سهام : ي بتي ما صح البتسويهو في روحك دا
لؤي بهمس: امي خليها علي واطلعي
سهام : هي كيفن اخليها كدا البت من امس ما اتكلمت ولا اتحركت بس راقده رقدتها دي نوم زي الناس ما نامت
لؤي : امي اطلعي بس انا بتصرف
سهام طلعت ولؤي اتقدم لأختو الراقده ومقبله على الحيطه ..قعد ف السرير
لؤي : يعني كدا حيخلي العرس؟
لما غمضت عيونها بدون ما تتكلم
لؤي : يا لما جاسر ما غلطان من حقو يعرس ويجيب اطفال وهو زاتو متمسك بيك وما داير يطلقك وجا وكلمنا انا وامي قبل يكلمك اها نقول ليهو شنو ما تعرس وما تجيب اولاد ولا نربطو .. ارضي بالواقع وما تكوني انانيه
لما هنا اتذكرت كلمات جاسر وغمضت عيونها بشده لمن دموعها نزلو "وانا عايزك تكوني انانيه فيني"
لما بصوت مبحوح ومخنوق: اطلع
لؤي : شئتي ام ابيتي دا واقعك عيشيهو واقبلي بيهو
باسها ع راسها وطلع
لما كانت بتتنهد وبتتذكر تفاصيل يوم امس
لما : حتعرس صح؟
جاسر قام وراها ومسكها من اكتافها : لما اسمعين...
لما نفضت يدينو منها بلعت ريقها وبقت تتكلم بصعوبه: ليه.. ليه يا جاسر انت... انت وعدتني
جاسر : ما تصعبيها علي
لما : ما حأصعبها بالعكس حأسهلها عليك
مشا وراهو ومسكها من زراعها ولفاها عليو وهو ضاغطها على اكتافها
جاسر : مش قلتي لي عرس ومن حقوقك تشوف اولادك مش بعضمة لسانك قلتي الكلام دا مالك هسي
لما حاولت تتفكا منو: زح مني
جاسر فكاها ومشا قعد
مشت لبست عبايتها وطرحتها طلعت وجاسر طلع وراها
جاسر : تعالي انا حأوديك
لما : جاسر ما عايزه اشوفك الله يرضى عليك امشي
ما ردا عليها دخلها العربيه وهو دخل وساقها لحدي بيتهم انتظرها لحدي ما دخلت ومن وقتها دخلت غرفتها القديمه وما اتكلمت مع امها ولا اخوها
رجعت لواقعها لمن سمعت صوتهم
امل: هاااي
علا : جيناا بشنطنا
امل : ما عبرتنا
علا : نايمه ولا شنو
مشو عليها وبقو يهزو فيها عشان تصحى
امل : عارفنك صاحيه قومي
علا : لما قومي ياخ
امل : نرجع يعني
علا : قومي ي امل ارح
قامو الاتنين وقبل يصلو الباب لما قامت وارتمت في حضن علا .. حضنتها وهم التلاته ببكو ما عارفين يسندوها كيف ولا يقولو ليها شنو علا قعدتها في السرير ومسحت ليها دموعها
علا : هشش خلاص واحد زي اخوي دا ولا تخسري دموعك فيهو ما يستاهل
امل مسكتها من يدها وطبطت عليها : واحنا هنا جمبك ومعاك
علا : يلا قومي غسلي وشك وتعالي عندنا ليك حكاوي كتيره ولا ما كدا يا امل
امل : كدا ونص وخمسه يلا سريع الشمارات ما تفوتك
لما ابتسمت في نص دموعها وقامت
علا : اخخخخ يا جاسر اخخ
امل : الله يسامحك
علا : بيتنا دا ما حأعتبو كان العرس ما خلص
امل : ولا انا حأمشي بيتنا كمان
علا : امي ما خلت زول ما عزمتو كأنو اول مره يعرس الناس من الليله بدو يجو
امل : اقفلي السيره دي عليك الله براي قلبي متقطع
علا: استغفرالله العظيم يارب
سهام جات داخله وهي جايبه ليهم كبابي العصير
امل : دا شنو يا خالتو ما كان تتعبي روحك
علا : اي البيت بيتنا لو عايزين برانا بنقوم
سهام : دي حاجه بارده اشربو في الحر دا بتكونو سخنتو وافتحو المكيف دا ما بعرف ليهو عرفنا تلفزيون بي ريمود كمان جانا مكيف بي ريمود عشنا وشفنا والله
علا وامل ضحكو وشالو العصير
سهام : عليكم الله يا بناتي اتكلمو معاها وونسوها ما تخلوها براها
علا : واحنا اصلا جايين عشان كدا ما تشيلي هم
امل : ما تخافي عليها ما حنخليها ان شاء الله
لما جات داخله وسهام هزت ليهم راسها وطلعت .. قعدت في السرير القصادهم وهي منزله راسها
امل : تعالي هنا خايفه مننا ولا شنو
علا : اي الشمار ما بكون حلو لو ما قعدتي جمبنا
جات قعدت جمبهم
لما: عارفاكم جايين عشان تقيفو جمبي بس انا ما زعلانه منو ولا بلومو وانا اصلا كنت بقول ليهو الكلام دا من زمان بس ما اقتنع ما عارفه الاقنعو هسي شنو بس المهم اقتنع وحيكمل حياتو بالطريقه الصح .. يمكن انا ما قدرت افرحو زي ما هو عايز بس الله حيعوضو ان شاء الله
علا : لما ما تقولي ك...
لما : بالجد صدقوني انا ما زعلانه وواعيه للبقولو اي بكيت بس دي حاجه طبيعيه واي وحده مكاني كانت حتبكي المهم هسي فرحتو اهم من اي شي
امل : خلاص يا جماعه الله يخليكم اقفلو الموضوع دا
علا : نلعب ليدو؟
لما : انا ما عايزه حأقوم اعمل الفطور
علا وامل عاينو لبعض وهم ساكتين حيقولو شنو يعني؟!
.....................
