فتحيه وهي قاعده جمب بتها الراقده في السرير : انتي كويسه يا بتي
غفران : كويسه
قيس : ما تقلقي يا خالتي دوخه بسيطه وهدي قدامك كويسه.. يلا خليها عشان ترتاح شويه
فتحيه : سمح قمت
فتحيه طلعت وقيس جا قعد جمبها
قيس : زعلانه؟
غفران : من شنو
-- لأنو ما كلمناك
-- لا
-- طيب ما تشتغلي بالموضوع كتير
-- خليهو يطلع من البيت دا انا ما عايزه اشوف وشو
-- ركزي في قرايتك هسي وانسي الحصل دا كلو
-- طلعو بس من هنا البيت دا بيت امك ما بيت ابوي وريهو وخليهو يطلع
-- حااضر بطلعو ارتاحي انتي هسي وما تشغلي بالك
قيس قام وقبل يطلع وقف لمن نادتو
-- قيس
قيس وهو بقبل عليها : عايزه حاجه؟
-- انت بس اخوي انا ما عندي اخو غيرك
جا باسها في راسها ومسح ع شعرها وطلع
غفران بقت تتقلب وهي متضايقه .. اخوها الشافتو اخر مره وهي عمرها 5 سنوات جا هسي يفتشهم؟
قيس طلع برا فتحيه نادتو
فتحيه : تعال يا ولدي
جا قعد جمبها
قيس : نعم
-- انا ما عارفه الخلاكم تتضاربو كدي شنو لكن يا ولدي عليك الله خليهو قاعد انا ما صدقت ولدي رجع لي في حضني بعد السنين دي كلها ما بدور اخسرو تاني عارفاهو طايش وما بعمل الا الفي راسو لكن دا ولدي في النهايه وما بقدر ابعدو مني بعد رجع لي تاني
قيس : خير ان شاء الله
فتحيه : الله يرضى عليك يا ولدي ويفتحها عليك محل ما تقبل
قيس : تعال وراي
وضاح : في شنو
-- دايرين نتكلم كلام رجال تعال
طلعو الاتنين برا البيت
وضاح : خير اها
قيس : قعاد في البيت دا ما عندك تلم حاجاتك وتمشي لحدي ما غفران تخلص امتحاناتها وبنشوف البحصل بعد داك
وضاح : انا عايز اتكلم معاها
-- بعد تنتهي من الامتحانات قلنا
-- تمام لكن امشي وين ما عارف لي محل وشغل ما شغال
-- كنت قاعد وين قبل تجي هنا
-- مع حسان
-- امشي اقعد معاهو
-- ما حيخليني
-- ليه
-- قبل ما اجي هنا قال لي لو وصلت بيتهم تاني ما تجي راجع
-- انتظر هنا
قيس دخل وجا راجع بعد عشرة دقايق وهو شايل ظرف
قيس : دي شوف بيها شقه ودبر بيها روحك الشهر دا
-- ههه الحنيه القامت عليك فجأه دي شنو
-- عشان امك بس لو ما كدا كنت رميتك في الشارع زيك زي اي كلب
-- ههههه ظاابط
-- تعال هنا
-- اها في ظرف تاني ولا شنو
-- قسما بالله قسما برب العرش العظيم يا وضاح تاني اشوفك تعاين لي نور ساي ما بتلقى اليطلعك من يدي
-- يا زول انا نور دي زمان كسرتا حنكا
قيس مسكو من ياقة قميصو ولزاهو بقوه : امشي قبل ارتكب فيك جريمه
وضاح : يلا سلم على الوالده كتير بالله
دخل جوا ولقا فتحيه جمب الباب
فتحيه : في النهايه دا بيتك وانت حر بس كنت دايره ولدي جمبي
قيس : تعالي تعالي يا امي
دخلها جوا وقعد جمبها
قيس : وانا ما بقدر اقول ليك لا .. وضاح حيمشي فترة غفران تخلص امتحاناتها وحيجي راجع .. انا ما داير اي شي يأثر على دراستها او يخليها تتوتر الايام دي هي تعبت شديد عشان تصل للعايزاهو وما بسمح لي اي شي هسي يجي وينرفزها
فتحيه : الله يوفقك يا قيس ويديك مرادك ويسعدك في الدارين يارب بركة العصريه دي
.......................
