الساعه 8ص جاسر جا داخل البيت لقا ابوهو برا ف الحديقه قاعد ف كرسي حول الطاوله المرصوصه فيها اربعه كراسي حديد مطليه باللون الابيض لابس نظارتو ماسك الجريده بيد وكباية الجبنه بيد تانيه ومندمج شديد
جاسر : السلام عليكم
منير وهو بقلع نظارتو ويقوم يسلم عليهو : اهليين ولدي وعليكم السلام اتفضل
قعدو الاتنين ف الكراسي
-- كيف حالك ابوي
منير : تمام والله كيفك انته ولما كيفها
-- الحمدلله كويسين وبتسلم عليك
-- الله يسلمها مطولين منها امس جات وما شفتها مع جوطة اللمه
-- بجيبا ليكم قريب ان شاء الله .. اممم امي قاعده؟
-- ايوه جوا بتعمل غدا ماشين لي عمك منير ذكرتني قال لي اكلمك تجو انتو ولما
-- ليه خير؟
-- بنتو امل جاها عريس ومنتصر قال لي تجي بكرا ونتشاور ف الموضوع واصلا مطولين منهم قلنا بالمره نمشي كلنا
-- اهاا كويس والله طيب بعدين بنجي انا ولما
-- طيب
-- حامشي لي امي
-- اي ادخل سلم عليها
جاسر : تمام
جاسر جا داخل بباب البيت قابل علا وهي طالعه ع الجامعه
علا : جاسر ازييك
جاسر : الحمدلله تمام طالعه الجامعه ياداب؟
علا : ايوه الليله محاضرتي بتبدا 9
جاسر : اهاا كويس
علا كانت ماشه جاسر وقفها
جاسر : بت اقيفي
علا : هاا
جاسر : امس قلتي شنو لي لما خلاها تتقلب كدا؟ لا والاحلى انها اعتذرت ودي اول مره من نتزوج تعملا
-- هههه لالا ي حبيبي دا سر المهنه المره الجايه تدفع قبل اتكلم معاها
-- لا يا شيخه دا اصلا لو بقى في مره تانيه
-- من يومك حيوان🌚
-- بعدين جايا هناك؟
-- بيت عمو منير ايوه بجي اصلا عندي محاضره وحده بخلصها وبجيكم بهناك
-- تمام
علا طلعت وجاسر مشا المطبخ لامو وكانت بتخت الاكل ف العمود
جاسر : امي
صباح : جاسر اتفضل اتفضل ي ولدي
جاسر : كيفك كويسه
صباح : ف نعمه الحمدلله انت كيفك
جاسر : انا كويس وين عرفه بتسوي ف الاكل انتي؟
-- بنتها ولادتها الليله م قدرت تجي وماشين لي عمك
-- امي جاي اسألك دا شنو العملتيها امس دا
صباح لوت خشمها وكتفت يدينها : عملته شنو
-- يمه انتي فاهمه انا قصدي شنو
-- ايوه فاهمه والعملتو دا الصح وابدا ما ندمانه عليهو
-- صح ؟؟
صباح بأنفعال: ايوه صح عايزني ارفع راسي واقول ليهم دي مرت ولدي .. ولدي ي يمه الالف بت وبت بتتمناهو اقول ليهم دي مرتو؟ انت ما شفته شكلها كان كيف؟ والله عرفه الشغاله شكلها كان احسن منها وانت جاي تقول لي دا شنو العملتيهو؟ خليها تبقى زي النسوان اول وتهزب نفسها شويه ما ممكن اصلا وانا من البدايه البت دي ما عاجباني قلته ليك ما تعرسها ي جاسر م تعرسها البت دي م مستوانا وانت عملته الفي راسك وعرستها واهندي ملابس زي الناس ما عارفه تلبس وكمان قدام اهلي حايمه بيها وعايزني اقول ليهم دي مرت ولدي؟ وبعدين هي 4 سنه متزوجه ولد ما جابتو ليك قاعد معاها للان لي انا ما بعرف
"جاسر كان ماسك نفسو وما عايز ينفعل لأنو ف النهايه دي امو"
-- امي لا اله الا الله
-- سيدنا محمد رسول الله
-- التصرف دا تاني كان اتكرر ما حيحصل خير انا لما بحبها وعاجباني كدا البت زنبها شنو تسمع كلام زي دا عشان الايامات دي نفسياتها تعبانه ومتضايقه تتعاملي معاها بالطريقه دي؟ واذا انتي الوضع ما عاجبك فا انا زاتي حأريحك من لما ومني انا كمان وحنسافر انا وهي وتاني م بتشوفي وشي
صباح شهقت وختت يدها ع صدرها : سجميي انت بتقول لأمك الكلام دا البت دي اكيد عامله ليك حاجه ولا كاتباك انا اصلا عارفاها وعارفه حركاتها دي
-- امممي الله يهديك دا شنو البتقولي فيهو دا "وقام طلع "
صباح : الحيوانه دي خلت ولدي يتكلم معاي بالطريقه دي ؟ شوف البت دي بالله
