9:30 pm
وهي بتقبل ع الجهه التانيه وبتدي الحيطه ظهرها
نور: نفسي اعرف انتي اصلا لسانك خفيف كدا ولا مع قيس بس
غفران فتحت عيونها : هههه لا مع قيس بس
-- وانتي القال ليك منو انا ببكي بالليل
-- بسمعك قبل انوم
-- اممم
غفران قامت وقعدت ف سريرها ومسكت ايديها : نور انتي البتعملي فيهو دا ما صح انا قبل كدا قلت ليك ما حتستفيدي شي من البكا غير الصداع البتقومي بيهو كل صباح وعدم تركيزك في قرايتك .. الله يخليك بطلي البتسوي دا وما تفكري في اي شي حاليا وانا معاك خطوه بخطوه عشان تقدري تتفوقي وتجيبي النسبه العايزاها
نور: ان شاء الله
غفران : وعد
نور بابتسامه مكسوره: وعد
غفران وهي بترجع لسريرها: طيب نومي لأنو بكرا كمان حنقوم 3
-- لاا بتهظري صح
-- ابدااا
-- الله يسامحك يا غفران
-- هههه امين يارب
.................
نهله : اعمل شنو يا هلال يعني انا شغلي ما بسمح لي لحاجات زي دي
هلال : بتك اهملتيها شديد يا نهله وبتبعد منك كدا انا ابوها وما بتقدر تصارحني بأي شي لكن انتي لو قربتي منها حتقرب لينا احنا الاتنين
-- انا ما مقصره منها في شي اي شي عايزاهو بجيبو ليها في وقتو
-- الحنيه ما بشتروها بالقروش وبتك دايراك جمبها وتحسسيها باهتمامك بيها ووقوفك جمبها في الايام دي بالزات
-- ان شاء الله هسي انا اتأخرت وطالعه
-- استغفر الله العظيم يارب
نهله وهي طالعه مشت لحلا دقت باب غرفتها ودخلت لقتها نايمه قفلت الباب براحه وطلعت " ي حليلنا احنا البقومونا بي لبعه لمن السلسله الفقريه تتفرتق سلسله سلسله"
هندا : اي ي قيس
قيس : كيفك ي خاله ان شاء الله تمام
-- كويسه الحمدلله انت اخبارك شنو وناس بيتكم كيف
-- كلهم في نعمه الحمدلله
-- اها نور كويسه وبتذاكر كويس؟
-- اي ما تشيلي هم كويسه شديد
-- لالا الحمدلله لو كدا هسي نامت ولا صاحيه
-- انا لسه ما رجعت البيت والله لكن بكونو نامو لأنو كانو معاي قبل شويه طلعو يفرقو وكدا وكانو بقولو قامو بدري وراجعين يرقدو طوالي
-- ما تكون بتطلع كتير
-- لالا بس الليله وانا العزمتهم
-- طيب تمام سلم ع امك
-- الله يسلمك يارب
............
12:30
جاسر طلع من الغرفه..لما كانت ف الارض راقده ع الحيطه جمب الباب اول ما فتح الباب قامت .. وكانت تاني مره تشوف فيها دموعو (اول مره يوم زواجهم لأنو تعبو شديد عشان يصلو لليوم دا بس ديك كانت دموع فرح) اتسمرت مكانها وهم بتبادلو النظرات دموعها نزلو وهي بتعاين ليهو وهو بالشكل دا كان جارح يدو لأنو كسر المرايه بيدو .. تابع خطواتو ع الباب وهي جرت ووقفت قدامو اتخطاها وكان طالع جرتو للكنبه ختت راسو صدرها واللحظه دي حست بتنهيداتو كانت بتبكي معاهو بدون ما تفهم الحاصل شنو ...فضلو على الحاله دي قريب 10دقائق جاسر قام دخل الحمام غسل وشو وشال مفاتيح عربيتو وطلع
لما قامت دخلت غرفتهم ولقت اي شي مجدع ف الارض ختت ايدها ع شفايفها غمضت عيونها ودموعها لسه بتنزل رقدت ع السرير وهي ضامه المخده من خوفها عليهو .. بعد شويتين شالت تلفونها واتصلت على علا .. ما ردت الا في المكالمه التالته
علا بصوت نعسان: بسم الله يابت متصله لي الوقت دا مالك
لما وهي بتبكي : علاا جاسر .. جاسر
علا قامت مخلوعه : في شنو جاسر مالو
لما : جاسر كان هنا كسر اي شي في الغرفه وطلع
-- طيب اهدي هسي وفهميني في شنو بالظبط حصل شنو خلاهو يعمل كدا
-- ما بعرف اصلا اليوم كلو زهجان وقبيل جاتو مكالمه ما عارفه منو الاتصل ولا قالو ليهو شنو كسر التلفون واي شي وطلع
علا اللحظه دي اتذكرت كلام امها وما عرفت تقول لي لما شنو
لما : انا خايفه شديد ي علا ما عارفه حيعمل لنفسو شنو
علا: طيب روقي انا هسي بتكلم معاهو وبشوف الحاصل شنو
لما : ما معاهو تلفون ولا اي شي
علا : عندو تلفون صغير بكون في عربيتو طوالي نسيتيهو
لما : ااا كيف نسيت بس ما عندي الرقم
علا : طيب ما تقلقي انا عندي بتصل عليهو هسي وبشوفو
لما : رسليهو لي
علا : كويس طيب
..............................
