سهام : ربنا يكتب الشفاء العاجل ان شاء الله
وجدان :اللهم امين يارب
حباب : اختك وين يابت
غاليه : مع خالتو صباح
حباب : ناديها خليها تسلم على ام ضرتها😏
ريان لأمها : المرا دي نصيحه ي ربي
وجدان : تقولي شنو بس الحمدلله
لما : اللهم طولك ياروح
سهام بهمس : اسكتي ي بت خليها تنضم زي ما دايرة انا ما بؤاخذها المرا دي
لما : امل وين
وجدان : في المطبخ بتسوي الغدا مع رحمه
لما : حأمشي ليها
علا كانت قاعده طرف السرير وامها خاته راسها على رجولهت
علا : ماما انتي متأكدة انك كويسه
صباح : يا بت هدي انا قدامك كويسه
علا : خوفتيني عليك شديد
غيم : خالتو كويسه ي علا
صباح : الحمدلله ما فيني شي
غاليه جات داخله : غيم امي عايزاك تحت
غيم : في شنو
غاليه رفعت اكتافها اشارة لأنها م عارفه طلعو الاتنين من الغرفه ونزلو سلمت على سهام وقعدت جمب امها
حباب : عرفتيها
غيم : تؤ ..ما عرفتها
حباب : دي خالتك سهام ام لما
غيم : اممم اهلين خالتو
سهام : اهلين
لما : اسفه ع تصرفي القبيل
امل وهي بقطع البطاطس: تصرف شنو
لما : يعني.. لأني طلعت بالطريقه ديك
امل : ما مشكله لو كنت مكانك كنت عملت كدا بعد الكلام السمعتو
-- جاسر م جا؟
-- ما بعرف والله انا من جيت جوا المطبخ خالتو صباح تاني ما شفتها زاتو
-- طيب هاتي انا بحمرها
-- لالا ماف داعي
--يا بت انتي من قبيل شغاله كفا جيبي
-- ما مشكله اصلا ما تعبانه
لما شالت منها البطاطس وبدت تحمرها : امشي شوفي خالتو صباح وخلي علا تطلع من الغرفه عشان ترتاح شويه
-- طيب
رحمه : يلا ي لما سريع عشان نخت الغدا للرجال
لما : في منو في الصالون؟
رحمه : منتصر ومحمد والباقين رجال اهلهم ديل ما بعرفهم ..لكن شايفه محمد قبل شويه طلع
لما : اهاا طيب
رحمه : والله ي بتي لو شوفتيها لمن وقعت يدها ظاهر تحت الجلد جزء في حته وجزء في حته
لما : وااي كيف يعني
رحمه : والله عضامها اتفرتقت عديل بتشوفي يدها مفصوله
لما : واي اسكتي اسكتي خلاص
..........................
حسن : حأدخل في الموضوع طوالي... قبل 16 سنه بعد وفاة امكم بي سنه وضعي ما كان على قدر كدا وشغلي الفي المعهد ما كان بقدر يعيشني ويعيشكم قدمت لشغل برا والحمدلله وافقو ع الشغل حتى والشغل كان كويس شديد قلت اشتغل سنتين تلاته اجيب كم قرش اشغلهم هنا اقدر ءامن بيهم معيشتنا ..بس في كانت مشكله بتمنعني اسافر
هندا : ابوك عبدالله الله يرحمو كان بالنسبة لي سند بكل ما للكلمه من معنى ..خالك هلال ومرتو كانو في كندا وامي وابوي اصلا متوفيين ما كان عندي زول غيرو بعد اتوفى انا دخلت في حاله صعبه بعدها بسنة اتعرفت على حسن كان شغال في معهد بتاع حلويات دخلت المعهد عشان اتعلم واشتغل في الحاجه دي ما كنت عايزة اشيل اخوي همي هو زاتو وضعو ما كان تمام خالص.. حكى لي بقصتو انو زوجتو اتوفت وعندو ولد وبت وظروفو صعبه شويه بقينا على تواصل انا وهو وهلال جا مع مرتو وحلا الكانت لسه صغيره في عمرك .. بعدها بفتره ما طويله حسن جا وقال لي انو جاتو فرصة شغل برا والشغل كويس شديد بس في مشكله سألتو
