: بس ماكنش ينفع اخسر شغلي هعمل ايه دلوقتي؟ وانتي عارفة معاش بابا بيكفي إيجار الشقة بالعافية
أميرة: إن شاء الله خير يا حبيبتي والله
مسحت شهد دموعها: إن شاء الله
أميرة: يلا نقوم نحضر المحاضرة وإن شاء الله لما نخرج هنلاقي حل
قامت شهد معاها باستسلام: حاضر
***********************************************
قاعدة في الكافية بتبص عليه بنرفزة وهو بيهزر مع بنت بطريقة مستفزة قامت من مكانها وقربت من ترابيزتهم ومسكت البنت من شعرها: عارفة يا بت انتي لو مامشتيش من هنا دلوقتي أنا هفرج عليكي الكافية ده كله
مي: اه سيبي شعري يا حيوانة
قام كريم من مكانه: انتي اتجننتي يا رانيا
رانيا بعصبية: وهتجنن اكتر لو البنت دي ماشيتش من قدامي دلوقتي
كريم: لا دي هبت منك على الآخر
رانيا: ولسة هتهب يا كريم لو الحيوانة دي مامشيتش
مي: لا ده انتي زودتيها أوي
وبعدين شدت شعرها من أيديها واخدت كوباية المية ورمتها في وش رانيا: عشان تفوقي وتعرفي انتي بتكلمي مين
اتصدمت رانيا: أنا ترشيني بالميه
مي: وارشك بالدم لو جيتي جنبي تاني
كريم: خلاص انتي وهي فرجتوا علينا الناس
كانت لسة رانيا هتضرب مي لكن كريم اخدها من أيديها وخرجوا برا الكافية ووقفوا قدام عربيتها: اركبي عربيتك وامشي وبطلي عبطك ده
رانيا: عبط بتسميه عبط عشان بغير عليك
كريم: فوقي من وهمك ده بقى شوية، غيرة ايه يا ام غيرة احنا عمرنا ما كنا مع بعض ولا عمرنا هنكون
رانيا بضعف: بس انا مش شايفة غيرك انت يا كريم
كريم: وأنا عمري ما شوفتك يا رانيا يا ريت تفوقي شوية من أوهامك دي عشان ما تتعبيش
رانيا: طب ليه؟
كريم: عشان انتي ولا حاجة بالنسبة ليا يا رانيا انتي صفر على الشمال حاجة كده لازم تكون موجودة في المعادلة لكن مالهاش لزمة
رانيا: للدرجة دي؟
كريم: وأكتر، تصرفاتك وسوادك من كل اللي حواليكي وأنك عايزة تبقي كل حاجة خلاني ماشوفكيش وارجوكي لحد كده وكفاية مش عايز اجرحك اكتر من كده
وبعدين سابها ومشي ورانيا فضلت واقفة بتبص على مكانه اللي كان واقف فيه ودموعها نازلة على وشها من غير ما تحس وقالت: بس انت كل حاجة يا كريم كل حاجة
***********************************************
عند أميرة وشهد.....
أميرة: ها يا ماجد
ماجد: خلاص يا بنتي
أميرة: يعني ايه؟
ماجد بفرحة وهو بيبص على شهد: لاقتلك شغل
شهد بفرحة وهي بتسقف: بتتكلم جد
ماجد: لا كده بتستقلي بقدراتي وأنا كده ممكن أزعل
شهد: كله الا زعلك يا وحش ما نقدرش
ماجد: أيوة كده يا شبح
شهد: حبيبي والله يا أبو عمه
ماجد: يا سطى أنت الحب اللي في التوب
فضلت أميرة تبص بعصبية عليهم هما الاتنين وهي بتشد على الكوباية اللي في أيديها عشان ما تبينش: طب همشي أنا بقى
ماجد: اوصلك طيب
شهد: لا خليك مع خطيبتك بقى شوية
ماجد: حسيسة والله
شهد: اي خدمات
ماجد: ما تتأخريش علي ميعاد بكرة
شهد: من الفجر هستناك
ماجد: تمام
مشيت شهد وبعدين بص لأميرة: وحشتيني
بصتله أميرة ببرود: طيب
ماجد: ايه ده في ايه؟
أميرة: في ايه؟
ماجد: شايف دخان بيخرج من ودانك
أميرة: كويس انك خدت بالك
ماجد: ايه ده؟ الحب بيغير
أميرة: أغير لا يا حبيبي مش أنا أصلا
ماجد: لا والله بتغيري
أميرة: اه بغير ايه المشكلة يعني بص يا ماجد شهد انتمتي واختي إنما ما تهزرش بالطريقة دي و...
مسك ماجد أيديها وباسها: بحبك
ارتعشت أميرة من تصرفه ده: م.. ماتعملش كده تاني
ماجد: بتحبيني
اتكسفت أميرة وابتسمت وودت وشها الناحية التانية لكنه مسك وشها بايديه وخلاها تبصله: بتحبيني؟
أميرة: بحبك
ماجد: اوعي في يوم من الايام تغيري من اي حد عشان انتي لوحدك متربعة هنا وقال جملته الأخيرة وهو بيشاور على قلبه
أميرة: طب يلا عشان اتأخرت بقى
ماجد: يلا بينا
************************************************
كانت ماشية فرحانة أوي الحمد لله يارب لقت شغل بسرعة فضلت ماشية بتكلم نفسها وما أخدتش بالها وخبطت في حد بصت وقالت: سوري أنا...
لكن قطعت جملتها لما شافت وش اللي خبطت فيه: يييييييي أنت يا بني طلعلي في البخت
ضحك أسر: ازيك يا شادي
شهد: والا بقولك ايه أنا فرحانة ومش ناقصة حد يعصبني
أسر: والا! بس ماشي هتغاضى عشان اعرف مبسوطة ليه؟
شهد: وانت مالك يا لزج أنت ليك فيه
أسر: أنا لزج؟ احترم نفسك يا شادي
شهد: استغفر الله العظيم بقولك ايه ابعد عن وشي
أسر: وإن مابعدتش
شهد: بلاش تتحداني
قرب أسر منها: هتعملي ايه؟
شهد: هقولك هعمل ايه! يا لهووووووووي
اتصدم أسر من صوتها: في ايه يا متخلفة انتي؟
شهد: الحقوني يا ناس
أسر: انتي مجنونة
شهد: أنت لسة شوفت جنان
اجتمعت الناس حواليهم: في ايه يا بنتي؟
شهد: الراجل المنحط ده مسك ايدي وبيقولي تعالي معايا
أسر بصدمة: أنا؟
شهد: أيوة أنت
الراجل: تصدق انك انسان مهزق
أسر: احترم نفسك يا راجل أنت
شهد: كمان بتبجح
أسر: انتي تخرسي خالص
شهد: كمان بتعلي صوتك عليا عارف يا عمو ده كان بيقولي تعالي معايا واديكي اللي انتي عايزاه
شاب: ده انت عايز تتربى بقى
أسر: تربي مين يالا فوق لنفسك
شاب تاني: لا ده انت بجح بقى
وهنا بدأت الناس تتلم عليه عشان يضربوه وخرجت شهد من وسطهم وهي بتضحك وبتقول تستاهل عشان تبقى تقف قدامي تاني
جريت شهد لكنها ما شافتش البودي جارد اللي جريت على أسر بسرعة أول ما شافوا تجمهر الناس حواليه وهو بيبص عليها وهي بتجري: ماشي يا شادي أما وريتك
************************************************
في فيلا جاسم وشكرية....
سلوى: نفسي اعرف الولد ده راح فين؟
كامل: أنا بتصل بيه من الصبح لكن موبايله مقفول
أميرة: هو حصل ايه أنا مش فاهمة حاجة
سمية: ولا احنا والله يا بنتي
بعدين الكل بص لشكرية لكنها رافضة الكلام لحد ما جاسم يجي
رن جرس الباب وفتحت الدادة اللي قالت بفرحة: حمد الله على السلامة يا بني كدة تقلقنا عليك لكنها بصت شافت في أيده بنت أول مرة تشوفها وقالت: مين دي؟
دخل جاسم ومسك ايد البنت قدام الكل اللي مستغرب من وجودها في أيده وقال: دي تبقى مراتي رانيا الصفطى
يتبع
#رحاب_قابيل
