يا أميرة أهدي بقى
بصت لها أميرة بعصبية: أهدى بتقوليلي أهدى بعد اللي حكيته ليكي عيزاني أهدى
شهد: خلاص ما تهديش وقومي شدي في شعرك وقطعي هدومك زي المجانين
أميرة: هو أنتي مُصرة تعصبيني ليه؟
كانت شهد لسة هترد لكن لحقتها شكرية في الكلام وقالت: طب ممكن أفهم ايه وجه اعتراضك على جوازك من ماجد؟
ردت أميرة بسرعة: أنه مابيحبنيش
شكرية: وانتي عرفتي ازاي؟ وايه اثباتك على الكلام ده؟
فكرت أميرة شوية وقالت: نسي عيد ميلادي وافتكر كل أعياد ميلاد الناس التانية
شكرية بدوبلماسية: طب ما ده طبيعي
أميرة: طبيعي ازاي يعني؟
مسكتها شكرية من أيديها وقعدتها قدامها: أولا يا حبيبتي أنتم لسة عارفين بعض من فترة قليلة لكن مثلا أنا، احنا متربين مع بعض فبالتالي أكيد هيفتكر عني تفاصيل أكتر بحكم العشرة الكبيرة اللي ما بينا والأهم ما تنسيش أني أنا وماجد أخوات في الرضاعة
أميرة: ماشي، بس أقله يفتكر ايه هي اهتماماتي، يعرف عني مثلا بروح أمتى الكلية وامتى مش بروح، يحاول يتعرف عليا أكتر من كده
شكرية: طب وليه انتي ماتحوليش؟
أميرة: المفروض الخطوة دي تيجي منه
شكرية: يا حبيبتي لازم تيجي منكم أنتم الأتنين مس هينفع يكون في حد مهتم والتاني لا
أميرة: أنا اللي دايما مهتمة
شكرية: طب هسألك سؤال
أميرة: اتفضلي
شكرية: ايه أكتر أكلة ماجد بيحبها؟
أميرة: اممممممم البيتزا!
شكرية: غلط، البشاميل
شكرية: بلاش، ايه أكتر رواية ماجد حبها؟
أميرة بدهشة: هو بيحب يقرأ روايات أصلا؟
شكرية: عرفتي انك حتى ماحولتيش
أميرة بحزن: يبقى ازاي نتجوز بقى؟
شكرية: حبيبتي الجواز هيقربكم من بعض أكتر، ومادام الاستلطاف موجود، والإعجاب والحب موجودين يبقى ليه لا، وصدقيني لو ماجد فيه عيب أنا كنت هقولك بلاش
ابتسمت أميرة وقالت: لا ثبتيني خلاص على البركة
هنا بصوا لشهد وقالت أميرة: مالك يا شهد؟
مسحت شهد دموعها وقالت: شكلي أنا كمان هتجوز معاكي
شكرية وأميرة: بتتكلمي جد؟
شهد بتوتر: اه
أميرة: ومالك زعلانة كده ليه؟
شهد: ماعتقدش المفروض تسألي السؤال ده
هنا أدخلت شكرية ووقفت قدام شهد وقالت: ماتخافيش يا شهد صدقيني آسر أطيب من ماجد بس خليه يفتح لك قلبه ووقت ما يعمل كده كل مشاكلكلم هتتحل
شهد: وهو اللي زي آسر ده عنده مشاكل
اتنهدت شكرية وبعدين قالت بإبتسامة حزينة: أكتر واحد أتأذى بينا كان آسر
شهد بلهفة: إزاي؟
ابتسمت شكرية: هو اللي لازم يقولك وعشان يقولك لازم يطمن لك ووقت ما يحصل ده هو اللي هيجي بنفسه ويحكيلك كل حاجة
ابتسمت شهد: وعد هحاول
شكرية: وأنا هساعدك
أميرة: طب امشي واجي في وقت تاني بقى
ابتسم التلت بنات وحضنوا بعض وكل واحدة منهم بتحاول تتقوى بالتانية وجوا منهم تساؤلات كتير مافيش حد هيقدر يجاوبهم عليها غير أصحابها
***********************************************
فضل قاعد مستنيه كتير لكنه ماجاش فعشان كده قام من مكانه وسحب ورقة عشان يسبلوا ملاحظة أنه جيه ووقت ما كان لسة هيكتب سمع الباب وهو بيتفتح وقف مكانه وبصله بشر كبير لكن التاني قاله بهدوء: لو كنت عايز تضربني مش همنعك ده حقك
آسر: تفتكر أن الضرب كفاية عليك؟
علي: لو حتى قتلتني صدقني هيكون قليل، لكن كل اللي طالبه منك تسمعني ووقتها أعمل اللي أنت عايزه
آسر: ولو الكلام ماعجبنيش
علي: قولتلك وقتها تعمل اللي أنت عايزه
آسر: تمام
بدأ علي يحكي وقال: وقت اليوم المشؤوم ده جاني خبر أن شيري هتسافر
آسر بعصبية: علي اظبط الكلام
علي: أقصد شكرية، بقيت زي المجنون عمال أدور حوالين نفسي بحاول أفكر في كل طريقة توقفها عن سفرها أو على الأقل تتقبل حبي ليها وبعدين نسافر مع بعض
بص لآسر عشان يشوف منه أي رد فعل لكنه فضل ساكت وباصص ليه عشان كده علي كمل وقال:
في الوقت ده أنت اتصلت بيا وقولتلي نتقابل في البيت عندك حسيت أن ده حل مناسب وقولت وقتها هتلكك وندخل البيت عندها بمناسبة عيد ميلادها ووقت ما وصلتلك وكنت لسة هقولك نروح نعيدها قولتلي انك لازم تشتري حاجة فسكت وفضلت مستنيك لكن بعد ما مشيت بكام دقيقة باب البيت خبط وقومت أفتح على أساس أنه ماجد
قطعه آسر في الكلام وقاله: وكانت شكرية وساعتها قولت أعمل فيها كده عشان أضمن وجودها العمر كله
بصله علي بعتاب وقاله: تفتكر أنا ممكن أفكر أأذي شكرية بالطريقة دي خصوصًا أنت عارف انا بحبها قد ايه؟
آسر بعصبية: عشان كده عملت فيها العملة السودا دي
علي: أهدى لو سمحت وخليني أكمل
آسر: ماشي هديت
علي: وقتها فتحت الباب ولاقيت مساعد بابا مسعد جالي
علي: مسعد!
مسعد: ازيك يا باشا
علي: خير يا مسعد ايه سر الزيارة السعيدة دي ولا أخيرا بابا افتكر أنه عند ابن والمفروض يسأل عليه
مسعد: الباشا الكبير طول عمره فكرك وبعدين هنكمل كلامنا على الباب كده
علي: والله ده مش بيتي عشان اخليك تدخل
ساعتها الحوار ده كان بيدور وكانت شكرية واقفة قدام باب بيتها ولاحظت أنها جاية علينا فرحت وحاولت امشيه لكنها دخلت تاني عشان كده بصيت لمسعد ودخلته وساعتها طلب مني اجيبله ميه وفعلا دخلت المطبخ وجبتله الميه بس لما خرجت لاقيته مطلع ازازتين بيرة ولما رفضت وقولتله اني مابشربش ابتسم إبتسامة غريبة كده وراح مطلع كولا وقالي أظن مافيش حجة استغربت إصراراه لكن عشان يمشي تماشيت معاه وشربتها وبعدها فوقت لاقيت شكرية جنبي وأنا مش فاهم ايه اللي حصل ولا متذكر اي حاجة فعشان كده خرجت
آسر: وأنا بقى المفروض أصدق الحكاية دي، وعلى فرض ده اللي حصل وأنت عرفت المصيبة اللي عملتها أختفيت فين بقى ساعتها
علي: كنت في غيبوبة
اتصدم آسر: غيبوبة ايه؟
علي: بعد ما عرفت اللي عملته بعدها بقيت تايه وأصريت أروح أعترف على نفسي لكن والدي منعني
آسر: إزاي؟
علي: بخطف والدة شكرية وتهديده ليا بقتلها عشان كده وافقت أنه يهدد عمي هلال بيها ويجبره أنه يتنازل عن المحضر
آسر: أنت ابوك ده ايه شيطان
علي: أسوء من الشيطان صدقني
آسر: وازاي دخلت في غيبوبة؟
علي: بعد كل اللي حصل ما قدرتش استحمل وخرجت بجري مش عارف بجري على فين لكني كنت حاسس انيغ مخنوق وفي الوقت ده جت عربية وخبطتني ودخلت في غيبوبة مافوقتش منها غير بعد سنتين كانت كل حاجة أتغيرت ومن ساعتها بحاول أوصلك بس ماعرفتش حتى شكرية وأخوك حاولت أتواصل معاهم لكن كل حاجة كانت أتغيرت لحد ما جيت مصر من فترة وساعتها عرفت من السلاموني أن شكرية هنا وبعدها بفترة عرفت أنك موجود وكلكم بقيتوا في مصر عشان كده حاولت أتكلم معاها في الحفلة لكنكم ما ادتونيش فرصة
آسر: كل اللي عايز أعرفوا دلوقتي ايه اللي حصل وقت الحادثة؟
علي: أنا كمان نفسي أعرف
آسر: مافيش غير مسعد و....
علي: للأسف ماعرفش مكانه فين
آسر: لازم نعرف نوصله وهنوصله
علي: لازم
***********************************************
بص أنا عديت كل حاجة بمزاجي لكن دلوقتي عايزة أفهم ايه اصرارك على جواز بنتك بالطريقة دي؟
كامل: أولا كل حاجة في البيت ده بتم بمزاجي أنا، مش بمزاجك ومش معنى أني بعدي كل حاجة يبقى نتخطى حدودنا فاهمة يا سلوى
اتفزعت سلوى من صوته عشان كده حاولت تهديه وقالت: أنا من حقي أعرف ايه اللي بيحصل بالظبط يا كامل ولا مستني لما اخسرك زي ما سمية خسرت هلال، بعدين كملت كلامها بعياط وحطت أيديها على وشها: أنا مش في قوة سمية صدقني يا كامل ولو جرالك حاجة والله ما هستحمل
اتنهد كامل وقرب منها وشال أيديها من على وشها وقال: ما تخافيش عليا يا حبيبتي جوزك بسبع أرواح ومش واحد زي السلاموني اللي هيهددنا
سلوى: بس حقي أعرف ايه اللي بيحصل
كامل: هفهمك بس أرجوكي ما تخافيش
هزت سلوى راسها بتفهم وفضلت مستنيه دقيقة لحد ما كامل يجمع نفسه وقال: السلاموني بيكرهني من ساعة ما وقفت جنب سمية وهلال واتحديته اني اجوزهم، ساعتها جاني وعرض عليا منصب كبير في شركتهم وبمرتب لا يمكن تتخيليه حتى في وقتنا دلوقتي يعتبر مبلغ لا بأس بيه، لكني رفضت وقولتله بردوا هفضل جنب هلال لحد ما يتجوز سمية وأعلى ما في خيله يركبه فاكرة وقت ما منعتك من الخروج انتي وسمية لفترة كبيرة
سلوى: طبعا فاكرة حتى وقتها بردوا هلال منع سمية من الخروج وكمان بابا وكان ساعتها محمود مفكر أنه هو اللي عمل كده وبابا وماما اوهموه بده فعلا لحد ما هلال وسمية اتجوزوا وساعتها بردوا أنا وأنت كتبنا الكتاب وبعدها عملنا فرحنا وبعد فرحنا بيوم هلال وسمية سافروا
كامل: ده كله كان بسبب أشرف وقتها هددني أنه هيخطفك وهيعشني عمري كله متحصر عليكي وبعدها طلب من محمود أنه مايخرجش سمية لحد ما يأذن ليه بكده عشان يخطفها ويتجوزها غصب عنه عشان كده عمي الله يرحمه عجل بجوازتهم زي ما أنا بعمل بردوا دلوقتي؟
سلوى: وده ايه دخله في جوازة ماجد وأميرة....
سكتت شوية وبعدين قالت بدهشة: تقصد أن..
كامل: أشرف السلاموني هو كمان هدد بخطف بنتك لو ماسلمتوش شكرية
سلوى: أنت بتقول ايه؟
كامل: اللي سمعتيه، وخطفها دلوقتي كان حماية ليها مش أذى أبدًا لأن لو كان سامر أتأخر دقيقة كان زمان بنتك مع أشرف السلاموني
سلوى: والعمل؟
كامل: ماجد هيتجوز بنتك كمان كام يوم ومن وقتها لحد آخر الأسبوع بنتك ماتخطيش خطوة واحدة برا باب البيت ده مفهوم؟
سلوى: حاضر
قرب كامل منها وأخدها في حضنه وقال: ما تخافيش كل حاجة هتبقى تمام إن شاء الله
سلوى: يارب
***********************************************
أنا عايز أفهم ايه سر استعجال بابا في الجواز بالطريقة دي
شكرية: وايه المشكلة ماجد مش وحش يا جاسم
جاسم: مش حكاية وحش يا حبيبتي لكن الاستعجال بالطريقة دي في حاجة مش مطمناني
قربت منه شكرية ومسكت دقنه وخليته يبص ليها: ايه اللي مش مطمنك؟
جاسم:, مش عارف بس في حاجة مش مظبوطة
شكرية: لا أنت بس اللي بقيت شكاك زيادة عن اللزوم
جاسم: جايز
سابته شكرية وكانت لسة هتتحرك لكنه شدها عليه تاني وقال: طب ينفع تسيبي جوزك حبيبك كده؟
شكرية: ما أنا رايحة أحضر الأكل لجوزي حبيبي أهو
جاسم: لا استني عشان عندي ليكي مفاجأة
شكرية: اللي هي؟
مسكها من أيديها ناحية الدولاب وبعدين فتحه وقال: ها ايه رأيك؟
بصت شكرية في اتجاه الدولاب واتفاجأت بأنواع لبس كتير تخص المحجبات وقالت: ده لبس محجبات
جاسم: احنا اتفقنا خلاص
شكرية: بس... وقفت كلام وبعدين ابتسمت وقالت: جميل أوي ومعلش إني مالحقتش أختار معاك ومشيت عشان...
شدها جاسم ناحيته تاني وبصلها وقال: كفاية أنك مهتمة بمشاكل أختي وعيلتي وبتسمعي ليهم ودايما واقفة مكاني وبتسدي مكاني، صدقيني مش هقدر أوفي حقك في النقطة دي
شكرية: حبيبي عيلتك هي عيلتي وده كمان واقع لكن أنت كمان المفروض تكون موجود
جاسم: أنا عارف إني انشغلت عنهم كتير في الفترة الأخيرة لكن صدقيني هحاول أعوض كل ده بعدين سكت شوية وقال: طب ايه؟
شكرية بعدم فهم: ايه؟
شالها جاسم من على الأرض وقالها: تعالي هقولك
************************************************
كانت قاعدة بتفكر إزاي وامتى كان أبوها مشترك في الألعاب القذرة دي لا والأسوء إن أخوها كمان متورط معاه عقلها كان هيشت لحد ما فوقها صوت موبايلها اللي كان بيرن استغربت لانه رقم غريب لكنها فتحت المكاملة وقبل ما ترد جالها صوته وهو بيقول بزعيق: من غير كتر كلام ورغي مالوش أي لازمة أن شوفتك يا بنت السلاموني لابسة الچيبة المستفزة دي ولا لاقيتك بتتكلمي مع حد تاني ولا بتهزري مع راجل قدامي أو من ورايا ورحمة أبويا ما هيطلع عليكي شمس بعدها
استغربت رانيا وفضلت دقيقة بتجمع نفسها وبعدين أخدت نفس عميق وقالت: وأنت مالك يا ابن بكري باللي بلبسه وبعمله ليك فيه، مين أنت عشان تقولي أعمل ايه، وماعملش ايه ولا تحدد ليا مسار حياتي كمان
أنا حرة أعمل اللي انا عيزاه وقت ما أعوز واهزر واتكلم وقت ما يسمح ليا مزاجي لده، وأعتقد أنك مالكش حكم عليا وماتنساش إني على ذمة واحد تاني يعني هو اللي يقول امتى اتكلم وامتى لا، إنما أنت مجرد ماضي تجربة أليمة وعدت وخلصت يعني من الأخر صفحة وحرقتها
كريم: ماشي يا رانيا كل وقت وليه آخر
رانيا: عايزة أشوف الأخر ده
كريم بتوعد: هيجي، ما تستعجليش كله بأوانه وهيجي بس ساعتها ماتلوميش غير نفسك
غمضت رانيا عينيها وقالت بنبرة يأس وحزن: صدقني عمري ما لومت غير نفسي بس وقت ما يجي أخره أتمنى الكل يفتكرني سلام
#يتبع
#رحاب_قابيل
ياترى رانيا تقصد ايه بكلامها ده؟
وايه هي خطة السلاموني الجاية؟
ويا ترى سكرية نسيت انتقمها ولا لسة بتخطط
وجاسم ليه ساكت بعد ما عرف اسم اللي كان متورط
وايه هي خطة آسر وعلي عشان يلاقوا مسعد
وياترى حياة أميرة وشهد بعد الجواز هتبقى إزاي
توقعاتكم يا حلوين
وهرجع افكركم بالنسبة ليكم الشير واللايك والكومنتات مجرد زراير لمن بالنسبة ليا هتكبر البيدج فمتبخلوش بيهم
ويلا عايز. تشجيع كتير ولو لاقيت تفاعل حلو هنزل كمان بارت
