الشاهدة الوحيدة
_أنا ما قادرة أستوعب السويتيهو يا نيكولا بالجد طلعتي فظيعة متفهمة انو علاقتك بسلمى وبيت الجعفري ما تمام لكن تصل للقتل قتل يا نيكولا !! انت متخيلة حجم المصيبة الوقعتينا فيها دي أرفعي رأسك دا أنا بتكلم معاك .
_اعمل شنو يعني يا مودة كنت معصبة وهي استفزتني ولقيت نفسي ضربتها بالحجر وماتت وبعدين هي تستاهل زاتو اصلي ما ندمانة اني كتلتها يلا ارتحنا من جعجعتها البتصدع الرأس دي .
_لا ما بصدق مستحيل تكوني انتي بني آدمة طبيعية ياااخي زول كاتل ليهو زول قبل سويعات كيف قادرة تكوني بالبرود دا قلبك مات خلاص الحقد والانتقام أعموك بقيتي ما قادرة تميزي الصح من الغلط؟ حرام عليك يا شيخة حرمتي أخوانك الصغار من أمهم بدال ما تبقي ليهم سند بقيتي وجع مع انك انتي اكتر واحدة بتفهمي شعور فقدان الأم والأب واتألمتي لسنين منو كيف طاوعك قلبك انو تعيشي اخوانك نفس العشتي لا انتي ما نيكولا الأنا بعرفها انا بقيت اخاف منك ومشمئزة من نفسي اني ما قادرة اوقفك من البتعملي فيهو دا اصحي يا نيكولا اصحى قبل ما تندمي .
_شوفي موضوع سلمى دا في لحظة غضب وانا معترفة اني غلطانة بس الحصل الحصل ومن حسن حظي انو ما كان في شاهد علي جريمتي وقدرنا نخلص من جثة سلمى وغرقانها في البحر وما حتطفح لأنو ربطناها بطوب كبير والحجر واثار الدم اخفيناها تماما فحاليا احنا في السليم يا دودو ما تخافي خليك ريلاكس عشان ما يشكو فينا يااااخ .
_عمري ما كنت متخيلة اني اتستر علي زول مجرم وقاتل وما اتوقعتك انتي تعملي كدا اي نعم انا عارفاك عايزة تنتقمي منهم بس ما بالطريقة الوحشية دي كبيرها تشيلي حقوقك منهم من اراضي وقروش وتفضحيتهم مع خلق الله ويضطرو يعترفو بيك واحدة منهم لكن قتل دي ما اتوقعتها منك خايفة ربنا يغضب علي زاتي معاك لاني عارفة وشايفة وساكتة بقت عليك سحر وقتل و........ وكل ما تعاندي وتستهوني حتتمادي أكتر .
_كدي خلينا من دا ما وريتك المبلغ المحتاجنو للبيزنس حقنا جاهز وعما قريب حنفتح البيوتي سنتر وحنحقق حلمنا يا الله ياااااخ اخيرا بس ما حنبدا المشروع ما لم أنتقم من احسان وعزوان السرقت مني حبيبي .
_يارب نخلص بسرعة ونطلع من القرية دي زهجت اوووف وكمان الحيوان الأسمو **** دا كل يوم صارع رأسي بتلفوناتو اها لسع ما خلصتو شغلكم ، عربيتي كيف ما يكون ادوها عين وبوظوها لي ، حترجعو متين عشان في حلاوة جديدة وصلت وعايزكم تصرفوها غايتو ندمني اليوم الأشتغلت معاهو ووافقت اجي القرية دي .
_هسسسس وطي صوتك مافي زول يسمعنا الناس ديل لسع بفتشو في سلمى ويمكن واحد فيهم يدخل ويسمعنا خليت باب السر فاتح انا ما بقفلو اها ماشة كيف في الموضوع داك قدرت تصرفي الحلاوات الرسلها المعلم معانا كلها ولالا؟
_يادوبك بمشي في الشغل لسع وبكسب زبائن وكمان لازم افتش لي زول يستلم الشغل من بعدنا اووووف منو دايما رامي الشغل كلو فيني الحمدلله حنتخلص منو اخيرا ونتفك من قيودو ونأسس شغلنا برانا مالنا ومال شغل اللبش دا يااااخ .
_الحق يقال شغل اللبش دا أكلنا سنين وبدونو كنا هسي في الشوارع بنلقط الأكياس والقارورات لكن انا تاني بعد ما أرجع حقي وأسس شغلي بنفسي وافتح البيوتي سنتر دا حنقطعها معاهو ستة صفر اصبري بس قربنا نخلص من الهم دا كلو يا مودتي .
_انا خايفاهو يعمل فينا حاجة بعد ما نخلي الشغل معاهو الكم سنة الأشتغلنا فيها عندو خلتنا نعرف أسرار كتيرة وهو أكيد حيحاول يسكتنا عشان ما نفضحو ما بعيد يقتلنا زاتو ولا حيهمو .
_احنا لازم نهرب منو ونختفي نهائيا من البلد دي عشان ما يصل لينا رأيك شنو نمشي أثيوبيا ونفتح بيزنسنا هناك؟
_أثيوبيا عديل دي مجازفة والله تفتكري حننجح؟
_أكيد ياخ دا غير انو نفسي أزور بلدي التاني سمعت انها جميلة شديد بالزات العاصمة أديس تتذكري الحبشية الكانت شغالة في البيت الجمبنا في سكنا القديم هي الكانت جابت لي الزوريا من سوق شيروميدا وحكت لي عن الثقافة الأثيوبية بعد ما وريتها انو امي أثيوبية بالجد هي بلد عندها مستقبل بس مشكلتها ناسها كتار تقريبا 100 مليون نسمة يعني دبلنا مرتين ونص ههههههه .
_طيب ربنا يسهل لينا إن شاء الله اول شئ نطلع من المصيبة دي بعدها نبقى نشوف حنعمل شنو .
