"مجنونة بحبك"
-يا بني ما ينفعش اللي انت بتقوله ده
جاسم: يا ماما مش طيقها
سلوى: ليه دي شكرية طيبة والله يا بني
رد بنرفزة: يعني ايه طيبة ما هي في بنات كتير طيبة اروح اتجوزهم كلهم
سلوى: يا حبيبي شكرية بنت ....
رد بسخرية: بنت... دي اقسم بالله فضلها شنب وتبقى ارجل من أبويا
كارم: احترم نفسك يا مهزق
جاسم: لا مؤاخذة يا حاج
رد عليه وهو باصص في الجرنال: بصراحة يا بني والله انت عندك حق مش هنكر البنت فيها رجولة عننا
جاسم: اهو شوفتي بقى
رفعت سلوى عينيها للسقف وهي بتقول: الصبر من عندك يارب
كارم: بس يا بني فكر فيها هتسيب الفلوس اللي جتلك دي كلها
جاسم: اسيب ابوها، ولا اني اتجوز واحد اسمه شكري
ضحك الأب وقال: والله يا بني شكري في أنوثة
سلوى: أصوت وألم الناس عليا
كارم: يا بني اتجوزه بقى ماتخليش امك تتجنن.. يرضيك أمك تتشرد
جاسم: هتتشرد، ولا هتتجنن؟
كارم: يا بني ما هي لو اتجننت هرميها في الشارع وش وأنت هتتبرى منها فالبتالي هتتشرد
سلوى كانت واقفة ورافعة حاجبها وبعدين قالت: خلصت يا حنين؟
كارم: خلصت
سلوى: اخر الكلام هتتجوز شكري
جاسم:شوفتي، شوفتي، حتى انتي بتقولي عليها شكري أهو
سلوى: أقصد شكرية.. خلصنا يا جاسم
************************************************
شكرية: تمام كده يا سطى
خليل: زي الفل يا شوشو تسلم ايدك
شكرية: طب اخلع بقى عشان عندي مصلحة كده لازم افورها على السخان
خليل: مصلحة ايه دي؟
شكرية: عارف يا عم خليل الناس كلها لابسة كمامة ومش حاطين مناخيرهم في وشهم عشان يقدروا يلبسوها
خليل: ماشي يا شوشو
شكرية بإبتسامة: سلام يا خلو
************************************************
في الموقع اللي شغال فيه جاسم
جاسم: يا رانيا يعني كنتي عيزاني أعمل ايه؟
رانيا وهي بتمسح دموعها: كنت عيزاك تدافع عن حبنا
جاسم: هو أنا يا بنتي قولتلك اني رايح اتجوزها؟
رانيا: كلامك بيقول انك رايح تتجوزها يا جاسم
جاسم: والله ما يحصل أنا مابحبش غيرك افهمي بقى
رانيا: أحلف طيب
جاسم: والله ما بحب غيرك ومش عايز اتجوز غيرك يعني انتي ممكن تصدقي اني ممكن اتجوز واحد اسمه شكري ترضهالي يا مضروبة
-مضروب مين يا مضروب؟
بص جاسم وراه هو ورانيا وهو بيقول: أنا عارف الصوت ده كويس
حطت شكرية أيديها على راسها بطريقة درامية وهي بتقول: ايه ده؟ ايه ده؟ أنا دايخة ولا اليوم باين عليه بيحلو؟
جاسم: لا ده بيوحش
شكرية: قلبي مش قادرة يعني كنت بتتكلم عني يعني بتفكر فيه تبقى بتحبني وش اعترف بقى
جاسم: يا بنتي أحب واحد اسمه شكري ترضيهالي؟
شكرية: اه ارضهالك عادي.. يا بني ده حتى اسم شكري أحلى وليه ريتم جميل غير لما توقع ولا تتشل تلاقي اللي يشيلك
هنا أدخلت رانيا وقالت بصوت رقيق: بعد الشر عليه
بصتلها شكرية من فوق لتحت وهي حاطة أيديها في جيبها ولقت أن رانيا فعلاً زي القمر شعر بني فاتح طويل مموج بطريقة جميلة وعينيها لونها أخضر فاتح وبيضا وعندها نمش مزودها جمال.
صفرت شكرية بإعجاب وهي بترفع نضارة الشمس من على عينيها: ده ايه النسوان الجامدة دي.. اللهم بارك حاجة زي القشطة والله
رانيا: نسوان؟!
جاسم: عشان لما اقول انك واحد صاحبي ما تزعليش
شكرية: لا حقك والله يا ابن خالتي الصراحة البت صاروخ
جاسم: ما تظبطي شوية يا شكري
شكرية: يعني ينفع تقول اظبطي وبعدين تقول شكري ما ينفعش تقول مثلا هو بتشرب اللبن
جاسم: يعني ايه؟
شكرية: يعني أنت معترف اني بنت في صميمك
جاسم: طب والله يا بنتي....
هنا قاطع كلامه المهندس كريم وهو بينادي على مهندس الكهربا الجديد وبيخبط على دراعه: يا باشمهندس بقالي ساعة بدور عليك
جاسم: شوفتي بقى اهو جالك الرد من غير ما أتكلم
بصت شكرية وراها وقالت: أؤمرني يا صاحبي
كريم: عايزك تيجي عشان تظبط معايا كام حاجة للكهربا
شكرية: عيوني
كريم: آسف أنا كنت فاكرك..
جاسم: لا ما تتأسفش يا كريم هي فعلا شكري مش شكرية، ثم استني هنا انتي ايه اللي جابك هنا من الأساس.
شكرية: تؤتؤ أولا اسمها "أنت" مش بتقولي شكري يبقى تقولي "أنت" لما تحب تهزقني هزقني صح.. ثانياً أنا كنت بقول عليك ذكي أنا مهندس الكهربا اللي هيشتغل معاكم يعني على قلبك يا جسومتي.. أوبس سوري يا جامدة بس اصل ده هيبقى جوزي إنما بالنسبة ليكي ما تخافيش جوزك عندي راجل طول بعرض وحليوة وأخر..
هنا خرجت رانيا عن شعورها: ما تسكتي بقى يا بتاعة انتي واحترمي نفسك شوية واعرفي بتتكلمي مع مين
شكرية: أؤمريني يا جامدة
رانيا: بطلي القرف ده احسن ليكي بدل ما ازعلك
كانت شكرية بتبصلها بإبتسامة وفاتحة بوقها وبعدين قالت: يا لهوي عليكي وانتي بتتكلمي ده انا قلبي اتشد وحب بجد وداب وأشتاق وماقلش لحد لا ده انتي لازم تاخدي بوسة
وراحت شداها وباستها وبعدين بصت لجاسم: لا حقك فعلا بس للاسف مش هتتجوز غيري بردوا يلا الله يعينك سلام
ده كله كان كريم مراقب الموقف ومشي مع شكرية وهو مش مبطل ضحك
************************************************
في الليل وتحديداً في بيت شكرية
ليلي: ما تلبسي الفستان اللي جبته ليكي يا بنتي
بصتلها شكرية ورفعت حاجب وقالتلها: فستان ايه يا ماما ده انتي عايزة تقلي مني في وسط الناس ولا ايه؟
ليلى: يا بنتي بطلي أسلوب الرجالة اللي انتي بتتكلمي بيه ده شوية
شكرية: طب والله مافيش أحلى من كده
ليلى بنفاد صبر: يا بنتي يا حبيبتي لو عيزاه يتجوزك خليه يعرف شكرية الانثى مش كل ما يبوص يشوف دكر قدامه عيب كده
شكرية: بصي يا أمي من الآخر أنا مش هتغير.. حياتي وأسلوبي هيفضلوا زي ما هما
ليلى: يا بنتي أحلامك على عينا وراسنا إنما الراجل محتاج يشوف انك بنت فعلاً
شكرية: يستحيل ألبس فساتين أو لبس البنات ده فهماني يا ماما
قامت ليلى ومسكت أيديها وقالتلها: يا بنتي اللي حصلك زمان مش هيحصل تاني ودي مرحلة وعدت
شدت شكرية أيديها بغضب من ايد أمها وردت: اللي حصلي زمان ممكن يحصلي تاني في أي وقت وخلاص ياريت مانفتحش السيرة دي ويلا نروح لأختك عشان نشوف الجوازة دي
ليلى: وانتي فكرك هيبوصلك
شكرية بعناد: هتجوزه يا أمي ومش بس كده كل اللي حصلي زمان وغربتنا وموت أبويا مش هيروح هدر وهاخد حقي تالت ومتلت
يتبع
#رحاب_قابيل
