في المستشفى....
دخلت شهد وهي حاسة بالذنب من ناحيته وقربت منه ووقفت جنبه وقالت بصوت واطي:
أنا آسفة ماكنتش أعرف أنك معدتك حساسة والله
وبعدين لفت عشان تخرج لكن اتفاجئت باللي بيمسك أيديها وبيقول بصوت تعبان:
بس كده خلاص هو ده الاعتذار، أمال فين الشحتفة، وفين الدموع اللي المفروض تكون على وشي عشان افوق عليها وأنا امسك ايدك واقولك مسامحك يا حياتي
بصتله شهد باستغراب: افندم!
آسر: لا افندم ايييييه، بصي يلا قوليلي بحبك يا عمري وبوسيني وانا اسامحك واتنازل عن المحضر
شهد: نعم يا حبيبي ابوسك باستك عقربه باسك قطر سكة حديد سواقه أعمى أوأقولك على الأحسن
على باب الاوضة...
ماجد: اوباااااااا الموضوع بيولع
أميرة: طب وسع بس كده عشان اشوف أنا كمان
ماجد: يا ست بقى اوعي خليني اتفرج بمزاج وبعدين باصلها وقال: مش معاكي فيشار عشان الواحد يحس بمتعة المشهد
أميرة: هو انت بتتفرج على فيلم ده أخوك يا اهبل
بصلها ماجد: أهبل! بصي أنا هوريكي الاهبل ده هيعمل فيكي ايه بس لما اخلص اللي في أيدي وبعدين كمل بصوت هامس: والله ولاقينا اللي تربيك يا آسر اقطع دراعي إن ماكنتش بتحبها وبتكابر وبعدين قال بضحكة استهزاء: قال سكرتيرة خاصة قال ومن امتى وأنت بتحب البنات حواليك ده انت مابتطقهمش
أميرة: ياعيني عليك ده انت لسة شباب يا بني
ماجد: بت انتي بقولك ايه روحي هاتلنا فيشار
أميرة: وأنت مفكرني خدامتك يا بني
ماجد: ده هيبقى واجبك يا قرة عيني
في الاوضة كانت شهد لسة مستمرة في تهزيقها لأسر
أتوبيس سياحي فاخر يطلعلك من حيث لا تدري ياخدك بالحضن وينزل بيك الميه وكل الناس تنجى الا أنت
آسر: مش هرد عليكي، صحيح ما انتي بيئة تربية حواري
شمرت شهد كم بلوزتها واخدت وضع الإستعداد وقالت: أنا بقى هوريك تربية الحواري دي هتعمل فيك ايه
ماجد: ولعت وبعدين قال لأميرة: الفيشار يا بنتي
أميرة: يا بني اوعى خليني ادخل الحقها دي اتجننت رسمي
كان الاتنين بيتكلموا وما اخدوش بالهم من اللي واقف وراهم وقال: انتوا واقفين كده ليه؟
اتخضت أميرة وفقدت توازنها لكن الدكتور لحقها وقال: خلي بالك يا قمر
أميرة: آسفة
الدكتور: بس أنا مش آسف
ابتسمت أميرة وبصت في الأرض وكانت لسة هترد لكن اتفاجئت بماجد وهو بيوقف قدامها وقال: يا حبيبي تحب اجبلكم شوب عصير وشجرة
بصله محمد وقال: ياريت والله ويا سلام بقى لو مانجا
كان ماجد على وشك يضربه لكن أميرة أدخلت بسرعة لما حست أن ماجد هيضربه وقالت: حضرتك الدكتور اللي متابع حالة آسر يلا اتفضل ادخل واحنا هندخل معاك عشان نطمن عليه
ابتسم لها محمد وقال: عيوني
دخل محمد لكن ماجد مسك ايد أميرة وقرب منها وقال بصوت واطي في ودنها: اتلمي عشان يومك يعدي وحسابي معاكي بعدين يا أميرة
***********************************************
عند جاسم وشكرية.........
جاسم: مش هتقوليلي بردوا كنتي فين مع كريم؟
بعدت عنه شكرية وقالت: هو انت يا بني عندك انفصام في الشخصية
جاسم: ليه؟
شكرية: من شوية كنت محترم كده وكنت لسة.....
وسكتت شكرية وبصت في الأرض بكسوف، بص جاسم في الأرض مكان ما بتبص: ايه الكلام وقع منك وبدوري عليه
شكرية: يا باي
جاسم: ها كنتي بتقولي أنا كنت ايه بقى؟
كانت لسة شكرية هترد لكن قاطعه صوت أنثوي: جاسم حبيبي أنت جيت امتى
شكرية بصوت هامس: وجائت هادمة الملذات
سمعها جاسم وضحك على كلامها لكن مالحقش يرد عليها لما قربت منه رانيا وحضنته وقالت: وحشتني يا بيبي
وبعدين شدته من أيده وقالت له: تعالى يا بيبي ليك عندي مفاجأة
مشي معاها جاسم وهو بيبتسم على شكرية اللي كان وشها احمر وودنها قربت تطلع دخان من كتر الغيرة
بصلها جاسم وقال: بتحبني، سوري بقى عندي مفاجأة هطلع أشوفها
ابتسمت شكرية ابتسامة صفرا وهزت راسها: اتفضل يا بيبي
بعد ما طلعوا قالت شكرية: حضنتك عقربة وايه بيبي دي هو لسة بيسنن
وبعدين أخدت شنطتها وخرجت وهي بتكلم نفسها: يارب تكون المفاجأة تعبان يطلع يلدعكوا انتوا الاتنين ونخلص منكوا لا جاسم بعد الشر عليه، أنا همشي بدل ما ارتكب فيهم جناية
************************************************
في شركة السلاموني......
دخلت السكرتيرة عليه وهو بيتابع الاوراق اللي قدامه باهتمام وقالت: آسفة يا مستر أشرف لكن في واحد مُصر يقابل حضرتك وبيقول أنه صديق قديم ليك
بصلها أشرف باهتمام: واسمه ايه الصديق القديم ده؟
السكرتيرة: مش عايز يقول اسمه
أشرف: طب دخليه
دخل كامل وأول ما شافه بص للسكرتيرة وقالها: اخرجي انتي
خرجت السكرتيرة وبصله كامل وقاله: دي كانت أول ضربة مني استعد للي جاي
بصله أشرف باستهزاء: وأنت مفكر أن اللي عملته ده هيهز الإمبراطورية بتاعتي
قعد كامل وحط رجل على رجل: لا دي كانت مجرد قرصة ودن ولسة اللي جاي احلى استعد
أشرف: عارف ثقتك في نفسك دي بتفكرني بيه
قام كامل بعصبية ومسك ياقة قميصه: سيرته ماتجيش على لسانك القذر ده وانا هعرفك مين هو كامل الصفطي ولما باجي اضرب بضرب في الوش مش من الضهر زي ما انت عملت ولا نسيت؟
نزل أشرف ايدين كامل ونفض قميصه: الحرب مباح فيها كل شيء يا ترى بقى انت عندك استعداد لحربي ولا هتقع من أول جولة زي هلال
بصله كامل بغل وقال: الايام بينا يا سلاموني سلام
خرج كامل وهبد الباب وراه أما أشرف رمى كل اللي قدامه على المكتب بغضب وبعد ما هدي قال للسكرتيرة تجبله علي من تحت الأرض
في عربية كامل افتكر لما كان بيحكي لسلوى على اللي حصل في الفترة اللي كانت بعد حادثة شكرية
كان كامل في الوقت ده في مكتبه وموبايله رن برقم دولي اول مرة يشوفه
كامل: الو
استاذ كامل معايا
كامل: أيوة مين معايا؟
أنا ماجد من طرف خالي هلال
استغرب كامل وقال: هلال مين؟
ماجد: هلال العطار
قام من مكانه بفزع: هو جراله حاجة
ماجد: خالي في المستشفى وطالب يقابل حضرتك ضروري
كامل: اديني العنوان بسرعة وبكرة إن شاء الله هكون عندكم
