بدأت اميره تفوق وتبص يمين وشمال مش مستوعبه وراسها تقيله وحاسه بصداع هيفرتك دماغها
دخل واحد مخبى وشه وقالها: ماتخافيش ماحدش هيلمسك كلها خمس دقائق وصاحب الطلب يجى ياخدك
أميرة: أنت مين؟
طنشها ومسك الفون واتصل وقال الطلب وصل يا باشا وقفل الفون وبصلها وقالها: مدفوع فيكى كتير مش عارف ليه؟
أميره..عايزين منى أيه ماترد عليا أنت مش عارف أنا ابقى بنت مين؟ وأخت مين؟
ولا عارف كمان خطيبي يبقى مين
بصلها الراجل من تحت قناعه وقال: بقولك ايه اكتمي يا بت أنتي، واعرفي حاجة خطيبك ده هو السبب في اللي انتي فيه دلوقتي
فياريت تكتمي لأني مابحبش الوش، وخلي بالك أنا صبري قليل يعني ممكن في لحظة أطير دماغك عشان أشتري دماغي
بصتله أميرة بخوف وسكتت، لكنها كانت عايزة تفهم ايه دخل ماجد في خطفها
أميرة: يارب
************************************************
في ڤيلا جاسم وشكرية..
رانيا قاعده مع شكريه وبتقولها: حكايتك ايه يارانيا؟
رانيا بإستغراب: حكايه ايه؟
شكرية: حكايتك ساعات بحس أن انتى مش وحشه انتى اللى عايزه تبينى كده صح؟
رانيا: غصب عنى
شكرية: أحكى يمكن ترتاحى
اتنهدت رانيا: أنا فعلا محتاجة أتكلم تعبت من كتر السكوت بصى ياستى أنا طول عمري لوحدى بابا مش حارمنى من حاجه ده من وجهة نظره بس هو حرمنى من أهم حاجة
شكرية: ايه هى؟
رانيا: اهتمامه، حبه، خوفه عليا
شكرية: أكيد هو مش قصده
رانيا: هو بيحسب لما يدينى فلوس واعيش براحتى يبقى كده مش حرمني من حاجة، اتعودت أن كل حاجة بعوذها بلاقيها، كنت ف المدرسه ع طول لوحدى ماليش صحاب ولما دخلت الكليه ماقولتش لحد لقب العيله عشان أحاول أطلع من اسم ابويا اللى حاوطنى ف كل حته
شكرية: إزاي؟
رانيا: كله كان بيصاحبنى عشان فلوسى ومركزى شايفنى بنك فلوس مش أكتر، ولولا ندى بنت عمي كان زماني اتجننت فعلا من اللمة الكدابة دي، بس ف الكليه عرفونى لنفسى لشخصى والحاجه الوحيده اللى تمنتها من قلبى ماطولتهاش
شكرية: قصدك كريم؟
أتوترت رانيا وقالت: كريم! لا طبعا، انتي.. انتي بتقولي ايه؟
شكرية: باين عليكى أن انتى بتحبيه
رانيا: باين عليا اوى
شكرية: اه وأنا هقولك هنعمل إيه انا حاسه أن كريم معجب بيكى بس مش حاسس واحنا بقى هنحسسه بده ونخليه ييجى راكع وهقولك بقى هنعمل إيه
رانيا: لا أنا مش عايزة خطط سبق وقولتلك اني فهمت أن الحب مش محتاج خطط عشان تخلي الناس تحبك بالعافية قولى
شكرية: أنا ماقولتش أنه مش بيحبك هو بيحبك بس بيكابر فهتسمعي كلامي ولا هتفضلي على رأيك و...
رانيا بإندفاع: لا هسمعه ومش بس كده وهنفذه بالحرف ودم مش لأجلي ده لأجلك عشان اسبلكم البيت وامشي
بصت شكرية ليها بإستغراب وبعدين ضحكت وقالت: استعنا ع شقا بالله
**********************************************
كان ماجد قاعد مع آسر في الشركة بيتكلموا لما دخلت علي إنچي السكرتيرة وقالتله: باشمهندس آسر
آسر: خير يا إنچي
اتلجلجت إنچي وقالت: بص، أصل يعني بقى كده، هو يعني...
ضرب آسر بايده على المكتب لدرجة أنه فزع ماجد مع إنچي وقال: انتي هتفضلي تقطعي ما تخلصي قولي اللي جاية عشانه مش فاضيلك
إنچي: حاضر حاضر هو...
أدخل ماجد: قولي يا إنچي ما تخافيش
قالت إنچي بسرعة: من حوالي أسبوع أو اكتر بيومين في واحد جيه لحضرتك وقالي أبلغك رسالة لكن أنا نسيت من زحمة الشغل
آسر: رسالة ايه؟
إنچي وهي بتحاول تفتكر: قالي أن السهرة النهاردة هتبقى أحلى لو اتجمعنا في.....
ماجد: في ايه؟
كمل آسر وقال: في العوامة
قالت إنچي بإبتسامة: أيوة بالظبط كده
بصلها آسر بعصبية وقال: ولسة فاكرة تقوليلي دلوقتي؟
حطت إنچي الملف اللي ماسكاه على وشها: والله نسيت
كان لسة هيتكلم لكن ماجد أدخل بسرعة وقال: أخرجي انتي دلوقتي يا إنچي
قالت إنچي: حاضر وجريت من قدامه
ماجد: مين ده يا آسر؟ وليه متعصب كل ده؟
آسر: عشان ده يبقى علي السلاموني
ماجد: أنت بتقول ايه؟ هو مش كان سافر بعد اليوم اللي شوفناه في الحفلة
آسر: لا مسافرش
ماجد بعصبية: ولما هو ماكنش سافر تاني ولا اختفى زي ما انت فهمتني ازاي ما تقوليش
آسر: ما قولتش عشان عارف عصبيتك هدمر كل حاجة
ماجد: يعني هو دلوقتي قدرت اوصل لحاجة
آسر: كنت مستنيه هو اللي يجي لحد عندي وفعلا جيه وبعدين كمل بصوت عالي: ولولا غباء الهانم كان زماني عرفت ايه اللي حصل يومها
ماجد: أنت لسة مُصر أنه ماعملش حاجة
آسر: ما قولتش أنه ماعملش بس اللي يقف جنبي طول العمر وماكنش بيسمح لحد يأذي بنت حتى لو كانت البنت دي أوروبية ومتاحة للجميع بردوا ماكنش بيسمح يبقى يجي في يوم وليلة يتهور على بنت كان بيعشقها عمره كله مستحيل ده يحصل إلا إذا.
ماجد: إلا إذا ايه؟
آسر: إلا إذا كان الموضوع ده وراه سر كبير ولازم أعرفه لازم
************************************************
ايه ده يا شكرية؟
شكرية: ده اللي المفروض تلبسيه واحنا رايحين نقابله دلوقتي
رانيا: بس الچيبة قصيرة أوي
بصتلها شكرية باين وقالت: وده المطلوب يا حبيبتي
رانيا: ليه يعني؟
ضربت شكرية جبهتها بكف أيديها وبعدين قالت: الصبر يارب
رانيا: في ايه؟
شكرية: دماغك دي كانت شغالة خطط بس عشان تمرمطيني أنا وبس ولا ايه؟
رانيا: آسفة يا شـ...
شكرية: يا بنتي مش قصدي بس شغلي مخك شوية تفتكري أنا عاملة فيكي كده ليه؟
رانيا ببلاهة: ليه؟
قالت شكرية بعصبية: عشان اخليه يغير في ايه يا رنوش مش كده
ضحكت رانيا: آسفة والله بس مخي بيجي عند كريم ويبقى
كملت بدلها شكرية وقالت:, بطة بلدي
رانيا: حصل
ضحكت شكرية وبعدين قالت لرانيا: يلا بينا
وصل الاتنين للمكان اللي كانوا هيقابلوا كريم فيه
كان كريم قاعد متوتر أخيرا هيشوف شكرية بعد المدة دي لكنه أول ما قام شاف بنوتة جميلة ماسية معاها بتجذب كل اللي موجود في المكان بجمالها وشعرها الاسود الطويل اللي محطوط على كتف واحد، لكنه اتعصب لما شافها لابسة جيبة قصيرة فوق الركبة، لكنه دارى عصبيته دي لما وصلوا قدامه وقام سلم عليهم بإبتسامة وبعد ما قعدوا وجه كلامه لرانيا: ازيك يا مدام رانيا
بصت لها شكرية بتحذير، فهمت رانيا شكرية تقصد ايه عشان كده بصتله بلا مبالاة وقالت: بخير
استغرب كريم برودها لكنه مابينش وقال: دايما
اضايقت رانيا وبصت لشكرية اللي ابتسمت وقالت: ندخل في الموضوع على طول بقى
كريم: عادي يعني؟
اتنحنحت شكرية وقالت بسرعة قبل ما كريم يتكلم: فين الكلاين اللي قولت عليه؟
فهم كريم وقال: جاي خلال عشر دقايق
سكت وبعدين مسك فونه وبعت رسالة لشكرية على الواتس اب، مسكت شكرية فونها وقرأت المسدج: أشرف وقع في الفخ ودكتور مالك رحب ومنتظر مكالمتك
ردت شكرية: بلغوا اني إن شاء الله هتواصل معاه قريب أوي وبلغه شكري
كريم: عن اذنكم
شكرية: على فين؟
كريم: زياد وصل هقوم استقبله
هزت شكرية راسها بتفهم وأول ما كريم مشي بصت ليها رانيا وقالت: شوفتي قولتلك عمره ما هيهتم
شكرية: اسكتي يا رانيا الله يرضى عليكي انتي ماشوفتيش كان بيبص على جيبتك بعصبية إزاي
رانيا: لا أنا أصلا مش في دماغه
شكرية: ماشي انتي مش في دماغه هخلص شغلي بقى مع الكلاين ده وبعدين نمشي على طول، تمام
رانيا: تمام
وصل كريم وزياد في نفس الوقت اللي كانت شكرية ورانية بيتكلموا وأول ما وصل سلم زياد بسرعة على شكرية وبعدين بص على رانيا اللي لفتت نظره أول ما شافها وقال وهو بيمد أيده ليها: أهلا جميلة
مدت رانيا أيديها وقالت بإبتسامة مجاملة: انا اسمي مش جميلة
قرب زياد كف أيدها عن شفايفه وطبع بوسة عليه وقال: ما ينفعش الجمال ده كله مايبقاش اسمه جميلة ده حتى عيب علينا
ابتسمت رانيا في خجل لكن شكرية عينيها لمعت لما شافت كريم هياكل زياد بطريقته دي، وفرحت أكتر لما شد أيده من أيدها بسرعة وقال: نحترم نفسنا شوية بقى يا باشمهندس وندخل في الشغل
اتنحنح زياد وقال وهو بيشد كرسي وبيعد جنب رانيا: معلش أعذروني بس مافيش حد يشوف الجمال ده كله وماينبهرش وينسى نفسه بسرعة كده
أدخلت شكرية بسرعة لما حست أن كريم هيتهور وقالت: باشمهندس كريم دلوقتي احنا عندنا الكمبوند وحضرتك عرضت أنه هتهتم بديكوراته
انتبه كريم وقال: أكيد طبعا
************************************************
في بيت شهد....
نفسي أعرف الزفتة دي ايه اللي أخرها لحد دلوقتي
أميمة: في ايه يا بنتي بتكلمي نفسك ليه؟
شهد: أميرة يا ماما نزلت تشتري كام حاجة من البقالة اللي جنبنا وأتأخرت
كانت أميمة على وشك تجاوب شهد لكنها سكتت لما سمعت الباب بيخبط جامد، جريت شهد بسرعة ناحية الباب وهي بتقول: ده كله يا هانم
لكنها شافت أخوها اللي قال: شهد الحقي ميرو
شهد بخوف: مالها أميرة يا خالد
خالد: أميرة اتخطفت
اتخضت شهد وقالتله: أنت بتقول ايه؟
خالد: أميرة اتخطفت يا شهد
شهد: إزاي؟
حكالها خالد على كل حاجة، وقعت شهد على الأرض وفضلت تعيط لكن أميمة قالتلها أنها لازم تلكم خطيبها عشان يتصرف
قامت شهد بسرعة واتصلت على ماجد اللي أول ما عرف الخبر ده وقع على الكرسي اللي كان وراه وقال: ده اللي كنت خايف منه
آسر: أهدى يا ماجد
لكن ماجد رد بسرعة أول ما الفون بتاعه رن وقال: كنتوا فين يا بهايم
الحارس: حضرتك احنا بس كنا بنحاول نهدي خناقة وهما كلها كانت دقيقتين بس
ماجد بغضب: دقيقتين اهو في دقيقتين كانت اتخطفت تقدر تقولي لو جرالها حاجة أنا ممكن أعمل فيكم ايه
الحارس: ما تخافيش يا باشا
ماجد: دقيقة وتكونوا قدامي فاهمين
قفل ماجد معاهم واتحرك لكنه قبل ما يمشي وقفه آسر وقاله: ولما أنت بتحبها ده كله ليه بتعاند
ماجد: أنت مابحبهاش وقولتلك ميت مرة أنا عمري ما حبيت في حياتي غير مارين
ابتسم آسر باستهزاء: ما هو باين
بصله ماجد بغضب وقال: طب لما أنت شايفني بحبها كده وشايف أن قلقي عليها هو حب، يبقى أنت كمان بتحب شهد
آسر: ما تقلبش الترابيزة يا ماجد
ماجد: أنا مابقلبش لكن فكر في تصرفاتك
آسر: قفل على الموضوع ده يا ماجد
ماجد: ياريت أنت كمان تقفل وخلينا زي ما احنا أفضل
قال ماجد كلامه وسابه ومشي
آسر: مش بحبها ده مجرد عند بالظبط كده
لكنه رد على نفسه وقال: أنت بتكدب على مين يا آسر
آسر لنفسه: مابكدبش على حد أنا مش بحبها
ولما أنت مش بتحبها تقدر تقولي عايز تتجوزها ليه؟
مجرد عند
عند! أنت كداب خليك صريح مع نفسك على الأقل
مسك آسر راسه وقال: اسكت بقى يستحيل أكون بحبها وهتجوزها بس عشان اساعدها وبعدين اسيبها هو بس كده أيوة هو ده السبب وبس
يستحيل احطها مكانها، يستحيل
************************************************
اتصل عليها جاسم وقالها تقابله في المكان الغريب ده ليه، فضلت واقفة تبص حواليها بإستغراب لحد ما سمعت صوت من وراها بيقولها: وحشتيني
بصت وراها بسرعة وشافته واقف قدامها بابتسامة جميلة بيقولها: ايه ما وحشتكيش
بصتله شكرية بخجل حاولت تخفيه وردت: أبو عمه ازاي يعني ماوحشتناش
ابتسم جاسم: تصدقي شكري كان وحشني
شكرية: عشان تعرف اني مش حرماك من حاجة
جاسم: لا حرماني
شكرية: أنا والله ده يبقى عيب على الرجالة
جاسم: شوفت بقى يا سيد المعلمين
شكرية: لا أنت تؤمر يا مجدعة، طلباتك
جاسم: مراتي وحشتني ما شوفتهاش
شكرية: مدام رانيا كانت...
حط جاسم أيده على شفايفها: أنا عمري ما اعتبرت حد مراتي غير شيري حبيبتي
شكرية: بس انت سبتها
جاسم: ودلوقتي عايز ارجع لها
شكرية: يعني ترضى ترجعلك بسرعة كده
جاسم: اللي تؤمر بيه مجاب
شكرية: يا سطى تبقى كده كفاءة
ضربها جاسم على جبهتها بهدوء وقال وهو بيشد ارنبة مناخيرها: ينفع القمر ابو شعر اصفر ده يقول يا سطى
شكرية: آمال يقول ايه؟
جاسم وهو بيقرب منها واخدها في حضنه بالراحة: يقول حبيبي
شكرية: ايه؟
جاسم: حـ ب يـ ب ي
قالت شكرية بهمس: بس لو حبيبي أتخلى عني تاني
جاسم: عمري، أنا آسف على كل حاجة حصلت مني هتسامحيني
شكرية: أفكر
ضربها جاسم على راسها: يا شيخة اعدي بقى
شكرية: صحيح أنت جايبني في المكان الهو ده ليه
جاسم: ناوي اقولك واخفي الجثة
شكرية: تفكير برا الصندوق فعلت
ضحك جاسم وبعدين شدها وقعد على كرسي كان خطوه وقعدها على رجله وقال: أنا بحب المكان هنا اوي تقدري تقولي مكان الأمان بتاعي وعمري ما شاركت حد فيه وانتي أول واحدة اعرفه ليها
شكرية: ليه؟
مسك أيديها وطبع عليها بوسة بحنان وقال: عشان انتي بقيتي ركن الأمان اكتر من المكان ده دلوقتي
شكرية بهمس: وبعد كده
قرب جاسم وطبع بوسة قريبة من شفايفها وقال: وبعد كده هتفضلي على طول الركن الدافي اللي بهرب فيه دايما من كل ضغوط الحياة
قربت منه شكرية وضمته وقالت بصوت حزين: أنا آسفة عشان خبيت أنا آسفة عشان عرفت بالطريقة الصعبة دي أنا آسفة عشان ماكنتش أول واحد يلمسني
حط جاسم أيده بسرعة علي شفايفها يسكتها عن الكلام: اوعي تعتذري عن حاجة مش بايدك
أنا اللي آسف عشان ماكنتش موجود معاكي، أنا اللي آسف عشان شكيت فيكي وصدقيني عمري ما هسيبك حقك مهما يحصل
حضنتها شكرية وقالت: عيزاك توعدني
جاسم: بايه
بصتله شكرية: انك مش هتحاول تنتقم
ابتسم جاسم وحضنها من غير ما ينطق لأنه عارف إنه مش هيسكت خصوصا بعد ما عرف مين هو رجل الأعمال المتورط في القضية دي
وبس بقى نسيبهم مع بعض شوية
***********************************************
بعد يوم كامل من اختفائها...
كانت قاعدة في اوضتها بتفكر ازاي قدر يوصلها بالسرعة دي
لكن اللي كان شاغل تفكيرها هدوء والدها بعد ما جت ولا كأنه اندهش أنه ازاي بسرعة قدر يوصل ليها
زي ما يكون الاتنين كانوا عارفين أن في حد بيدبر لاختطفها، والحد ده هو سامر
يتبع
#رحاب_قابيل
يا ترى ايه هو سر آسر وليه مش عايز يعترف بحبه لشهد؟
وليه ماجد خطب أميرة لما هو مش بيحبها
وايه رد فعل جاسم بعد ما عرف مين هو رجل الأعمال المتورط في الموضوع ده
وايه هو رد فعل أميرة لما تعرف أن ماجد عمره ما حبها
وشهد كمان لما تعرف أن آسر خطبها مجرد عند مش أكتر
الكل بقى يقول رأيه وعايزة تفاعل كتير بقى عشان أكمل يا جماعة
والشير أرجوكم يا شباب الله يرضى عليكم
